.jpg)
ជនសង្ស័យត្រូវបានសមត្ថកិច្ចចាប់ឃាត់ខ្លួនកាលពីថ្ងៃទី ៣១ សីហា ករណីចាប់រំលោភមិនបានសម្រេច។ រូបថត ប៉ូលិស
បាត់ដំបងៈ នគរបាលប្រឆាំងការជួញដូរមនុស្សខេត្តបាត់ដំបងថ្ងៃទី ២ កញ្ញា បានបញ្ជូនជនសង្ស័យម្នាក់ទៅសាលាដំបូងខេត្តនេះ បន្ទាប់ពីឃាត់ខ្លួនបាន ១ ថ្ងៃពាក់ព័ន្ធចាប់រំលោភស្ដ្រីម្នាក់មិនបានសម្រេច ប្រព្រឹត្តកាលពីយប់ថ្ងៃទី ៣០ សីហា នៅឃុំព្រៃស្វាយ ស្រុកមោងឫស្សី ខេត្តបាត់ដំបង។
លោកស្រី ឧត្តមសេនីយ៍ត្រី រស់ ជីវី ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជនខេត្តបានឱ្យដឹងពីថ្ងៃទី ២ កញ្ញាថា បុរសសង្ស័យមានឈ្មោះ ខុម សុឃឿន អាយុ ៣០ ឆ្នាំ រស់នៅឃុំព្រៃស្វាយ ស្រុកមោងឫស្សី ខេត្តបាត់ដំបង។
លោកស្រីបានបញ្ជាក់ថា៖ «ជនសង្ស័យត្រូវបានបញ្ជូនបន្តទៅសាលាដំបូងខេត្តបាត់ដំបងនៅថ្ងៃទី ២ កញ្ញា ជាប់ពាក់ព័ន្ធករណីប៉ុនប៉ងរំលោភសេពសន្ថវៈមិនបានសម្រេច»។
ពាក់ព័ន្ធនឹងការឃាត់ខ្លួនបុរសរូបនេះ លោក ស គឹមឡុង អធិការនគរបាលស្រុកមោងឫស្សីប្រាប់ពីថ្ងៃទី ២ កញ្ញាថា សមត្ថកិច្ចបានអនុវត្ត ក្រោយទទួលពាក្យបណ្ដឹងពីស្ត្រីរងគ្រោះឈ្មោះ ស.អ.ម អាយុ ២៦ ឆ្នាំ រស់នៅឃុំស្វាយព្រៃ ស្រុកមោងឫស្សី ជាមួយជនល្មើសដែរ ។
លោកបានឱ្យដឹងតាមពាក្យបណ្តឹងរបស់ស្ត្រីរងគ្រោះថា គាត់មានប្ដី និងមានកូនតូចអាយុជាង ១ ខួបម្នាក់ តែលោកមិនចាំថាកូនប្រុស ឬស្រីទេ។ ចំណែកប្តីរបស់គាត់ទៅធ្វើការនៅរាជធានីភ្នំពេញ ដោយស្ត្រីរងគ្រោះរស់នៅតែ ២ នាក់ម្តាយកូនប៉ុណ្ណោះនៅក្នុងភូមិកើតហេតុខាងលើ។
លោកបានបន្តថា លុះនៅយប់ថ្ងៃទី ៣០ សីហា ឆ្នាំ ២០២១ នៅវេលាម៉ោងប្រហែលជា ៩ យប់ ខណៈជនរងគ្រោះកំពុងសម្រាន្តលក់ ស្រាប់តែជនសង្ស័យបានលបចូលទៅក្នុងមុងរបស់ស្ត្រីរងគ្រោះ រួចចាប់នាងរំលោភសេពសន្ថវៈ តែមិនបានសម្រេច ដោយសារស្ត្រីរងគ្រោះបានដឹងខ្លួន ហើយខំរើបម្រះខ្លួន រួចស្រែកឱ្យអ្នកភូមិជួយ។ បន្ទាប់មកអ្នកជិតខាងបាននាំគ្នាចេញមកឆោឡោ ដើម្បីជួយស្ត្រីរងគ្រោះ។
លោកបន្តទៀតថា ភ្លាមៗនោះ ដោយឃើញមានមនុស្សច្រើន ធ្វើសកម្មភាពមិនកើត ជនសង្ស័យក៏បានគេចខ្លួន។
លុះព្រឹកឡើងថ្ងៃទី ៣១ សីហា ស្ត្រីរងគ្រោះបានដាក់ពាក្យបណ្តឹងមកក៏ប៉ុស្តិ៍នគរបាលព្រៃស្វាយ ហើយសមត្ថកិច្ចប៉ុស្តិ៍ក៏ចុះស្រាវជ្រាវឃាត់ខ្លួនជនសង្ស័យបាននៅថ្ងៃទី ១ កញ្ញាក្នុងភូមិកើតហេតុតែម្តង។
លោកប្រាប់ថា៖ «ករណីនេះជនសង្ស័យសារភាពប្រាប់សមត្ថកិច្ចថា គាត់ពិតជាបានធ្វើសកម្មភាពមែន»៕
