The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋបាល​ខេត្តសៀមរាប​ដាក់​ផែនការ​ ដើម្បី​អភិវឌ្ឍ​ប្រឡាយ​ជើង​ក្អែប​ឱ្យបាន​កាន់តែ​ច្រើន




រដ្ឋបាល​ខេត្តសៀមរាប​ដាក់​ផែនការ​ ដើម្បី​អភិវឌ្ឍ​ប្រឡាយ​ជើង​ក្អែប​ឱ្យបាន​កាន់តែ​ច្រើន

Content image - Phnom Penh Post
អាជ្ញាធរ​ចុះ​ពិនិត្យ​ប្រឡាយទឹក​ក្នុង​ស្រុក​ជីក្រែង​ពីថ្ងៃ​ ៥ ​កញ្ញា​។ រូប រដ្ឋបាលខេត្ត

រដ្ឋបាល​ខេត្តសៀមរាប​ដាក់​ផែនការ​ ដើម្បី​អភិវឌ្ឍ​ប្រឡាយ​ជើង​ក្អែប​ឱ្យបាន​កាន់តែ​ច្រើន

សៀមរាបៈ រដ្ឋបាល​ខេត្តសៀមរាប​បានដាក់​ចេញ​ផែនការ​ ដើម្បី​អភិវឌ្ឍ​ប្រឡាយ​ជើង​ក្អែប​ (​ប្រឡាយ​នាំ​ទឹក​) ឱ្យបាន​កាន់តែ​ច្រើន​ចេញពី​ប្រឡាយមេ ដែល​ហូរ​ចេញពី​អាង​ស្តុក​ទឹក​ចំនួន ៣ គឺ​អាង​ទំនប់​ម្កាក់ អាង​ទំនប់​ក្សាម និង​ទំនប់​ ៧៨ ស្ថិតនៅ​ក្នុងស្រុក​ជីក្រែង ដើម្បី​ពង្រីក​ការស្រោចស្រព​ដីស្រែ​របស់​ប្រជាកសិករ​ឱ្យ​បាន​កាន់តែច្រើន​។

លោក ស៊ុន ចំណាន អ្នកនាំពាក្យ​រដ្ឋបាល​ខេត្តសៀមរាប​ប្រាប់​ ភ្នំពេញ ​ប៉ុស្តិ៍​ នៅ​ថ្ងៃទី ៥ សីហា​ថា នៅ​តំបន់​នេះ​មាន​ការខ្វះខាត​ទឹក ដែល​ទាមទារ​ឱ្យ​រដ្ឋបាលខេត្ត និង​មន្ត្រី​ពាក់ព័ន្ធ​គិតគូរ​រៀបចំ​អភិវឌ្ឍ និង​កសាង​ប្រឡាយ​ជើង​ក្អែប​ (​ប្រឡាយ​នាំ​ទឹក​) ​បន្ថែមទៀត ដើម្បី​បង្ហូរទឹក​ផ្តល់ឱ្យ​ពលរដ្ឋ ដែល​ធ្វើ​ស្រូវវស្សា និង​ស្រូវប្រាំង​មាន​លទ្ធភាព​ក្នុង​ការទទួល​បាន​ទឹក​យកទៅ​ប្រើប្រាស់​ក្នុង​ការស្រោចស្រព​គ្រប់គ្រាន់​។

លោក​ថ្លែងបន្តថា​៖ «​យើង​មាន​កន្លែង​ស្តុក​ទឹក​ហើយ យើង​សិក្សា​លើ​ប្រព័ន្ធ​ចែកចាយ ជាពិសេស​ប្រឡាយ​ជើង​ក្អែប យើង​មិនទាន់​មាន​គ្រប់គ្រាន់ យើង​ធ្វើការ​បែងចែក​ឱ្យ​បាន​ច្រើន ដល់​ប្រជាពលរដ្ឋ​ដើម្បី​ស្រោចស្រព​វិស័យ​កសិកម្ម​របស់គាត់​»​។

ពាក់ព័ន្ធ​នឹង​បញ្ហា​នេះ លោក នួន គ្រឹះស្នា ប្រធាន​មន្ទីរ​ធនធាន​ទឹក និង​ឧតុនិយម​ខេត្ត​សៀមរាប​ប្រាប់​ភ្នំពេញ​ប៉ុស្តិ៍​នៅ​ថ្ងៃ ​៥ កញ្ញា​ថា បច្ចុប្បន្ននេះ នៅតាម​ប្រឡាយ​មេ​គឺ​មាន​ប្រឡាយ​ជើង​ក្អែប​ខ្លះ​ហើយ​ ប៉ុន្តែ​មិនទាន់​គ្រប់គ្រាន់​នៅឡើយ​ដូច្នេះ​បាន​ជា​លោក​អភិបាលខេត្ត​ស្នើឱ្យ​សិក្សា​ និង​ពង្រីក​បន្ថែមទៀត ដើម្បី​នាំ​ទឹក​ពី​ប្រឡាយ​មេ​ពី​អាង​ស្តុក​ទឹក​ឱ្យ​ទៅ​ដល់​ស្រែ​របស់​ប្រជាពលរដ្ឋ​។

បច្ចុប្បន្ន ក្រុមការងារ​មន្ត្រី​នៃ​មន្ទីរ​ធនធាន​ទឹកបាន​អភិវឌ្ឍ​បណ្តើរៗ​ហើយ ប៉ុន្តែ​ដោយសារ​ខែវស្សា​មាន​ភ្លៀង​ធ្លាក់ ធ្វើឱ្យ​ពិបាក​ក្នុង​ការកសាង​ប្រឡាយ​ជើង​ក្អែប​នេះ​។ មន្ត្រី​​នៃ​មន្ទីរ​ធនធានទឹក​អាចធ្វើ ឬ​កសាង​ប្រឡាយ​ជើង​ក្អែប​នេះ​បាន​នៅក្នុង​អំឡុងពេល​រដូវប្រាំង​ដែល​អាច​ចាប់ផ្តើម​ធ្វើ​នៅក្នុង​​ខែធ្នូ និង​ខែមករា​ឡើងទៅ​។

ទោះជា​យ៉ាងណា លោក ថា លោក​ត្រូវការ​ពេលវេលា​ពិភាក្សា​ជាមួយ​នឹង​ប្រជាពលរដ្ឋ មេភូមិ និង​សហគមន៍ ដើម្បី​សាងសង់​ប្រឡាយ​ជើង​ក្អែប​នេះ ឱ្យ​ទៅ​ដល់​ដីស្រែ​របស់​ប្រជាពលរដ្ឋ​។ លោក​រំពឹងថា បើ​មិន​មាន​ការប្រែប្រួល​អាកាសធាតុ និង​មាន​ភ្លៀង​គ្រប់គ្រាន់ ហើយ​អាច​ស្តុក​ទឹកបាន​ច្រើន​នឹងត្រូវ​បង្ហូរ​ចូល​ទៅ​តាម​ប្រឡាយ​ជើង​ក្អែប​នេះ វា​នឹង​អាច​ស្រោចស្រព​ទៅ​លើដី​កសិកម្ម​របស់​ប្រជាកសិករ​នៅ​​ក្នុងស្រុក​ជីក្រែង​ក្នុង​រដូវវស្សា​បាន ២៥ ០០០ ​ហិកតា និង​រដូវប្រាំង​ពី​ ៣ ទៅ​ ៥ ​ពាន់​ហិកតា​។

លោក​ថ្លែងថា​៖ «​អាស្រ័យ​លើ​អាកាសធាតុ​ដែរ បើ​ភ្លៀង​ច្រើន យើង​ស្តុក​ទឹកបាន​ច្រើន​។ ប៉ុន្តែ​ក្នុង​ករណី​មាន​ការប្រែប្រួល​អាកាសធាតុ យើង​ស្តុក​ទឹកបាន​ខ្លះ មិន​បាន​ខ្លះ ប៉ុន្តែ​យើង​នឹង​ខិតខំ​ប្រឹងប្រែង​បន្តទៀត​ ដើម្បី​សាងសង់​អាងទឹក​នៅ​ខាងលើ​ដើម្បី​ស្ទាក់​ទឹក​»​។

លោក​ ទៀ សីហា អភិបាលខេត្ត​សៀមរាប​ក្នុង​ពិធី​ដឹកនាំ​មន្ត្រី​ជំនាញ​នៃ​មន្ទីរ និង​អង្គភាព​ពាក់ព័ន្ធ​ចុះទៅពិនិត្យ​អាង​ស្តុក​ទឹក​និង​ទំនប់​ពីថ្ងៃ​ទី​ ៤ ​កញ្ញា បាន​ជំរុញ​ឱ្យ​មន្ត្រី​ជំនាញ​សិក្សា​ស្វែងយល់ ដើម្បី​រៀបចំ​ស្តារ និង​កសាង​ប្រព័ន្ធ​ធារាសាស្ត្រ និង​ប្រព័ន្ធ​ប្រឡាយ​ជើង​ក្អែប​នេះ​ឱ្យ​បាន​ច្រើន និង​លឿន បន្ទាប់ពី​លោក​ពិនិត្យឃើញថា ពី​ ១ ​ឆ្នាំ​ទៅ​ ១ ​ឆ្នាំ បញ្ហា​ប្រឈម​ការខ្វះខាត​ទឹក ​ជា​បញ្ហា​ចម្បង​ធំ​បំផុត ដែល​ត្រូវតែ​ដោះស្រាយ​ជា​ចាំបាច់ សម្រាប់​ប្រជាកសិករ​នៅ​គ្រប់​រដូវ​ក្នុង​ការបង្កបង្កើនផល​។

របាយការណ៍​មន្ទីរ​កសិកម្ម ខេត្ត​សៀមរាប​បាន​ឱ្យដឹង​កាលពី​ថ្ងៃទី​ ៤ កញ្ញា ថា ការងារ​បង្កបង្កើន​ផលដំណាំ​ស្រូវវស្សា ឆ្នាំ​ ២០២១ ​សម្រេចបាន ១៨៩ ៧២០ ​ហិកតា ស្មើនឹង ៩៩,៩៩ ​ភាគរយ​នៃ​ផែនការ​។ ប៉ុន្តែ​នៅក្នុង​អំឡុង​ខែសីហា​កន្លងទៅនេះ គ្រោះរាំងស្ងួត​បាន​បង្កឱ្យ​មាន​ផលប៉ះពាល់​លើ​ដំណាំ​ស្រូវ​ទាំងនោះ​ជិត​ ១៦ ០០០ ​ហិកតា លើ​ ៨ ​ស្រុក​ក្នុង​ចំណោម​ ១២ ក្រុង​ស្រុក​ទូទាំង​ខេត្ត​ដែល​ស្មើនឹង​ ៤១ ​ឃុំ​, ៣២១ ​ភូមិ និង​ពលរដ្ឋ​ជាង ១៤ ០០០ គ្រួសារ ក្នុងនោះ​ស្រុក​ជីក្រែង ទទួលរង​ផលប៉ះពាល់​ច្រើនជាងគេ​ស្មើនឹង ៦ ៦០០ ហិកតា នៅ​ទូទាំង​ ១២ ​ឃុំ​ ១៣៣ ​ភូមិ និង​ជាង​ ៣ ០០០ ​គ្រួសារ​ក្នុងនោះ​ស្រូវស្រាល​ទំហំ ២ ៨៨០ ​ហិកតា ត្រូវ​ទទួលរង​នូវ​ការខូចខាត​ ដោយសារ​ខ្វះខាត​ទឹក​៕

អត្ថបទគួរចាប់អារម្មណ៍