កោះកុងៈ អាជ្ញាធរខេត្តកោះកុងបានស្នើដល់អ្នកដែលជួលដីរដ្ឋរយៈពេលខ្លី (ក្រោម ១៥ ឆ្នាំ) ដើម្បីវិនិយោគវារីវប្បកម្ម បង្កាត់ពូជត្រី និងចិញ្ចឹមក្តាម ត្រូវធ្វើយ៉ាងណា កុំឱ្យបង្កផលប៉ះពាល់ដល់បរិស្ថានដល់សហគមន៍ និងការបំពុលចូលសមុទ្រ។
លោក អ៊ុក ភ័ក្ត្រា អភិបាលរងនៃគណៈអភិបាលខេត្តកោះកុង និងលោក ស្រ៊ុន ដារិទ្ធ រដ្ឋលេខាធិការក្រសួងបរិស្ថាន ព្រមទាំងមន្ត្រីពាក់ព័ន្ធនៅថ្ងៃសុក្រទី ៣ កញ្ញា បានចុះពិនិត្យទីតាំងស្នើសុំជួលដីរដ្ឋទំហំ ៣៦,៨៧ ហិកតា រយៈពេលខ្លី (ក្រោម ១៥ ឆ្នាំ) ដើម្បីវិនិយោគវារីវប្បកម្ម បង្កាត់ពូជត្រី និងចិញ្ចឹមក្តាម ស្ថិតនៅឃុំជ្រោយប្រស់ ស្រុកកោះកុង។ នេះបើតាមរដ្ឋបាលខេត្តកោះកុង។
ក្នុងពេលចុះទៅពិនិត្យទីតាំងនោះក្នុងនាមរដ្ឋបាលខេត្តកោះកុង លោក អ៊ុក ភ័ក្ត្រា បានស្នើដល់អ្នកដែលសុំជួលដីរដ្ឋនេះត្រូវធ្វើការសិក្សាឱ្យបានច្បាស់លាស់ អំពីសក្តានុពល ភាពអំណោយផល និងប្រភេទនៃវារីវប្បកម្ម (ត្រី និងក្តាម) ដែលគ្រោងនឹងយកមកចិញ្ចឹម ដើម្បីឱ្យត្រូវនឹងស្ថានភាពភូមិសាស្ត្រនៃតំបន់នេះ។
លោកថ្លែងថា៖ «សូមសិក្សាឱ្យបានច្បាស់លាស់អំពីបច្ចេកទេសនៃការគ្រប់គ្រងគម្រោងវារីវប្បកម្មនេះប្រកបដោយប្រសិទ្ធភាព ចៀសវាងការប៉ះពាល់ដល់បរិស្ថានដល់សហគមន៍ និងការបំពុលចូលសមុទ្រ»។
សូមចូលរួមថែរក្សាបរិស្ថាន ធនធានធម្មជាតិ នៅក្នុង និងក្បែរទីតាំងគម្រោងធ្វើអាជីវកម្មវារីវប្បកម្មនេះ ដើម្បីធានាបាននូវនិរន្តរភាពបរិស្ថាន និងជីវចម្រុះ។
លើសពីនេះ លោក អ៊ុក ភ័ក្ត្រា បានលើកឡើងថា រាល់ការសាងសង់ និងអនុវត្តគម្រោងវារីវប្បកម្ម ត្រូវគោរពតាមគោលការណ៍ណែនាំរបស់រាជរដ្ឋាភិបាល ក្រសួងបរិស្ថាន និងលិខិតបទដ្ឋានគតិយុត្តនានា ដែលមានចែងជាធរមាន៕