ភ្នំពេញៈ ក្រសួងធនធានទឹក និងឧតុនិយម ប្រកាសនៅថ្ងៃទី ៣ ខែកញ្ញា នេះថា បណ្តារាជធានី-ខេត្ត នៅតំបន់វាលទំនាប និងតំបន់មាត់សមុទ្រ នឹងប្រឈមបាតុភូតផ្គរ រន្ទះ មានពពកច្រើន មានភ្លៀងដែលអាចបណ្តាលឱ្យមានទឹកជំនន់ ខណៈនៅតាមបណ្តាកោះអាចប្រឈមទៅនឹងបាតុភូតរលកព្យុះសមុទ្រចន្លោះពីថ្ងៃទី ៦ ដល់ថ្ងៃទី ១១ ខែកញ្ញា។
យោងតាមសេចក្តីជូនដំណឹងរបស់ក្រសួងធនធានទឹក ដែល ភ្នំពេញ ប៉ុស្តិ៍ ទទួលបាននៅថ្ងៃនេះ បានឱ្យដឹងថា បន្ទាប់ពីបានធ្វើការពិនិត្យ និងតាមដានជាប្រចាំ លើស្ថានភាពអាកាសធាតុរួចមក ក្រសួងកត់សម្គាល់ឃើញថា ចាប់ពីថ្ងៃទី ៦ ដល់ថ្ងៃទី ១១ ខែកញ្ញានេះ អាកាសធាតុក្នុងព្រះរាជាណាចក្រកម្ពុជាមានលក្ខណៈប្រែប្រួល ដែលទាមទារឱ្យមានការប្រុងប្រយ័ត្ន។
ក្រសួងនេះបញ្ជាក់ថា កម្ពុជានឹងមានឥទ្ធិពលកើតឡើងបួនស្របគ្នានោះគឺ ជ្រលងសម្ពាធទាបឥណ្ឌា ប្រព័ន្ធសម្ពាធទាប (ITCZ) អូសកាត់លើកម្ពុជា សម្ពាធទាប ១០០៦ ហិតូប៉ាស្កាល់ នៅចំពីលើ និងខ្យល់សមុទ្រ Breeze និងចូលមកលើផ្ទៃដីបង្កើតជាពពកក្រាស់ៗ។
លក្ខណៈបែបនេះ ធ្វើឱ្យអាកាសធាតុ នៅព្រះរាជាណាចក្រកម្ពុជា ជាពិសេសនៅតំបន់វាលទំនាប នឹងមានផ្ទៃមេឃអួរអាប់ មានពពកច្រើនមានភ្លៀង ផ្គរ រន្ទះ ផ្លេកបន្ទោរ ក្នុងកម្រិតពីបង្គួរទៅខ្លាំង និងអាចប្រឈមនឹងជំនន់ទឹកភ្លៀង Flash Floods នៅខេត្តបាត់ដំបង ខេត្តពោធិ៍សាត់ ខេត្តកំពង់ធំ កំពង់ឆ្នាំង កំពង់ស្ពឺ កណ្តាល និងរាជធានីភ្នំពេញ។
ចំណែកបណ្តាខេត្តនៅតំបន់តាមតំបន់ខ្ពង់រាបជួរភ្នំដងរែក និងជួរភ្នំក្រវាញ នឹងមានផ្ទៃមេឃអួរអាប់មានពពកច្រើន មានអ័ព្ទផ្សែង មានភ្លៀង ផ្គរ រន្ទះ ផ្លេកបន្ទោរក្នុងកម្រិតពីបង្គួរទៅច្រើនរាយប៉ាយស្ទើរគ្រប់ទីកន្លែង។
ដោយឡែកនៅតំបន់មាត់សមុទ្រ និងផ្ទៃសមុទ្រ នឹងមានមេឃអាប់អួរ មានពពកច្រើន អ័ព្ទផ្សែង មានភ្លៀងផ្គរ រន្ទះ ផ្លេកបន្ទោរក្នុងកម្រិតពីបង្គួរទៅខ្លាំង និងមានខ្យល់កន្ត្រាក់ មានល្បឿនមធ្យមជាមួយរលកសមុទ្រមានកម្ពស់មធ្យម។ អាចប្រឈមនឹងជំនន់ទឹកភ្លៀង នៅខេត្តកោះកុង និងខេត្តព្រះសីហនុ។
ដោយឡែក នៅតាមបណ្តាកោះអាចប្រឈមទៅនឹងបាតុភូតរលកព្យុះសមុទ្រ Storm Surge ខណៈស្ថានភាពនៃទឹកទន្លេមេគង្គ បន្តឡើងជាបន្តបន្ទាប់។
ក្នុងសេចក្តីជូនដំណឹងក្រសួងធនធានទឹកសរសេរថា៖ «អាស្រ័យស្ថានភាពដូចបានជម្រាបជូនខាងលើ សាធារណជន និងប្រជានេសាទ អ្នកដំណើរទាំងអស់ មានការប្រុងប្រយ័ត្នពីការប្រែប្រួលអាកាសធាតុ ដែលនឹងអាចកើតមានឡើងជាយថាហេតុ»៕
វីដេអូ៖