.jpg)
សមត្ថកិច្ច ខេត្ដកោះកុង បន្តចុះរុះរើចេញខ្ទមអនាធិបតេយ្យ ដែលពលរដ្ឋសង់ល្មើសច្បាប់ នៅចំណុចអូរយ៉ូយ៉ា ភូមិថ្មស ឃុំថ្មស ស្រុកបូទុមសាគរ កាលពីថ្ងៃទី១ ខែកញ្ញា។ រូប សហការី
កោះកុងៈ មន្រ្តីនៃមន្ទីរបរិស្ថាន និងសមត្ថកិច្ច ខេត្ដកោះកុង បន្តចុះរុះរើខ្ទមអនាធិបតេយ្យចំនួន ២៧ខ្ទម និងរបងលួសជាង ២ពាន់ដើម ដែលពលរដ្ឋមួយចំនួនលួចសាងសង់នៅក្នុងតំបន់ឧទ្យានជាតិបុទុមសាគរ ចំណុចអូរយ៉ូយ៉ា ភូមិថ្មស ឃុំថ្មស ស្រុកបុទុមសាគរ ខេត្ដកោះកុង និងឱ្យពលរដ្ឋធ្វើកិច្ចសន្យាបញ្ឈប់សកម្មភាពល្មើសច្បាប់។
ប្រតិបត្តិការអនុវត្តច្បាប់នេះបានដឹកនាំដោយលោក វ៉េត សុនីម អនុប្រធានមន្ទីរបរិស្ថាន ខេត្តកោះកុង សហការជាមួយកងកម្លាំងអាវុធហត្ថ គណៈបញ្ជាការឯកភាពស្រុកបុទុមសាគរ និងមានការចូលរួមសម្របសម្រួលផ្នែកច្បាប់ ដោយលោក អេង ចាន់ភារ៉ា ព្រះរាជអាជ្ញារងនៃអយ្យកាអមសាលាដំបូងខេត្តកោះកុង កាលពីថ្ងៃទី ១ ខែសីហា ឆ្នាំ២០២១។
លោក វ៉េត សុនីម បានឱ្យដឹងថា ខ្ទមចំនួន ២៧ ដំណាំចម្ការ និងបង្គោលរបងឈើជាង ២ពាន់ដើម ស្ថិតនៅចំណុចអូរយ៉ូយ៉ា ភូមិថ្មស ឃុំថ្មស ត្រូវបានពលរដ្ឋមួយចំនួនតូច បន្តលួចសាងសង់ដោយគ្មានច្បាប់។ ពលរដ្ឋមួយចំនួនបានធ្វើលិខិតទិញលក់ដោយខ្លួនឯង អាជ្ញាធរមូលដ្ឋាន មិនទទួលស្គាល់ លើលិខិតលក់-ទិញនោះទេ។
លោកថ្លែងថា៖«មុននឹងឈានដល់មានចំណាត់ការអនវុត្ដច្បាប់នៅពេលនេះ មន្រ្តីអាជ្ញាធរពាក់ព័ន្ធធ្លាប់បានចុះអប់រំណែនាំជាច្រើនលើកហើយដែរ តែពលរដ្ឋទាំងនោះ មិនចូលរួមទាល់តែសោះ បែរជាជឿតាមការញុះញង់ពីមេខ្លោងនៅក្រោយខ្នងមកបន្តទន្រ្ទានយកដីរដ្ឋទៅវិញ»។
លោក សុនីម បានឱ្យដឹងថា ក្រុមពលរដ្ឋដែលហ៊ានរំលោភបំពានដីក្នុងតំបន់ឧទ្យានជាតិបុទុមសាគរ គឺពួកគាត់មានផ្ទះសម្បែង ដីស្រែចម្ការត្រឹមត្រូវ មិនមែនជាពលរដ្ឋខ្វះខាតដីស្រែចម្ការទេ។
លោកបញ្ជាក់ថា លោកនឹងស្នើសុំគោលការណ៍ពីក្រសួងបរិស្ថាន អយ្យការសាលាដំបូងខេត្ត លោកស្រី អភិបាលខេត្តកោះកុង សាងសង់ទីស្នាក់ការចំនួន ២ នៅមាត់ច្រកចេញ-ចូលនៃតំបន់រងផលប៉ះពាល់នៃតំបន់ឧទ្យានជាតិបុទុមសាគរនេះ ដើម្បីធានាបានប្រសិទ្ធភាពនូវការទប់ស្កាត់បង្រ្កាប រក្សាដីព្រៃការពារឱ្យនៅគង់វង្ស។
លោកថ្លែងថា៖«ទីតាំងដីធ្លីដែលពលរដ្ឋចូលទន្រ្ទាននេះ គឺតុលាការធ្លាប់ចេញលិខិតដកហូតមកជាសម្បត្តិរដ្ឋរួចមកហើយ ។ ដីនេះកន្លងមក តែងតែមានមេខ្លោងជួលពលរដ្ឋចូលទៅទន្រ្ទានកាន់កាប់ជាបន្តបន្ទាប់»។
សមត្ថកិច្ច ខេត្ដកោះកុង បន្តចុះរុះរើចេញខ្ទមអនាធិបតេយ្យ ដែលពលរដ្ឋសង់ល្មើសច្បាប់ នៅចំណុចអូរយ៉ូយ៉ា ភូមិថ្មស ឃុំថ្មស ស្រុកបូទុមសាគរ កាលពីថ្ងៃទី១ ខែកញ្ញា។ រូប សហការី
លោក ស សូនី ពលរដ្ឋម្នាក់នៅខេត្ដកោះកុងបានឱ្យដឹងថា ការលួចទន្រ្ទានដីព្រៃឈើចំណុចអូរយ៉ូយ៉ា ឬដីក្រួសក្រហម បានកើតឡើងតាំងពីឆ្នាំ ២០១៨ មកម្ល៉េះ ហើយក៏បានឃើញមន្រ្តីជំនាញចុះបង្រ្កាបជាច្រើនលើកហើយដែរ។ ប៉ុន្ដែ ពលរដ្ឋមួយចំនួនតូចនៅតែបន្តល្មើស លួចចូលទៅទន្ទ្រាននៅពេលគ្មានសមត្ថកិច្ចនៅយាម ពិសេសពេលសមត្ថកិច្ចកំពុងរវល់ដោះស្រាយបញ្ហាកូវីដ១៩។
ពលរដ្ឋរូបនេះថា៖«ដីព្រៃដែលពលរដ្ឋទន្រ្ទាន គឺពួកគាត់បានលក់ទៅឈ្មួញអស់ហើយ ដោយពួកគាត់ធ្វើជារូបភាពមកធ្វើជាខ្វះខាតដីធ្វើស្រែចម្ការ តាមពិតពួកគាត់ចាំដីឱ្យគេជាថ្នូរនឹងយកថវិកា ១ លានរៀល និងអង្ករមួយបាវប្រចាំខែពីឈ្មួញដែលទិញដីនោះ»។
បើតាមលោក សុខនីម អយ្យការអមសាលាដំបូងខេត្ត និងមន្រ្តីសមត្ថកិច្ចជំនាញ កំពុងពិនិត្យស្រាវជ្រាវទីតាំងផ្សេងទៀតដែលមានករណីទន្រ្ទាននេះ និងស្វែងរកមេខ្លោងផងដែរ។
លោកបន្តថាក្រោយការចុះរុះរើខ្ទមនេះមន្រ្ដីជំនាញបានឱ្យពលរដ្ឋ ចុះកិច្ចសន្យា បញ្ឈប់សកម្មភាពល្មើសបន្តទៀត។ ក្រុមពលរដ្ឋ ដែលមកសង់ខ្ទមចាំដីនោះ ក៏ទទួលស្គាល់ពីកំហុស និងយល់ព្រម ចុះរុះរើចេញ និងសន្យាបញ្ឈប់សកម្មភាពដែរ៕
វីដេអូ៖
