ភ្នំពេញៈ ក្នុងរយៈពេលមិនដល់មួយសប្តាហ៍ផង មនុស្សចំនួន ៧៣១ នាក់ បន្ថែមទៀត ត្រូវបានរកឃើញមានវិជ្ជមានវីរុសកូវីដ១៩បំប្លែងថ្មីប្រភេទដែលតា (Delta) ដែលធ្វើឱ្យប្រទេសកម្ពុជាមានអ្នកឆ្លងជំងឺកូវីដ ១៩ ប្រភេទថ្មីនេះកើនឡើងជាង ២ ០០០ នាក់ នៅក្នុង រាជធានី-ខេត្ត ចំនួន ២៣ លើកលែងតែខេត្តចំនួន ២ ប៉ុណ្ណោះ ដែលមិនទាន់មានឆ្លងករណីដែលតា គឺ ខេត្តកែប និងខេត្តក្រចេះ។
លោកស្រី ឱ វណ្ណឌីន អ្នកនាំ ពាក្យក្រសួងសុខាភិបាល បានចេញសេចក្តីជូនព័ត៌មានមួយនារសៀលថ្ងៃទី ០៥ ខែកញ្ញានេះថា យោងលទ្ធផលនៃការធ្វើវិភាគដោយវិទ្យាស្ថានប៉ាស្ទ័រកម្ពុជា និងវិទ្យាស្ថានស្រាវជ្រាវសុខភាពសាធារណៈ បានរកឃើញករណីឆ្លងវីរុសកូវីដ ១៩ បំប្លែងថ្មីប្រភេទដែលតាសរុបចំនួន ២ ៦៤៧ នាក់ ដែលគិតចាប់ពីចុងខែមីនា ដល់ថ្ងៃទី ០៤ ខែកញ្ញា។
លោកស្រីបានឱ្យដឹងថា៖ «វីរុសនេះត្រូវបានរកឃើញលើអ្នកដំណើរមកពីបរទេសតាមជើងហោះហើរ ពលករខ្មែរត្រលប់ពីប្រទេសថៃ ពីប្រទេសវៀតណាម ប្រជាជនអ្នកភូមិនៅក្នុងសហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជន អ្នកបកប្រែ ភាសា ជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ ដូនជីនៅវត្ត និងសិស្ស»។
រាជធានី-ខេត្ត ទាំង ២៣ ដែលរកឃើញមានករណីវីរុសប្រភេទដែលតានេះ មាននៅរាជធានីភ្នំពេញច្រើនជាងគេ រហូតដល់ ៩១៤ នាក់ ខេត្តឧត្តរមានជ័យចំនួន ២៤៥ នាក់ សៀមរាប ២០៧ នាក់ បន្ទាយមានជ័យ ៥២៦នាក់ប៉ៃលិន ២៧ នាក់ ព្រះវិហារ ១០៨ នាក់ បាត់ដំបង ៦៦ នាក់ ស្វាយរៀង ៥៣ នាក់ កំពង់ធំ ៥២ នាក់ ត្បូងឃ្មុំ ៣៣ នាក់ កំពង់ចាម ៥១ នាក់រតនគិរី ១០ នាក់ កំពង់ស្ពឺ ១៤ នាក់ កណ្តាល ១០២ នាក់ ព្រៃវែង ៤ នាក់ កំពត ៣ នាក់ ស្ទឹងត្រែង ១១៩ នាក់ កំពង់ឆ្នាំង ១៣ នាក់ ពោធិ៍សាត់ ២១ នាក់ កោះកុង ១០ នាក់ មណ្ឌលគិរី ៤៨ នាក់ ព្រះសីហនុ ៨ នាក់ និងខេត្តតាកែវ ចំនួន ១៣ នាក់។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង នៅតែបន្តអំពាវនាវដល់ប្រជាពលរដ្ឋទាំងអស់នៅទូទាំងប្រទេសកម្ពុជាបន្តប្រុងប្រយ័ត្នខ្ពស់ការពារខ្លួន និងកុំភ្លេចខ្លួនឲ្យសោះដោយត្រូវចេះផ្លាស់ប្តូរទម្លាប់រស់នៅធម្មតាជាមួយវីរុសកូវីដ ១៩ តាមបែបគន្លងប្រក្រតីភាពថ្មីក្នុងបរិបទប្រយុទ្ធនឹងជំងឺកូវីដ ១៩។
លោកថា៖ «ការចម្លងនាបច្ចុប្បន្ននេះមានសន្ទុះកើនឡើងលើយុវវ័យដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភ័ក្ត្រ។ ហេតុនេះសូមយុវវ័យគ្រប់រូបចូលរួមអនុវត្តនូវគោលការណ៍ណែនាំរបស់ក្រសួងសុខាភិបាលឱ្យបានហ្មត់ចត់ និងត្រឹមត្រូវលើវិធានការ ៣ការពារ និង ៣កុំ ដើម្បីការពារបុគ្គលខ្លួនឯង និងសមាជិកគ្រួសារ»៕
វីដេអូ៖