ភ្នំពេញៈ ស្នងការនគរបាលរាជធានីភ្នំពេញនៅព្រឹកថ្ងៃទី ២ ខែកញ្ញានេះ បានបង្ហាញឯកសារចាំបាច់មួយចំនួន ដែលតម្រូវឱ្យប្រជាពលរដ្ឋភ្ជាប់មកជាមួយនៅពេលត្រូវការធ្វើអត្តសញ្ញាណប័ណ្ណសញ្ជាតិខ្មែរ សៀវភៅស្នាក់នៅ និងសៀវភៅគ្រួសារ ដើម្បីកុំឱ្យមានការខ្វះខាតឯកសារ។
ស្នងការនគរបាលរាជធានីភ្នំពេញបានបញ្ជាក់ថា ប្រសិនបើប្រជាពលរដ្ឋដែលរស់នៅរាជធានីភ្នំពេញ ដែលមានអត្តសញ្ញាណប័ណ្ណសញ្ជាតិខ្មែរ ហួសសុពលភាពក្នុងការប្រើប្រាស់ និងគ្រប់អាយុចាប់ពី ១៥ ឆ្នាំឡើង សូមទៅធ្វើថ្មី នៅតាមអធិការដ្ឋាននគរបាលខណ្ឌ ប៉ុស្ដិ៍នគរបាលរដ្ឋបាលនៅជាន់ទី២ នៃផ្សារទំនើបអ៊ីអន ២ សែនសុខ ឬការិយាល័យជំនាញនៃស្នងការដ្ឋាននគរបាលរាជធានីភ្នំពេញ។
បើតាមស្នងការនគរបាលរាជធានីភ្នំពេញ ពលរដ្ឋត្រូវភ្ជាប់មកជាមួយនូវ សេចក្ដីចម្លងសំបុត្រកំណើត សេចក្ដីចម្លងសំបុត្របញ្ជាក់កំណើតរបស់សាមីខ្លួន និងសៀវភៅស្នាក់នៅ ឬសៀវភៅគ្រួសាររបស់សាមីខ្លួន។ បើជនបរទេសត្រូវមានព្រះរាជក្រឹត្យចូលសញ្ជាតិខ្មែរ។
ដោយឡែក សម្រាប់សៀវភៅស្នាក់នៅ ត្រូវភ្ជាប់មកជាមួយនូវ សេចក្ដីចម្លងសំបុត្រកំណើត សេចក្ដីចម្លងសំបុត្របញ្ជាក់កំណើត អត្តសញ្ញាណប័ណ្ណសញ្ជាតិខ្មែរ សំបុត្រអាពាហ៍ពិពាហ៍ (ប្រសិនបើមាន) និងលិខិតអនុញ្ញាតផ្លាស់ប្ដូរទីលំនៅពីប៉ុស្ដិ៍នគរបាលរដ្ឋបាល ទីកន្លែងដែលសាមីខ្លួនធ្លាប់រស់នៅ (ប្រសិនបើមានការផ្លាស់ប្ដូរទីកន្លែងរស់នៅ)។
ចំណែកប្រជាពលរដ្ឋដែលត្រូវធ្វើសៀវភៅគ្រួសារ ស្នងការនគរបាលរាជធានីភ្នំពេញ បានណែនាំឱ្យភ្ជាប់មកជាមួយនូវ សៀវភៅស្នាក់នៅ សេចក្ដីចម្លងសំបុត្រកំណើត សេចក្ដីចម្លងសំបុត្របញ្ជាក់កំណើត អត្តសញ្ញាណប័ណ្ណសញ្ជាតិខ្មែរ សំបុត្រអាពាហ៍ពិពាហ៍។
ស្នងការនគរបាលរាជធានីភ្នំពេញបញ្ជាក់ថា ក្នុងករណីយឺតយ៉ាវប្រជាពលរដ្ឋអាចផ្ដល់ព័ត៌មាន តាមរយៈលេខទូរសព្ទ៖ 069 516 999, 012 916 208៕