ភ្នំពេញៈ មនុស្សចំនួន ១៣ នាក់បន្ថែមទៀត បានស្លាប់ដោយសារជំងឺកូវីដ ១៩ និងបានរកឃើញអ្នកឆ្លងថ្មីជាង ៥០០ នាក់ និងមានអ្នកជាសះស្បើយជាង ៤០០ នាក់។ នេះបើតាមក្រសួងសុខាភិបាល នាថ្ងៃទី៦ ខែកញ្ញានេះ។
សេចក្តីប្រកាសរបស់ក្រសួងសុខាភិបាល បានឱ្យដឹងថា ក្រសួងបានរកឃើញអ្នកមានវិជ្ជមានវីរុសកូវីដ ១៩ បន្ថែមទៀតចំនួន ៥២៨ នាក់ និងអ្នកដែលត្រូវបានព្យាបាលជាសះស្បើយចំនួន ៤៤៧ នាក់។ អ្នកដែលរកឃើញឆ្លងថ្មីនេះមានករណីឆ្លងសហគមន៍ចំនួន ៣៤០ នាក់ និងអ្នកដំណើរមកពីបរទេសចំនួន ១៨៨ នាក់។
គិតត្រឹមព្រឹកថ្ងៃទី ៦ ខែកញ្ញា ឆ្នាំ ២០២១ ប្រទេសកម្ពុជា មានអ្នកឆ្លងវីរុសកូវីដ ១៩ សរុប ចំនួន ៩៥ ៨២៨ នាក់ អ្នកជាសះស្បើយសរុបចំនួន ៩១ ១៣១ នាក់ និងអ្នកស្លាប់បានកើនឡើងចំនួន ១ ៩៧០ នាក់។
លោក ទៀ បាញ់ រដ្ឋមន្រ្តីក្រសួងការពារជាតិ នៅព្រឹកថ្ងៃទី ៦ ខែកញ្ញានេះ បានសរសេរលើបណ្តាញសង្គមហ្វេសប៊ុករបស់លោកថា អត្រាចម្លងជំងឺកូវីដ ១៩ បានថយចុះគួរឱ្យកត់សម្គាល់។ ប៉ុន្តែទោះជាយ៉ាងនេះក្តី លោកបានបន្តធ្វើការអំពាវនាវដល់ប្រជាពលរដ្ឋទាំងអស់បន្តរក្សាការប្រុងប្រយ័ត្នខ្ពស់ និងអនុវត្តឱ្យបានម៉ឺងម៉ាត់បំផុតនូវវិធានការ «៣ ការពារ ៣ កុំ» ដើម្បីរួមគ្នាលុបបំបាត់ការចម្លងជំងឺដ៏កាចសាហាវនេះ៕