ភ្នំពេញៈ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ (គ.អ.ក) ប្រកាសនៅព្រឹកថ្ងៃទី ៦ កញ្ញានេះថា សមត្ថកិច្ចបានឃាត់មនុស្សធ្វើការអប់រំ និងពិន័យចំនួន ៤៩ នាក់ បញ្ជូនទៅតុលាការ ១ នាក់ ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល នៅថ្ងៃទី ៥ កញ្ញា។
តាមសេចក្តីជូនដំណឹង (គ.អ.ក) បានឲ្យដឹងថា នៅថ្ងៃទី ៥ ខែកញ្ញា មិនមានយានយន្តល្មើសវិធានការដែលត្រូវចាប់ឃាត់នោះទេ ប៉ុន្តែសមត្ថកិច្ច បានឃាត់ខ្លួនមនុស្សធ្វើការអប់រំ និងពិន័យចំនួន ៤៩ នាក់ បញ្ជូនទៅតុលាការចំនួន ១ នាក់ ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ ១៩។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ២៥ ករណី និងផ្សព្វផ្សាយច្បាប់ទៅលើទីតាំងសរុបចំនួន ៤៨០ និងពិន័យជាប្រាក់បានចំនួន ៨០ ៤០០ ០០០ រៀល៕