.jpg)
ក្រសួងសុខាភិបាល ប្រកាសហាមឃាត់គណនីបណ្តាញសង្គមហ្វេសប៊ុក ឈ្មោះ Ly beauty & Health store ឱ្យបញ្ឈប់ការចែកចាយ ផលិតផលឈ្មោះ Ostelin Kids Calcium & Vitamin D3 និងផលិតផលបំប៉នសុខភាព គ្មានលេខបញ្ជិកាផ្សេងៗទៀតជាបន្ទាន់។
ភ្នំពេញៈ ក្រសួងសុខាភិបាល ប្រកាសហាមឃាត់គណនីបណ្តាញសង្គមហ្វេសប៊ុក ឈ្មោះ Ly beauty & Health store ឱ្យបញ្ឈប់ការចែកចាយ ផលិតផលឈ្មោះ Ostelin Kids Calcium & Vitamin D3 និងផលិតផលបំប៉នសុខភាព គ្មានលេខបញ្ជិកាផ្សេងៗទៀតជាបន្ទាន់។
ការប្រកាសនេះធ្វើឡើងបន្ទាប់ពី ក្រសួងសុខាភិបាល បានពិនិត្យឃើញបណ្តាញសង្គមហ្វេសប៊ុក មានគណនីឈ្មោះ Ly Beauty and Health store កំពុងផ្សព្វផ្សាយលក់ផលិតផលបំប៉នសុខភាពឈ្មោះ Ostelin Kids Calcium & Vitamin D3 និងផលិតផលបំប៉នសុខភាពផ្សេងៗទៀត គ្មានលេខបញ្ជិកាពីក្រសួងសុខាភិបាល គិតត្រឹមថ្ងៃទី ២៤ ខែសីហា ឆ្នាំ២០២១ ។
លិខិតប្រកាសរបស់ក្រសួងសុខាភិបាល នៅថ្ងៃទី២ ខែកញ្ញា ដែលភ្នំពេញប៉ុស្តិ៍ទទួលបាននៅថ្ងៃនេះ បានឱ្យដឹងថា ក្រសួងសុខាភិបាលតម្រូវឱ្យម្ចាស់គណនីបណ្តាញសង្គមហ្វេសប៊ុកខាងលើ និងជនពាក់ព័ន្ធដទៃទៀត ត្រូវបញ្ឈប់ការនាំចូល ចែកចាយ ឬផ្សព្វផ្សាយលក់ ផលិតផល ឈ្មោះ Ostelin Kids Calcium & Vitamin D3 និងផលិតផលបំប៉នសុខភាព គ្មានលេខបញ្ជិកាផ្សេងៗទៀត ជាបន្ទាន់។
ក្នុងលិខិតនោះសរសេរថា «ក្រសួងសុខាភិបាល និងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីខាងលើ និងជនពាក់ព័ន្ធទាំងឡាយណា ដែលនាំចូលចែកចាយ ឬផ្សព្វផ្សាយលក់ ផលិតផលឈ្មោះ Ostelin Kids Calcium & Vitamin D3 និងផលិតផលបំប៉នសុខភាពគ្មានលេខបញ្ជិកាផ្សេងៗទៀត ទៅតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន»។
លិខិតរបស់ក្រសួងសុខាភិបាលបន្តទៀតថា អនុលោមតាមច្បាប់ ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ ស្តីពីការគ្រប់គ្រងឱសថ តម្រូវឱ្យរាល់ការចរាចរណ៍ផលិតផលឱសថ ឬផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខទិដ្ឋាការ ឬលេខបញ្ជិកាពីក្រសួងសុខាភិបាល។
ដូចច្នេះ សូមប្រជាពលរដ្ឋមុននឹងទិញ ផលិតផលឱសថ ឬផលិតផលបំប៉នសុខភាពគ្រប់ប្រភេទ សូមពិនិត្យមើលលតាបត្របញ្ជិកាដែលមានបិទលើសម្បកវេចខ្ចប់ ហើយលតាបត្រដែលត្រឹមត្រូវគឺមានពីរផ្នែក ទី១គឺ ផ្នែកខាងលើមានឈ្មោះ គ្រឹះស្ថានអាហរ័ណ នីហរ័ណ ឱសថ ទី២ គឺ ផ្នែកខាងក្រោមមានលេខទិដ្ឋាការ ឬបញ្ជិកា។
ក្រសួងសុខាភិបាលបញ្ជាក់ក្នុងលិខិតថា៖ «សូមជូនដំណឹងដល់បងប្អូន ប្រជាពលរដ្ឋទាំងអស់ឈប់ជឿការផ្សព្វផ្សាយផលិតផល ឈ្មោះ Ostelin Kids Calcium & Vitamin D3 និងផលិតផលបំប៉នសុខភាពគ្មានលេខបញ្ជិកាផ្សេងៗទៀត តាមគណនី បណ្តាញសង្គមហ្វេសប៊ុកខាងលើ និងឈប់ប្រើប្រាស់ ផលិតផលបំប៉នសុខភាពគ្មានលេខបញ្ជិកាខាងលើជាបន្តទៀត»។
ករណីបងប្អូនប្រជាពលរដ្ឋបានជួបប្រទះឃើញជនណាកំពុងចែកចាយ ឬលក់ផលិតផល Ostelin Kids Calcium & Vitamin D3 និងផលិតផលបំប៉នសុខភាពគ្មានលេខបញ្ជិកាផ្សេងៗទៀត ខាងលើ សូមបងប្អូន ប្រញាប់ផ្តល់ព័ត៌មាន ឬត្រូវការព័ត៌មាន បន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង សូមទំនាក់ទំនងលេខទូរស័ព្ទ ០១២ ៣៥៥ ១៦១, ០១១ ៥៧៥ ៧៨៧, ០១២ ៩៨៣ ៣៣៤, ០១៧ ៦០៦ ៦៧០, ០១២ ៦៥២ ៤៤៦, ០១៧ ៨៦៦ ៧៦០៕
