.jpg)
ទិដ្ឋភាពផ្លូវលិចទឹកក្នុងក្រុងតាខ្មៅ នៅថ្ងៃទី ៧ កញ្ញា។ ហេង ជីវ័ន
កណ្តាលៈ មន្ទីរសាធារណការ និងដឺកជញ្ជូនខេត្តកណ្ដលប្រកាសបិទចរាចរណ៍រថយន្តដឹកទំនិញធុនធ្ងន់នៅលើកំណាត់ផ្លូវមួយចំនួន ដែលស្ថិតក្នុងក្រុងតាខ្មៅជាបណ្ដោះអាសន្នចាប់ពីថ្ងៃទី ៧ ដល់ថ្ងៃ ១៥ កញ្ញា ដើម្បីចៀសវាងការខូចខាតផ្លូវដែលកំពុងលិចទឹកជំនន់។
តាមសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តកណ្តាល នៅថ្ងៃទី ៧ ខែកញ្ញា ឱ្យដឹងថា ស្ថានភាពទឹកជំនន់ ទឹកភ្លៀងបាននិងកំពុងជន់លិចផ្លូវមួយចំនួនក្នុងក្រុងតាខ្មៅ ។ ដើម្បីចៀសវាងការខូចខាតដល់ផ្លូវថ្នល់ មន្ទីរសាធារណការ និងដឹកជញ្ជូនខេត្តកណ្ដាល សូមធ្វើការបិទចរាចរណ៍រថយន្តដឹកទំនិញធុនធ្ងន់ទាំងអស់នៅលើកំណាត់ផ្លូវលេខ ២០១,២០៩,១០៨, ១០៩,១១០ និងកំណាត់ផ្លូវជាតិលេខ ២ ចាប់ពីរង្វង់មូលលោកតាខ្មៅ ដល់ផ្លូវជាតិលេខ ២១ បេ (១១៥) ស្ថិតក្នុងក្រុងតាខ្មៅ ខេត្តកណ្តាល ជាបណ្ដោះអាសន្នចាប់ពី ថ្ងៃទី ៧ ដល់ថ្ងៃទី ១៥ ខែកញ្ញា ឆ្នាំ ២០២១។
សេចក្តីជូនដំណឹងបន្តថា ដោយឡែកចំពោះរថយន្តគ្រួសារ (ទេសចរណ៍) អាចធ្វើចរាចរណ៍បានជាធម្មតា។
លោក គង់ សោភ័ណ្ឌ អភិបាលខេត្តកណ្ដាល ក្នុងពេលចុះពិនិត្យតាមស្ថានីយបូមទឹក និងតំបន់មួយចំនួនដែលរងការជន់លិចដោយទឹកភ្លៀងនៅក្នុងក្រុងតាខ្មៅកាលពីថ្ងៃទី ២ ខែកញ្ញា ឆ្នាំ ២០២១ បានណែនាំដល់មន្ត្រីជំនាញអាជ្ញាធរក្រុងតាខ្មៅ ពិសេសមន្ទីរសាធារណការនិងដឹកជញ្ជូនខេត្តត្រូវចុះស្ដារប្រព័ន្ធលូទាំងអស់ដែលធ្វើឲ្យកកស្ទះចរន្តបង្ហូរទឹកបណ្ដាលឲ្យជន់លិចតំបន់មួយចំនួន ពិសេសកំណាត់ផ្លូវជាតិលេខ ២១B ដែលជាផ្លូវមានសារៈសំខាន់សម្រាប់ខេត្តកណ្ដាល ក៏ដូចជា ក្រុងតាខ្មៅទាំងមូលផងដែរ។
លោកបន្តថា ជាងនេះទៀតគ្រប់ស្ថានីយបូមទឹកទាំងអស់ត្រូវដំណើរការបូមទឹក ដើម្បីរំដោះទឹកក្នុងក្រុងតាខ្មៅឲ្យអស់។
សូមបញ្ជាក់ថា កាលពីថ្ងៃទី ៦ ខែ កញ្ញា ឆ្នាំ ២០២១ ភ្លៀងបានធ្លាក់មួយមេធំបណ្ដាលឲ្យទីកន្លែងមួយចំនួនក្នុងក្រុងតាខ្មៅត្រូវបានជន់លិចដោយជំនន់ទឹកភ្លៀងផងដែរ៕
វីដេអូ៖
