តាកែវៈ កម្លាំងនគរបាលនៃស្នងការដ្ឋាននគរបាលស្រុកគិរីវង់ បានចុះទៅកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់បានចំនួន ៥ ទីតាំង និងអាងស្តុបទឹកចំនួន ៣ អាង នៅចំណុចដុបភ្នំទទឹង ស្ថិតក្នុងភូមិសាស្ត្រ ឃុំគិរីចុង ស្រុកគិរីវង់។
លោកយុគ សារ៉ាត អធិការនគរបាល ស្រុកគិរីវង់ ថ្លែងប្រាប់ភ្នំពេញប៉ុស្ដិ៍នៅថ្ងៃទី ៥ ខែកញ្ញាថា នៅថ្ងៃទី ៤ ខែកញ្ញា កម្លាំងនគរបាលបានបន្តឡើងលើភ្នំ ដើម្បីរុករកបង្ក្រាបបទល្មើស ដំណាំកញ្ឆាខុសច្បាប់ ដែលជនខិលខូចតែងតែលួចដាំក្នុងតំបន់នេះ។
លោកបានឱ្យដឹងថា៖ «ការអនុវត្ដបង្ក្រាបទីតាំងលួចដាំកញ្ឆានេះ គឺអនុវត្តន៍តាមការណែនាំ និងបទបញ្ជាដឹកនាំរបស់លោក សុខ សំណាង ស្នងការនៃស្នងការដ្ឋាននគរបាលខេត្តតាកែវ ឱ្យបន្តការចុះជាប្រចាំ ក្នុងការបង្ការទប់ស្កាត់បង្ក្រាបបទល្មើសដំណាំកញ្ឆាខុសច្បាប់ឲ្យដូចភ្លៀងរលឹម និងជាពិសេសអនុវត្តន៍គោលនយោបាយភូមិឃុំមានសុវត្ថិភាព»។
លោកឱ្យដឹងថា កម្លាំងជំនាញអធិការដ្ឋាននគរបាលស្រុក បានសហការជាមួយកម្លាំងប៉ុស្តិ៍នគរបាលរដ្ឋបាល បានឡើងលើភ្នំដើម្បីរុករក និងកាប់ដុតបំផ្លាញដំណាំកញ្ឆា ដែលជនខិលខូចលួចដាំខុសច្បាប់បានចំនួន ៥ ទីតាំង អាងស្តុបទឹកចំនួន ៣ អាង នៅចំណុចដុបភ្នំទទឹង ស្ថិតក្នុងភូមិសាស្ត្រ ឃុំគិរីចុងកោះ ស្រុកគិរីវង់ ដែលមានផ្ទៃដីដាំដុះប្រមាណ ៩៨៤ ម៉ែត្រការ៉េ។
លោកថ្លែងថា៖ «បច្ចុប្បន្នកម្លាំងជំនាញកំពុងស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខាងលើ ដើម្បីយកមកផ្តន្ទាទោសតាមផ្លូវច្បាប់»។
លោក លី សាវេត អ្នកនាំពាក្យរដ្ឋបាលខេត្ដតាកែវ ថ្លែងនៅថ្ងៃទី ៥ កញ្ញាថា សកម្មភាពជនខិលខូចលួចដាំ កញ្ជា តែងតែកើតមានឡើង ពី ៣ ទៅ ៤ លើកក្នុង ១ ឆ្នាំៗនៅក្នុងភូមិសាស្ដ្រខេត្ដតាកែវ។ ជនខិលខូចលួចដាំកញ្ឆានេះ នៅតាមទីតាំងចន្លោះភ្នំ ព្រោះអំណោយផលចំពោះការលូតលាស់។ ប៉ុន្ដែជាភូមិសាស្ដ្រពិបាកស្វែងរក និងបង្ក្រាបសម្រាប់កងកម្លាំងសមត្ថកិច្ច។
លោកថ្លែងថា៖«អ្នកដាំដំណាំកញ្ឆា ភាគច្រើនជាពលរដ្ឋក្រីក្រ ពួកគាត់លួចដាំ ដើម្បីយកទៅធ្វើជាកញ្ឆាគ្រាម រួចលក់បន្តទៅឱ្យឈ្នួញ។ ក្រោយបង្ក្រាបបាន សមត្ថកិច្ចយើងបានឱ្យពលរដ្ឋធ្វើកិច្ចសន្យាបញ្ឈប់សកម្មភាព។ យើងមិនបានដាក់ទោសទណ្ឌធ្ងន់ធ្ងរដល់ពួកគាត់ទេ ព្រោះមិនមែនជាការប្រព្រឹត្តទ្រង់ទ្រាយធំ»។
បើតាមលោក សាវេត មូលហេតុដែលពលរដ្ឋបន្តលួចដាំដំណាំកញ្ឆានេះ ដោយសារយកទៅលក់ឱ្យឈ្នួញបានតម្លៃថ្លៃ ដូច្នេះទើបពួកគាត់ ប្រថុយដាំ ទោះបីជាសមត្ថកិច្ចចុះទៅបង្ក្រាប និងឱ្យធ្វើកិច្ចសន្យាជាបន្តបន្ទាប់ក៏ដោយ៕