កំពង់ឆ្នាំង/ព្រះវិហារៈ ជនប្រុសស្រី ៤ នាក់ ត្រូវបានតុលាការសម្រេចធ្វើការចោទប្រកាន់ និងបញ្ជូនទៅឃុំខ្លួនពីបទជួញដូរគ្រឿងញៀនជាង ៣១ ក្រាម និងជាង ៨០០ គ្រាប់ក្នុងសំណុំរឿងចំនួន ២ ដាច់ដោយឡែកពីគ្នា នៅក្នុងខេត្តកំពង់ឆ្នាំង និងនៅខេត្តព្រះវិហារ នៅថ្ងៃទី ១ និងទី ២ កញ្ញា។
លោក អ៊ិត សុធា អ្នកនាំពាក្យអយ្យការអមសាលាដំបូងខេត្តកំពង់ឆ្នាំងប្រាប់នៅថ្ងៃទី ២ កញ្ញាថា ជនទាំងនោះទី១- ឈ្មោះ ព្រៃ សំអុន ភេទប្រុស អាយុ ២៦ ឆ្នាំ មុខរបរមិនពិតប្រាកដ។ ទី២- ឈ្មោះ ព្រៃ សំអាង ភេទប្រុសអាយុ ៣៧ ឆ្នាំ មុខរបរ មិនពិតប្រាកដ (បងប្អូនបង្កើត) និងឈ្មោះ ម៉ែន សារ៉ុម ភេទស្រី អាយុ ៥៨ ឆ្នាំជាកសិករ ពួកគេរស់នៅភូមិឧទុម្ពរ ឃុំស្វាយជ្រំ ស្រុករលាប្អៀរ ខេត្ដកំពង់ឆ្នាំង។
លោកថ្លែងថា៖ «ជនទាំង ៣ នាក់ ត្រូវបានចោទប្រកាន់ពីបទរក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន។ ពួកគេត្រូវចោទតាមមាត្រា ៤០ ច្បាប់ស្តីពីការត្រួតពិនិត្យគ្រឿងញៀន»។
លោក ហ៊ុល វាសនា ស្នងការរងទទួលផែននគរបាលប្រឆាំងគ្រឿងញៀន ខេត្តកំពង់ឆ្នាំងបានបញ្ជាក់នៅថ្ងៃទី ២ កញ្ញាថា មុនមានការឃាត់ខ្លួនជនត្រូវចោទទាំង ៣ នាក់នេះ គឺសមត្ថកិច្ចជំនាញបានប្រើពេលតាមដានជាច្រើនថ្ងៃមកហើយ។
ក្រោយពីបានធ្វើការស្រាវជ្រាវ និងស៊ើបអង្កេតយ៉ាងល្អិតល្អន់ហើយនោះ សមត្ថកិច្ចបានចេញបង្ក្រាបនៅថ្ងៃទី ៣១ សីហា នៅក្នុងភូមិឧទុម្ពរ ឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង។
លោកប្រាប់ថា៖ «ការងារនេះ យើងបានបង្ក្រាបជាក់ស្តែង ខណៈពួកគេកំពុងធ្វើសកម្មភាពជួញដូរគ្រឿងញៀន»។ បើតាមលោក វាសនា ថា វត្ថុតាងដែលសមត្ថកិច្ចបង្ក្រាបបានមានសារធាតុញៀនសរុបចំនួន ៥១ កញ្ចប់ ស្មើនិង ៣១,១១ ក្រាម ទូរស័ព្ទដៃ ២ គ្រឿង និងលុយខ្មែរចំនួន ១៥ លានរៀល រួមទាំងឧបករណ៍សម្រាប់វេចខ្ចប់ថ្នាំញៀនមួយចំនួនទៀត។
ដោយឡែក នៅឯខេត្តព្រះវិហារស្ត្រីម្នាក់ត្រូវបានតុលាការខេត្តសម្រេចឃុំខ្លួនក្នុងពន្ធនាគារកាលពីថ្ងៃទី ១ កញ្ញា ពាក់ព័ន្ធជួញដូរគ្រឿងញៀនដូចគ្នានេះផងដែរ។
លោក ស៊ុន ចលនា នាយការិយាល័យប្រឆាំងបទល្មើសគ្រឿងញៀន ខេត្តបានឱ្យដឹងនៅថ្ងៃទី ២ កញ្ញាថា ស្ត្រីត្រូវចោទឈ្មោះ អិត ណាងណយ អាយុ ២៧ ឆ្នាំត្រូវបានចៅក្រមចេញដីកាឃុំខ្លួនបណ្តោះអាសន្ននៅពន្ធនាគារខេត្តហើយពីថ្ងៃទី ១ កញ្ញា។
លោកបានបញ្ជាក់ថា៖ «ស្ត្រីម្នាក់នេះត្រូវតំណាងអយ្យការចោទប្រកាន់ពីបទរក្សាទុក ជួញដូរដោយខុសច្បាប់នូវសារធាតុញៀនតាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន»។
លោក ស៊ុន ចលនា បន្ថែមថា ស្ត្រីរូបនេះត្រូវបានសមត្ថកិច្ចចាប់ឃាត់ខ្លួន នៅក្នុងពេលកំពុងជួញដូរគ្រឿងញៀនកាលពីថ្ងៃទី ៣១ សីហា ឆ្នាំ ២០២១ ស្ថិតនៅក្នុងភូមិកំពង់សាមី ឃុំកំពង់ស្រឡៅ ២ ស្រុកឆែប ខេត្តព្រះវិហារ។
នៅក្នុងពេលចុះប្រតិបត្តិការឃាត់ខ្លួនស្ត្រីរូបនេះ សមត្ថកិច្ចរឹបអូសបានមានគ្រឿងញៀនប្រភេទយ៉ាម៉ាចំនួន ៨៦៤ គ្រាប់ ប្រាក់ខ្មែរ និងប្រាក់ដុល្លារមួយចំនួនទៀត៕