.jpg)
ជនសង្ស័យត្រូវបានចាប់ខ្លួន នាថ្ងៃទី ៤ កញ្ញា ពីបទរួមភេទជាមួយក្មេងស្រីអាយុក្រោម ១៥ ឆ្នាំ នៅខេត្តបាត់ដំបង។ រូបថត ប៉ូលិស
បាត់ដំបងៈ បុរសសង្ស័យចំនួន ២ នាក់ត្រូវបានសមត្ថកិច្ចនគរបាលបញ្ជូនទៅសាលាដំបូងខេត្តបាត់ដំបង ពាក់ព័ន្ធនឹងករណីរួមភេទជាមួយក្មេងស្រី ២ នាក់អាយុក្រោម ១៥ ឆ្នាំ នៅឃុំតាម៉ឺន ស្រុកថ្មគោល ក្រោយពីចាប់ខ្លួនបាន ១ ថ្ងៃ។
លោកស្រី រស់ ជីវី ស្នងការរងទទួលផែននគរបាលប្រឆាំងការជួញដូរមនុស្ស និងការពារអនីតិជនខេត្តបាត់ដំបងប្រាប់ភ្នំពេញប៉ុស្តិ៍ នៅថ្ងៃទី ៥ កញ្ញាថាជនសង្ស័យឈ្មោះ ឡុង ថាវ ភេទប្រុស អាយុ ២២ ឆ្នាំ និងឈ្មោះ រ៉េន ចន្ទ្រា ហៅ បារាំង ភេទប្រុស អាយុ ២២ ឆ្នាំ។ ជនទាំង២នាក់ រស់នៅភូមិសំរោង ឃុំតាម៉ឺន ស្រុកថ្មគោល ខេត្តបាត់ដំបង រស់នៅភូមិសំរោង ឃុំតាម៉ឺន ស្រុកថ្មគោល ខេត្តបាត់ដំបង។ ពួកគេត្រូវបានមន្រ្តីនគរបាលជំនាញបញ្ជូនទៅសាលាដំបូងខេត្តបាត់ដំបងហើយ នៅវេលាថ្ងៃត្រង់ថ្ងៃទី ៥ កញ្ញា បន្ទាប់ពីបញ្ជូនមកពីស្រុកថ្មគោល។
លោកស្រីថ្លែងថា៖ «ជនទាំង ២ នាក់នេះជាប់ពាក់ព័ន្ធរួមភេទជាមួយអនីតិជនក្រោមអាយុ ១៥ ឆ្នាំ»។
លោក សេង លុច អធិការនគរបាលស្រុកថ្មគោលប្រាប់នៅថ្ងៃទី ៥ កញ្ញា ថា ចំពោះក្មេងស្រីរងគ្រោះឈ្មោះ រ.ស. អាយុ ១១ ឆ្នាំ និងក្មេងស្រីម្នាក់ទៀតឈ្មោះ វ.ត. អាយុ ១៣ ឆ្នាំ។ ពួកគេរស់នៅក្នុងឃុំតាម៉ឺន ស្រុកថ្មគោលខេត្តដំបង។
លោកប្រាប់តាមសម្តីស្រ្តី ២ រូប ដែលត្រូវជាម្តាយរបស់ក្មេងស្រីទាំង ២ នាក់ថា ជនល្មើសទាំង ២ នាក់រស់នៅឃុំមោង ស្រុកមោងឫស្សី ខេត្តបាត់ដំបង។ នៅមុនថ្ងៃបង្កហេតុ ប្រហែលកន្លះខែ ជនសង្ស័យទាំង ២ នាក់បានមកធ្វើជាកម្មករធ្វើផ្លូវនៅឃុំតាម៉ឺន ស្រុកថ្មគោល ហើយបានទាក់ទងស្គាល់ក្មេងស្រីម្នាក់មួយ។ លោកបន្តថា បន្ទាប់ពីពួកគេទំនាក់ទំនងស្គាល់គ្នាហើយ ជនសង្ស័យតែងបបួលក្មេងស្រីដើរលេង ដែលពេលខ្លះទៅបាត់ពីផ្ទះផង។ ទោះជាយ៉ាងណាស្រ្តីជាម្តាយទាំង ២ រូប ក៏មិនសូវចាប់អារម្មណ៍ ព្រោះកូនៗ (ក្មេងរងគ្រោះ) ប្រាប់ថា ទៅលេងផ្ទះបងប្អូន។
លោកអធិការបញ្ជាក់ថានៅថ្ងៃទី ៤ កញ្ញា ក្មេងស្រីរងគ្រោះបានដើរបាត់ពីផ្ទះហើយម្តាយរបស់ពួកគេនាំគ្នាដើររកមិនឃើញ។ ពេលនោះអ្នកភូមិប្រាប់ថា គេឃើញក្មេងស្រីរងគ្រោះទាំង ២ នាក់ត្រូវបានក្រុមជនសង្ស័យឌុបតាមម៉ូតូ។ ក្រោយពីដឹងរឿង ស្ត្រីជាម្តាយទាំង ២រូប របស់ក្មេងស្រីរងគ្រោះក៏ដាក់ពាក្យបណ្តឹងនៅប៉ុស្តិ៍នគរបាលឃុំតាម៉ឺន ស្រុកថ្មគោល ដើម្បីជួយអន្តរាគមន៍។
លោកប្រាប់ថា ក្រោយទទួលបានបណ្តឹងភ្លាម កម្លាំងនគរបាលប៉ុស្តិ៍បានចេញស្រាវជ្រាវរកនៅតាមគោលដៅ ដែលពលរដ្ឋបានផ្តល់ឱ្យ។ រយៈពេលប៉ុន្មានម៉ោងក្រោយមក សមត្ថកិច្ចក៏ឃាត់ខ្លួនជនសង្ស័យទាំង ២ នាក់បាននៅតាមផ្លូវ និងយកមកសាកសួរនៅប៉ុស្តិ៍នគរបាលឃុំតាម៉ឺន។ក្រុមជនសង្ស័យបានឆ្លើយសារភាពថា ពួកគេពិតជាបានរួមភេទជាមួយជនរងគ្រោះមែន។
លោកថ្លែងថា៖«ក្មេងស្រីរងគ្រោះប្រាប់មន្រ្តីសមត្ថកិច្ចខ្ញុំថា ពួកគេស្គាល់គ្នា និងព្រមព្រៀងជាមួយគ្នាទេ។ តែយ៉ាងណា បើមានបណ្តឹងយើងត្រូវតែអនុវត្តតាមបណ្តឹងនោះ»។
អ្នកនាំពាក្យអយ្យការសាលាដំបូងខេត្តបាត់ដំបង លោក ដួង សារ៉ន មិនអាចសុំអត្ថាធិប្បាយបានទេ កាលពីថ្ងៃទី ៥ កញ្ញា៕
