ភ្នំពេញៈ អាជ្ញាធរក្រុងប៉ោយប៉ែត នៃខេត្តបន្ទាយមានជ័យ បាននិយាយនៅថ្ងៃចន្ទនេះថា ស្ថានភាពជំនន់ទឹកភ្លៀងនៅតំបន់ទីទំនាបជាប់មាត់អូរព្រំដែន នៅមិនទាន់ថមថយនៅឡើយទេ ខណៈផ្ទៃមេឃអាប់អួ និងបន្តមានភ្លៀងធ្លាក់ក្នុងកម្រិតពីតិចទៅច្រើន។
លោក គាត ហ៊ុល អភិបាលក្រុងប៉ោយប៉ែត ប្រាប់ ភ្នំពេញ ប៉ុស្តិ៍ថា គិតត្រឹមថ្ងៃទី ៦ ខែ កញ្ញា ឆ្នាំ ២០២១ នេះ ជំនន់ទឹកភ្លៀង បានជន់លិចចូលដល់លំនៅឋានប្រជាពលរដ្ឋក្នុងភូមិស្ទឹងបត់ នៃសង្កាត់ផ្សារកណ្ដាលចំនួន ១៦ ខ្នងផ្ទះ។ ប៉ុន្តែវានៅមិនទាន់ដល់កម្រិតដែលត្រូវព្រួយបារម្ភ ឬជម្លៀសពលរដ្ឋទៅកាន់ទីទួលសុវត្ថិភាពនៅឡើយទេ។
លោកបញ្ជាក់ថា៖ «នៅពេលនេះ ទឹកទើបតែជន់លិចត្រឹមស្មងជើងប៉ុណ្ណោះ។ ទោះយ៉ាងណា យើងបានត្រៀមកម្លាំង និងមធ្យោបាយសម្រាប់ការជួយអន្តរាគមន៍សង្គ្រោះពលរដ្ឋរងគ្រោះរួចរាល់ហើយ និងបានរៀបចំឧបករណ៍វាស់ស្ទង់កម្ពស់ទឹក និងផ្ដល់សញ្ញាគ្រោះអាសន្ននៅក្នុងតំបន់នោះរួចរាល់ដើម្បីឱ្យពលរដ្ឋបានដឹងជាមុនផងដែរ»។
លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយប្រាប់ ភ្នំពេញ ប៉ុស្តិ៍ថា នៅពេលនេះ ស្ថានភាពគ្រោះជំនន់ទឹកភ្លៀងមិនទាន់បង្កឱ្យមានក្ដីព្រួយកង្វល់ឡើយ។ ព្រោះនៅពេលនេះទឹកមិនហូរចាក់បំពេញបឹង ស្ទឹង ព្រែក និងអាងស្តុកទឹកនៅឡើយ ហើយនៅតាមវាលស្រែរបស់ប្រជាកសិករក្នុងតំបន់មួយចំនួន ក៏មិនទាន់មានទឹកដក់នៅឡើយដែរ។
លោកបានថ្លែងថា៖ «ជាការពិត ចាប់ពីចុងខែសីហាមកទល់ពេលនេះ ភ្លៀងបានធ្លាក់ជាបន្តបន្ទាប់ ក្នុងកម្រិតពីបង្គួរទៅខ្លាំង បានបង្កជាជំនន់ទឹកភ្លៀងនៅតាមផ្នែកខ្លះនៃខេត្តជាប់មាត់សមុទ្រ និងខេត្តភាគពាយព្យនៃប្រទេសកម្ពុជា។ ប៉ុន្តែមិនទាន់បង្កឱ្យមានក្ដីព្រួយបារម្ភនោះទេ»។
ទោះយ៉ាងណា ប្រជាពលរដ្ឋ ដែលរស់នៅតាមតំបន់ទីទំនាបជាប់មាត់ទឹក ឬតំបន់ផ្ទៃរងទឹកភ្លៀង ដែលងាយរងគ្រោះដោយជំនន់ទឹកភ្លៀង គប្បីបង្កើនការប្រុងប្រយ័ត្ន និងត្រូវយកចិត្តទុកដាក់អំពីសុវត្ថិភាពសមាជិកក្រុមគ្រួសាររបស់ខ្លួន។ ជាពិសេស កុមារតូចៗ និងចាស់ជរាធ្វើយ៉ាងណាកុំទុកពួកគាត់ឱ្យនៅតែឯង។
កាលពីថ្ងៃសុក្រសប្ដាហ៍មុន ក្រសួងធនធានទឹក និងឧតុនិយម បានព្យាករថា ភ្លៀងនឹងបន្តធ្លាក់ក្នុងកម្រិតពីបង្គួរទៅខ្លាំង ពេញ ១ សប្ដហ៍នេះ ក្នុងក្របខ័ណ្ឌទូទាំងប្រទេស ដែលអាចបង្កជាជំនន់ទឹកភ្លៀងនៅផ្នែកខ្លះនៃរាជធានីភ្នំពេញ និងបណ្ដាខេត្តមួយចំនួនទៀត ដែលស្ថិតនៅតាមតំបន់វាលទំនាបកណ្ដាលជាប់បឹងទន្លេសាប ជួរភ្នំក្រវាញ និងមាត់សមុទ្រ។
តាមរយៈការព្យាករនេះ អាជ្ញាធរនៃបណ្ដាខេត្តមួយចំនួនក៏បានចាត់វិធានការកាយប្រឡាយ និងកាត់ផ្ដាច់ផ្លូវទំនប់មួយចំនួន ដើម្បីបង្ការការជន់លិចផ្លូវ និងលំនៅឋានប្រជាពលរដ្ឋផងដែរ៕