ភ្នំពេញៈ អង្គភាពប្រឆាំងអំពើពុករលួយ (អ.ប.ព) បានស្នើដល់អាជ្ញាធរខេត្តតាកែវមានវិធានការបន្ទាន់ក្នុងការទប់ស្កាត់ការជីកយកអាចម៍ដី និងដោះស្រាយជម្លោះដីធ្លីក្នុងខេត្តតាកែវ។
សេចក្តីប្រកាសព័ត៌មានរបស់ អ.ប.ព នៅថ្ងៃទី ៣១ ខែសីហា ដែលភ្នំពេញ-ប៉ុស្តិ៍ទទួលបាននៅថ្ងៃទី ១ ខែកញ្ញា បានឱ្យដឹងថា ក្រោយពីបានទទួលពាក្យប្តឹងអនាមិកជាបន្តបន្ទាប់ពាក់ព័ន្ធករណី ជីកយកអាចម៍ដីលុបបំពេញ សាងសង់សំណង់រឹងមាំ និងការទិញលក់ដីធ្លីក្នុងបរិវេណនៃអាងទឹកតាកែវក្នុងក្រុងដូនកែវ ខេត្តតាកែវ ក្រុមការងារ អ.ប.ព បានចុះស្រាវជ្រាវដល់ទីតាំងជាក់ស្តែង ហើយពិនិត្យឃើញថា បាតុភាពដែលពាក្យប្តឹងបានលើកឡើងអាចជាទំនាស់ ឬជាកំហុស លើករណីផ្សេងក្រៅពីសមត្ថកិច្ចរបស់ អ.ប.ព ក្នុងនោះមានដូចជា ការជីកយកអាចម៍ដីពីផ្ទៃដីបាតបឹង ការចាក់ដីលុបផ្ទៃអាងទឹក ការសាងសង់សំណង់ក្នុងបរិវេណអាងទឹក ព្រមទាំងមានការទិញលក់ដីធ្លីក្នុងបរិវេណអាងទឹកដោយមានការបញ្ជាក់ទទួលស្គាល់ពីអាជ្ញាធរមូលដ្ឋានទៀតផង។
ក្នុងសេចក្តីប្រកាសព័ត៌មាននេះ អ.ប.ព សរសេរថា៖ «ផ្អែកតាមលទ្ធភាពខាងលើនេះ អ.ប.ព បានស្នើដល់អាជ្ញាធរខេត្តតាកែវត្រូវមានវិធានការទប់ស្កាត់ជាបន្ទាន់ ចំពោះបុគ្គលដែលពាក់ព័ន្ធនឹងករណីនេះ ដើម្បីធានាដល់និរន្តរភាពនៃការប្រើប្រាស់អាងទឹកតាកែវ»។
យ៉ាងណាក៏ដោយ អង្គភាពប្រឆាំងអំពើពុករលួយបញ្ជាក់ថា នៅតែបន្តតាមដានករណីនេះ និងមានវិធានការតាមផ្លូវច្បាប់បន្តបន្ទាប់ទៀត តាមសភាពវិវឌ្ឍន៍ជាក់ស្តែង។
លោក លី សាវេត អភិបាលរង និងជាអ្នកនាំពាក្យរដ្ឋបាលខេត្តតាកែវថ្លែងនៅថ្ងៃទី ១ ខែកញ្ញានេះថា អាជ្ញាធរខេត្តតាកែវបានធ្វើការនេះតាំងពីមុនអង្គភាពប្រឆាំងអំពើពុករលួយចេញសេចក្តីប្រកាសព័ត៌មានម្ល៉េះ។ ក្នុងនោះ អាជ្ញាធរ ក៏បានចុះទៅឃាត់សកម្មភាព និងត្រួតពិនិត្យ និងកំពុងបន្តស្រាវជ្រាវ និងធ្វើកិច្ចការងារនេះបន្តទៀត។
យ៉ាងណាចំពោះការស្នើសុំពីអង្គភាពប្រឆាំងអំពើពុករលួយដែលចេញនៅថ្ងៃទី ៣១ ខែសីហានេះ អាជ្ញាធរខេត្តនៅមិនទាន់មានការសម្រេចអ្វីថ្មីនៅឡើយ។
លោកថ្លែងថា៖ «អង្គភាពប្រឆាំងអំពើពុករលួយទើបតែប្រកាសនេះ ឯកឧត្តមអភិបាលមិនទាន់មានវិធានការអ្វីបន្ថែមទេ។ មានន័យថា អត់ទាន់មានការប្រជុំគ្នា អត់ទាន់មានការបញ្ជាទៅខាងណា ឱ្យធ្វើអី គឺនៅទេ»។
លិខិតមួយទៀតរបស់ អ.ប.ព ចេញនៅថ្ងៃដដែលនោះបានឱ្យដឹងថា បន្ទាប់ពីទទួលបានពាក្យប្តឹងអនាមិកពាក់ព័ន្ធករណីចោទប្រកាន់ថា មានការដេញប្រជាពលរដ្ឋចេញពីទំតាំងធ្វើស្រែចម្ការក្នុងភូមិព្រៃក្តួច ភូមិបុស្សតាផង់ ភូមិស្រែជើងរាស្ដ្រ ក្នុងឃុំត្រពាំងក្រញូង ស្រុកត្រាំកក់ ខេត្តតាកែវ។
ក្រុមការងារ អ.ប.ព ក៏បានចុះស្រាវជ្រាវដល់ទីតាំងជាក់ស្តែង និងពិនិត្យលើឯកសារពាក់ព័ន្ធ ដោយទទួលបានលទ្ធផលជាក់ស្តែងគឺ អភិបាលនៃគណៈអភិបាលស្រុកត្រាំកក់ ខេត្តតាកែវ មិនបានប្រព្រឹត្តដូចការលើកឡើងក្នុងពាក្យប្តឹងពាក់ព័ន្ធនឹងការដេញប្រជាពលរដ្ឋចេញពីទីតាំងធ្វើស្រែចម្ការរបស់ពួកគាត់ទេ ផ្ទុយទៅវិញគឺខិតខំជំរុញដោះស្រាយក្នុងការងារនេះ។ ទីតាំងដីដែលស្ថិតក្នុងភូមិសាស្ត្រជម្លោះនោះត្រូវបាន សជណ ចុះថ្ងៃទី ៥ ខែតុលា ឆ្នាំ ២០១៧ របស់ទីស្តីការគណៈរដ្ឋមន្ត្រី និរាករណ៍រាល់ការកាន់កាប់ពីមុនទាំងអស់ ហើយតម្រូវឱ្យរដ្ឋបាលខេត្តតាកែវ និងមន្ទីរជំនាញពាក់ព័ន្ធធ្វើការដោះស្រាយជម្លោះដីធ្លីទាំងនោះ ដើម្បីផ្តល់បណ្ណកម្មសិទ្ធិជូនប្រជាពលរដ្ឋឱ្យបានឆាប់។
ក្នុងលិខិត អ.ប.ព បានសរសេរថា៖ «អង្គភាពប្រឆាំងអំពើពុករលួយបន្តតាមដានករណីនេះ និងមានវិធានការតាមផ្លូវច្បាប់ក្នុងករណីរកឃើញអំពើពុករលួយ»។
លោក លី សាវេត អភិបាលរង និងជាអ្នកនាំពាក្យរដ្ឋបាលខេត្តតាកែវថ្លែងនៅថ្ងៃទី ១ ខែកញ្ញានេះថា មកទល់ពេលនេះ រដ្ឋបាលខេត្ត និងមន្ទីរជំនាញកំពុងបន្តចុះវាស់វែង និងរៀបចំបិទផ្សាយជាសាធារណៈនូវឯកសារវិនិច្ឆ័យ និងត្រៀមផ្តល់បណ្ណជូនប្រជាពលរដ្ឋ។ ជាមួយគ្នានោះអាជ្ញាធរក៏កំពុងធ្វើការសម្រួលដោះស្រាយជាមួយពលរដ្ឋមួយចំនួនដែលនៅមិនទាន់សុខចិត្តទទួលយកតាមការបែងចែក។ លោកថា៖ «យើងអត់មានជម្រើសអីក្រៅពីសម្របសម្រួលទេ។ ពេលនេះ អាជ្ញាធរជំនាញកំពុងដោះស្រាយជាមួយអ្នកកាន់កាប់មួយចំនួនដែលមិនព្រមទទួលយកតាមស្មារតី សជណ ៩៦៨ និង ៩៦៩»៕