ភ្នំពេញៈ ក្រុមការងារបច្ចេកទេសរៀបចំគោលនយោបាយដោះស្រាយវិវាទក្រៅប្រព័ន្ធតុលាការនៃក្រសួងយុត្ដិធម៌ និងក្រុមការងារមកពីក្រសួង-ស្ថាប័នរដ្ឋពាក់ព័ន្ធ អង្គការសង្គមស៊ីវិល ដៃគូអភិវឌ្ឍន៍ជាតិ និងអន្តរជាតិ សរុប ១១០ អង្គភាព បានឯកភាពគ្នាលើគោលការណ៍គ្រឹះនៃឯកសារទស្សនាទាន ស្តីពីការរៀបចំយន្តការដោះស្រាយវិវាទក្រៅប្រព័ន្ធតុលាការនៅកម្ពុជា។
ការឯកភាពគ្នានេះធ្វើឡើងតាមរយៈសិក្ខាសាលាពិគ្រោះយោបល់ចុងក្រោយ ឬលើកទី ៥ នៅថ្ងៃទី ៣ ខែកញ្ញានេះ តាមប្រព័ន្ធហ្សូម។
សិក្ខាសាលានេះ ដឹកនាំដោយ លោក ជិន ម៉ាលីន រដ្ឋលេខាធិការក្រសួងយុត្ដិធម៌ ដោយមានការចូលរួមពីក្រសួង-ស្ថាប័នរដ្ឋពាក់ព័ន្ធ ស្ថាប័នតុលាការ ស្ថាប័នវិជ្ជាជីវៈ គ្រឹះស្ថានអប់រំ អង្គការសង្គមស៊ីវិល ដៃគូអភិវឌ្ឍន៍ជាតិ និងអន្តរជាតិ សរុប ១១០ អង្គភាព និងមានការចូលរួមសហការ និងគាំទ្រពីសហភាពអឺរ៉ុបនៅកម្ពុជា (EU) និងអង្គការ OXFAM នៅកម្ពុជាផងដែរ។
លោក ជិន ម៉ាលីន ថ្លែងប្រាប់ភ្នំពេញប៉ុស្ដិ៍នាថ្ងៃទី ៣ ខែកញ្ញានេះថា ការពិគ្រោះយោបល់លើកនេះ ដោយបានប្រមូលគ្រប់ភាគីពាក់ព័ន្ធទាំងអស់ជាង ១០០ អង្គភាព មកពិនិត្យចុងក្រោយលើឯកសារទស្សនាទាន ស្តីពីយន្តការដោះស្រាយវិវាទក្រៅប្រព័ន្ធតុលាការ។
លោកថ្លែងថា៖«យើងបានឯកភាពគ្នាទៅលើគោលការណ៍គ្រឹះនៃឯកសារទស្សនាទាននេះ។ អ៊ីចឹង ចេញពីឯកសារទស្សនាទាននេះ នឹងជូនគណៈកម្មការដឹកនាំការកែទម្រង់ច្បាប់ និងប្រព័ន្ធយុត្តិធម៌ ដែលដឹកនាំដោយឯកឧត្ដម (កើត រិទ្ធ) រដ្ឋមន្រ្ដីក្រសួងយុត្ដិធម៌»។
លោកបានឱ្យដឹងថា ចេញពីឯកសារទស្សនាទាននេះ ទៅទិសដៅខាងមុខ ក្រុមការងារនឹងអាចរៀបចំឯកសារទស្សនាទាននេះ ទៅជាគោលនយោបាយ ឬមួយទៅជាច្បាប់ ស្ដីពីការដោះស្រាយវិវាទក្រៅប្រព័ន្ធតុលាការនៅកម្ពុជា។
លោក ម៉ាលីន បញ្ជាក់ថា៖«គណៈកម្មការដឹកនាំការកែទម្រង់ច្បាប់ និងប្រព័ន្ធយុត្តិធម៌ ដែលមានឯកឧត្ដមរដ្ឋមន្រ្ដីក្រសួងយុត្ដិធម៌ជាប្រធាននឹងពិនិត្យសម្រេចទៅលើការងារនេះ»។
លោកបានឱ្យដឹងថា ឯកសារទស្សនាទាននេះ គឺជាការកំណត់ពីការរៀបចំយន្តការ រួមមានទាំងការរៀបចំយន្តការស្ថាប័ន ថ្នាក់ជាតិ និងថ្នាក់ក្រោមជាតិ។ ការរៀបចំយន្តការនៃការអនុវត្ដ វិធាននៃការអនុវត្ដ រួមនឹងយន្តការនៃការត្រួតពិនិត្យ វាយតម្លៃការទទួលស្គាល់ពាក់ព័ន្ធនឹងគុណភាពជាដើម។
លោកបញ្ជាក់ថា៖«កិច្ចបន្ទាប់ពីនេះទៅឯកសារទស្សនាទាននេះ នឹងត្រូវដាក់ពិភាក្សា អនុម័តដោយគណៈកម្មការដឹកនាំការកែទម្រង់ច្បាប់ និងប្រព័ន្ធយុត្តិធម៌ នឹងត្រូវពិនិត្យសម្រេចថា តើត្រូវរៀបចំចេញជាគោលនយោបាយឬក៏ច្បាប់»។
លោក កើត រិទ្ធ រដ្ឋមន្ត្រីក្រសួងយុត្តិធម៌កាលពីថ្ងៃទី ២៦ ខែ មិថុនា ឆ្នាំ២០២០ បានសម្រេចបង្កើតក្រុមការងារបច្ចេកទេសរៀបចំគោលនយោបាយនេះ ដោយបានតែងតាំងលោក ជិន ម៉ាលីន ជាប្រធានក្រុមការងារ។
ការបង្កើតគោលនយោបាយនេះ គឺជាការអនុវត្តនូវកម្មវិធីកំណែទម្រង់ច្បាប់ និងប្រព័ន្ធយុត្តិធម៌ដោយបង្ខិតសេវាយុត្តិធម៌ឱ្យទៅជិតប្រជាពលរដ្ឋ និងកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ដ។
ចំណែករាជរដ្ឋាភិបាលកម្ពុជា កាលពីថ្ងៃទី ២៩ ខែមករា ឆ្នាំ២០២១នេះដែរ ក៏បានសម្រេចលើកម្រិត គោលនយោបាយ «ភូមិ-ឃុំ-សង្កាត់មានសុវត្ថិភាព» ជាគោលនយោបាយជាតិ ក្នុងនោះការដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាពផងដែរ៕