.jpg)
ភ្នំពេញៈ ស្ថានទូតជប៉ុនប្រចាំព្រះរាជាណាចក្រកម្ពុជានៅថ្ងៃទី ៣ ខែកញ្ញានេះ បានបង្ហាញបុគ្គលឆ្នើម ៤ រូបដែលបានទទួលលិខិតសរសើរពីរដ្ឋមន្ត្រីក្រសួងការបរទេសជប៉ុន តាមរយៈសកម្មភាពនានាក្នុងការរួមចំណែកលើការជំរុញចំណងមិត្តភាពរវាងប្រទេសជប៉ុន និងប្រទេសកម្ពុជា។
តាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជាបានឱ្យដឹងថា កាលពីថ្ងៃទី ២០ ខែសីហា ក្រសួងការបរទេសជប៉ុនបានចេញសេចក្តីប្រកាសព័ត៌មានស្តីអំពីលិខិតសរសើររបស់រដ្ឋមន្ត្រីការបរទេសជប៉ុន សម្រាប់ឆ្នាំនេះជូនចំពោះបុគ្គល ឬក្រុមដែលមានស្នាដៃឆ្នើមលើវិស័យអន្តរជាតិ ដើម្បីជាការទទួលស្គាល់នូវការរួមចំណែករបស់ពួកគាត់ លើការជំរុញចំណងមិត្តភាពរវាងប្រទេសជប៉ុន និងបណ្តាប្រទេសនានា។
បើតាមសេចក្ដីប្រកាសព័ត៌មាន បុគ្គលឆ្នើមដែលបានទទួលលិខិតសរសើរ សម្រាប់សកម្មភាពនានារបស់ពួកគេក្នុងការរួមចំណែកនៅប្រទេសកម្ពុជា រួមមាន
ទី ១ លោក ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបានលិខិតសរសើរលើការរួមចំណែក ក្នុងការជំរុញការយល់ដឹងគ្នាទៅវិញទៅមករវាងជប៉ុន និងកម្ពុជា។
ទី ២ លោក យ៉ាម៉ាដា យុស៊ិតាកា ទីប្រឹក្សារាជរដ្ឋាភិបាលកម្ពុជាទទួលបានលិខិតសរសើរលើការរួមចំណែក ជំរុញ ការយល់ដឹងគ្នាទៅវិញទៅមករវាងជប៉ុន និងកម្ពុជា។
ទី ៣ លោក ម៉ូរីតា ណុរីតាដា តំណាងអង្គការមោទនភាពអាស៊ី សមាគមន៍មិត្តព្រះវិហារ-ជប៉ុន លើការរួមចំណែកជំរុញ ទំនាក់ទំនងសេដ្ឋកិច្ចរវាងជប៉ុន និងកម្ពុជា។
ទី ៤ លោក អូតានិ ខេនជិ ប្រធានក្រុមយុទ្ធនាការសំអាតគ្រាប់មីននៅកម្ពុជា (CMC) លើការរួមចំណែក ជំរុញការយល់ដឹងគ្នាទៅវិញទៅមករវាងជប៉ុន និងកម្ពុជា។
បើតាមស្ថានទូតជប៉ុនប្រចាំព្រះរាជាណាចក្រកម្ពុជាបានឱ្យដឹងថា ពិធីប្រគល់លិខិតសរសើរនឹងត្រូវរៀបចំឡើងនៅពេលខាងមុខ៕
