.jpg)
លោក វេង សាខុន និងមន្ត្រីក្រសួងកសិកម្ម ពិនិត្យពូជស្រូវនិងពូជដំណាំរួមផ្សំសម្រាប់ចែកជូនកសិករដែលរងគ្រោះដោយគ្រោះធម្មជាតិ។ រូប Sakhon Veng page
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានអះអាងថា នៅពេលនេះក្រសួងបានត្រៀមបម្រុងរួចជាស្រេចនូវគ្រាប់ពូជស្រូវចំនួន ២ ០០០ តោន និងពូជដំណាំរួមផ្សំ ២៥ តោនសម្រាប់អន្តរាគមន៍ជួយសង្គ្រោះប្រជាកសិករដែលរងផលប៉ះពាល់ និងខូចខាតដោយគ្រោះធម្មជាតិ។
សេចក្ដីអះអាងនេះបានធ្វើឡើងកាលពីថ្ងៃទី ៧ ខែ កញ្ញា ឆ្នាំ ២០២១ ស្របពេលដែលក្រសួងសង្គមកិច្ច អតីតយុទ្ធជន និងយុវនីតិសម្បទា និងគណៈកម្មាធិការជាតិគ្រប់គ្រងគ្រោះមហន្តរាយរួមទាំងក្រសួង ស្ថាប័នជាតិ និងអន្តរជាតិពាក់ព័ន្ធមួយចំនួន ទៀតកំពុងបើកកិច្ចពិភាក្សាលើប្រធានបទស្ដីពី «ការត្រៀមខ្លួន ដើម្បីកាត់បន្ថយផលប៉ះពាល់ទឹកជំនន់ឆ្នាំ ២០២១ និងឆ្នាំខាងមុខ ដោយប្រើប្រាស់អភិក្រមសកម្មភាពមុនគ្រោះអាសន្នកើតឡើង និងកិច្ចគាំពារសង្គមឆ្លើយតបនឹងគ្រោះអាសន្ន»។
លោក សាខុន បានបញ្ជាក់ថា៖ «ប៉ុន្មានទសវត្សរ៍ចុងក្រោយនេះ វិស័យកសិកម្មមានការរីកចម្រើនគួរឱ្យកត់សម្គាល់។ តែវិស័យនេះក៏កំពុងជួបបញ្ហាមួយចំនួនផងដែរ ជាពិសេសគ្រោះមហន្តរាយធម្មជាតិរួមមានគ្រោះទឹកជំនន់ គ្រោះរាំងស្ងួត ខ្យល់កន្ត្រាក់ ជំងឺឆ្លង និងសមាសភាពសត្វល្អិតចង្រៃ តែងតែបំផ្លាញផលដំណាំរបស់បងប្អូនប្រជាកសិកររៀងរាល់ឆ្នាំ»។
លោកបានបន្តថា ដោយពិនិត្យឃើញពីបញ្ហានេះ លោកនាយករដ្ឋមន្ត្រី ហ៊ុន សែន បានជំរុញ និងគាំទ្រលើការបង្កើនសមត្ថភាពត្រៀមបម្រុងស្បៀង និងគ្រាប់ពូជដំណាំសម្រាប់ទុកបង្ការ និងធ្វើអន្តរាគមន៍ជួយដល់កសិករក្រីក្រដែលងាយរងគ្រោះពីគ្រោះធម្មជាតិឱ្យបានទាន់ពេល និងមានប្រសិទ្ធភាព។
លោក សាខុន បានបញ្ជាក់ទៀតថា៖ «សម្រាប់ឆ្នាំ ២០២១ រាជរដ្ឋាភិបាល តាមរយៈប្រព័ន្ធស្បៀងបម្រុងកម្ពុជា (ប.ស.ប.ក) បានត្រៀមបម្រុងគ្រាប់ពូជស្រូវស្រាលមិនប្រកាន់រដូវជារូបវន្តចំនួន ២ ០០០ តោន និងគ្រាប់ពូជបន្លែ និងដំណាំរួមផ្សំផ្សេងៗទៀតចំនួន ២៥ តោនសម្រាប់អន្តរាគមន៍ជួយសង្គ្រោះប្រជាកសិករដែលរងផលប៉ះពាល់ និងខូចខាតដោយគ្រោះធម្មជាតិ»។
បើតាមលោក វេង សាខុន អគ្គនាយកដ្ឋានកសិកម្មមានភារកិច្ចចាត់ចែងគ្រាប់ពូជដំណាំនៅតាមកសិដ្ឋាន ស្ថានីយកសិកម្ម និងសហការជាមួយក្រុមហ៊ុនឯកជន និងសហគមន៍កសិកម្ម ដើម្បីធានានូវបរិមាណ និងគុណភាព និងចាត់ចែងដឹកជញ្ជូនគ្រាប់ពូជទៅដល់គោលដៅឱ្យបានទាន់ពេលវេលា។
ជុំវិញករណីនេះ លោក គង់ គា ប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្មបានប្រាប់ ភ្នំពេញ ប៉ុស្តិ៍ថា បច្ចុប្បន្ននាយកដ្ឋានដំណាំស្រូវ បានវេចខ្ចប់ គ្រាប់ពូជស្រូវ និងបន្លែទាំងនោះរួចរាល់ហើយក្នុងនោះគ្រាប់ស្រូវពូជមិនប្រកាន់រដូវ ២០០០ តោនត្រូវបានវេចខ្ចប់ច្រកក្នុងបាវចំណុះ ២៥ គីឡូក្រាម សរុបបានចំនួន ៨ ម៉ឺនបាវ និងកំពុងរក្សាទុកក្នុងឃ្លាំង។ ចំណែក គ្រាប់ពូជបន្លែ និងដំណាំរួមផ្សំ ១២ មុខសរុបទម្ងន់ ២៥ តោនត្រូវបានវេចខ្ចប់ជាកញ្ចប់តូចៗចំនួន ៥៩៥ ០០០ កញ្ចប់ និងបានរក្សាទុកនៅស្ថានីយផលិតពូជបន្លែក្បាលកោះ ខេត្តកណ្តាល។
ការវេចខ្ចប់គ្រាប់ពូជទុកជួយកសិកររងគ្រោះឆ្នាំនេះ។ រូបថត ក្រសួងកសិកម្ម
លោកបានបញ្ជាក់ថា៖ «ការត្រៀមគ្រាប់ពូជស្រូវ និងដំណាំទាំងនេះគឺសម្រាប់ផ្ដល់ជូនដល់គ្រួសារកសិករក្រីក្រដែលរងផលប៉ះពាល់ និងខូចខាតដោយគ្រោះធម្មជាតិ ទឹកជំនន់ និងរាំងស្ងួត សម្រាប់ការដាំស្ដារឡើងវិញ ដើម្បីទ្រទ្រង់ជីវភាពរស់នៅរបស់ពួកគេ»។
ទោះជាយ៉ាងណា លោក គង់ គា បានឱ្យដឹងថា ពេលនេះផ្ទៃដីដាំស្រូវដែលរងផលប៉ះពាល់ និងខូចខាតដោយគ្រោះរាំងស្ងួតនៅរដូវវស្សាមិនទាន់បូកសរុបទេ ដោយក្រុមមន្ត្រីជំនាញកំពុងសហការជាមួយអាជ្ញាធរមូលដ្ឋានចុះស្រង់ស្ថិតិពីផលប៉ះពាល់ជាក់ស្ដែង ដើម្បីធានាថាការអន្តរាគមន៍ផ្ដល់គ្រប់ពូជសម្រាប់ដាំស្ដារឡើងវិញនេះបានត្រូវចំគោលដៅពិតប្រាកដ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបបានប្រាប់ ភ្នំពេញ ប៉ុស្តិ៍ថា សម្រាប់ខេត្តសៀមរាបគិតត្រឹមថ្ងៃទី ៧ ខែកញ្ញា ផ្ទៃដីដែលរងផលប៉ះពាល់ដោយគ្រោះរាំងស្ងួតនៅរដូវវស្សាឆ្នាំនេះមានចំនួន ៦ ៦០០ ហិកតា និងខូចខាតទាំងស្រុងចំនួន ២ ៨៨០ ហិកតា។
លោកបានបញ្ជាក់ថា៖ «ដោយពិនិត្យទៅលើស្ថានភាពអាកាសធាតុ និងទីតាំងភូមិសាស្ត្រជាក់ស្ដែងក្រុមការងារយើងបានផ្ដល់ស្រូវពូជ ៥ តោន ជី និងថ្នាំកសិកម្មចំនួន ៥ តោនដល់កសិករក្រីក្រចំនួន ២០០ គ្រួសារដែលខ្វះលទ្ធភាពនៅស្រុកជីក្រែង ដើម្បីដាំស្ដារឡើងវិញ»។
លោកបានបន្តថា ទន្ទឹមនឹងនេះតាមរយៈរដ្ឋបាលខេត្តសៀមរាប មន្ទីរកសិកម្មក៏បានសុំគ្រាប់ពូជស្រូវ បន្លែ និងដំណាំរួមផ្សំ ចំនួន ៣០ តោន ថែមទៀតពីគណៈកម្មការជាតិគ្រប់គ្រងគ្រោះមហន្តរាយ និងពីក្រសួងកសិកម្មផងដែរដើម្បីត្រៀមបង្ការ ក្នុងគ្រាអាសន្នខាងមុខនេះ។
នៅឆ្នាំមុន កម្ពុជាបានរងផលប៉ះពាល់ធ្ងន់ធ្ងរ ដោយសារទឹកជំនន់ក្នុងមូលដ្ឋានទូទាំង ២៥ រាជធានី-ខេត្តក្នុងនោះខេត្តបន្ទាយមានជ័យរងផលប៉ះពាល់ធ្ងន់ធ្ងរជាងគេ គឺបានប៉ះពាល់ចំនួន ២២២ ៨៩២ គ្រួសារ និង ១៧ ៥១៧ គ្រួសារទៀតត្រូវបានជម្លៀសចេញទៅកាន់ទីទួលសុវត្ថិភាព និង ៥៨ នាក់បានស្លាប់។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។
លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយនៅព្រឹកថ្ងៃទី ៧ ខែកញ្ញា បានជំរុញឱ្យសិក្ខាកាមដែលចូលរួមក្នុងសិក្ខាសាលាស្ដីពី «ការត្រៀមខ្លួនដើម្បីកាត់បន្ថយផលប៉ះពាល់ទឹកជំនន់ឆ្នាំ ២០២១ និងឆ្នាំខាងមុខដោយប្រើប្រាស់អភិក្រមសកម្មភាពមុនគ្រោះអាសន្នកើតឡើង និងកិច្ចគាំពារសង្គមឆ្លើយតបនឹងគ្រោះអាសន្ន»។
លោកបានគូសបញ្ជាក់ថា៖ «គណៈកម្មាធិការជាតិគ្រប់គ្រងគ្រោះមហន្តរាយបានត្រៀមរួចជាស្រេចហើយនូវកម្លាំង និងមធ្យោបាយគ្រាប់ពូជស្រូវ បន្លែ និងដំណាំរួមផ្សំផ្សេងៗ ព្រមទាំងស្បៀងបម្រុងមួយចំនួនទៀត សម្រាប់ជួយអន្តរាគមន៍សង្គ្រោះពលរដ្ឋរងគ្រោះដោយទឹកជំនន់ ដែលអាចកើតមាននាចុងរដូវវស្សាខាងមុខនេះ»។
បើតាមលោក គីម នៅពេលនេះគណៈកម្មាធិការជាតិគ្រប់គ្រងគ្រោះមហន្តរាយបានត្រៀមកម្លាំងអន្តរាគមន៍ចំនួន ៨២ ៥០០ នាក់ និងមធ្យោបាយដឹកជញ្ជូនរួមមានរថយន្ត (Truck) ចំនួន ១ ១០៦ គ្រឿង កាណូត ៣២០ គ្រឿង និងអូប័រចំនួន ១៧៩ គ្រឿង។
ចំណែកលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងនូវអនុសាសន៍ ៤ ចំណុច រួមមាន ការបង្កើតបន្ថែមនូវក្របខ័ណ្ឌច្បាប់ និងបទប្បញ្ញត្តិ ព្រមទាំងការពង្រឹងការគ្រប់គ្រងហានិភ័យនៃគ្រោះមហន្តរាយនៅគ្រប់ថ្នាក់ទាំងអស់ដោយបន្តធ្វើការពិនិត្យលើតួនាទី និងការប្រើចំណេះដឹងបែបវិទ្យាសាស្ត្រលើការគ្រប់គ្រងគ្រោះមហន្តរាយឱ្យប្រកបដោយវិជ្ជាជីវៈតាមរយៈជំរុញការចូលរួមពីគ្រប់តួអង្គពាក់ព័ន្ធ។
លោកបានបញ្ជាក់ថា៖ «ដើម្បីសម្រេចនូវគោលបំណងរបស់យើងក្នុងការស្វែងរកឱ្យឃើញនូវបទពិសោធ និងធាតុចូលដ៏សំខាន់ដើម្បីឆ្លើយតបទៅនឹងគ្រោះមហន្តរាយដែលអាចកាត់បន្ថយដល់កម្រិតអប្បបរមានូវការបាត់បង់អាយុជីវិត និងការខូចខាតដល់វិស័យនានារបស់ប្រទេស និងតំបន់នោះ យើងចាំបាច់ត្រូវធ្វើការពិភាក្សាឱ្យបានសកម្ម និងល្អិតល្អន់ពិសេសការចែករំលែកនូវបទពិសោធពីគ្រប់ស្ថាប័ន និងដៃគូទាំងអស់លើគ្រប់ទិដ្ឋភាពនៃការគ្រប់គ្រងគ្រោះមហន្តរាយនេះ តាមរយៈសកម្មភាពជួយគ្នាទៅវិញទៅមក»៕
វីដេអូ៖
