.jpg)
លោក សូ សាមឿន ប្តឹងមន្ត្រី កបប ទៅ ACU ចោទពីបទជំរិតទារប្រាក់។ រូប សហការី
បន្ទាយមានជ័យៈ ពលរដ្ឋជាអ្នករកស៊ីដឹកជញ្ជូនអីវ៉ាន់ម្នាក់ប្តឹងមន្ត្រីនៃនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) សាខាខេត្តបន្ទាយមានជ័យ ទៅអង្គភាពប្រឆាំងអំពើពុករលួយ (ACU) ករណីជំរិតទារប្រាក់ចំនួន ១ លាន ៤ សែនរៀល ដោយមិនមានឯកសារច្បាស់លាស់។ ប៉ុន្តែមន្ត្រីស្ថាប័ននេះអះអាងថាធ្វើតាមច្បាប់ត្រឹមត្រូវ។
លោក សូ សាមឿន ជាអ្នករកស៊ីដឹកជញ្ជូនអីវ៉ាន់ពីផ្សារឃុំអូរបីជាន់ទៅផ្សារអគ្គប៉ោយប៉ែត និយាយនៅថ្ងៃទី ៧ ខែកញ្ញា ថា នៅយប់ថ្ងៃទី ៣១ ខែសីហា មន្ត្រី ក.ប.ប. ខេត្តបន្ទាយមានជ័យបានឃាត់រថយន្តរបស់លោកដែលកំពុងដឹកអីវ៉ាន់ចាប់ហួយនៅតាមបណ្តោយផ្លូវក្រវាត់ព្រំដែនលេខ ៥៨ ក្នុងឃុំអូរបីជាន់ ស្រុកអូរជ្រៅ ធ្វើការពិនិត្យ និងធ្វើការពិន័យអន្តរការណ៍ចំនួនទឹកប្រាក់ ២០ លានរៀល ដោយសំអាងថា ទំនិញគ្មានឯកសារបង់គយត្រឹមត្រូវ។
លោកថ្លែងថា៖ «គាត់ចាប់ឡានខ្ញុំតាំងពីម៉ោង ១១ យប់ រហូតដល់ម៉ោង ៣ ជិតភ្លឺ កាក់ឡានខ្ញុំទុក។ អ៊ីចឹងទៅខ្ញុំក៏លោមអង្វរករសុំគាត់បន្ធូរបន្ថយទៅក៏នៅសល់ ២ លានរៀល តែនៅខ្លួនខ្ញុំមានលុយតែ ៤០ ម៉ឺនរៀលក៏សុំបង់ប៉ុណ្ណឹងសិន ចាំស្អែកឡើងខ្ញុំបង់បន្ថែមទៀត។ អ៊ីចឹងស្អែកឡើងគាត់បើកឡានមកផ្ទះខ្ញុំ ខ្ញុំបង់បាន ១ លានទៀត»។
បើតាមលោក សាមឿន ចំនួនទឹកប្រាក់ដែលនៅសល់ចំនួន ៦ សែនរៀល លោកបានផ្ញើតាមរយៈប្រព័ន្ធផ្ទេរលុយ អ៊ីម៉ានី ប៉ុន្តែមន្ត្រី ក.ប.ប. បានបដិសេធមិនទទួលលុយចុងក្រោយនោះទេ ព្រោះខឹងនឹងរូបលោកដែលបានផ្តល់ដំណឹងទៅអ្នកសារព័ត៌មាន។
លោក សាមឿន បញ្ជាក់ថា ក្នុងរឿងនេះលោកបានដាក់ពាក្យប្តឹងទៅអង្គភាពប្រឆាំងអំពើពុករលួយ ហើយកាលពីថ្ងៃទី ៦ ខែកញ្ញា ដើម្បីពិនិត្យមើលការអនុវត្តច្បាប់របស់មន្ត្រី ក.ប.ប. ដែលបានជំរិតទារប្រាក់ពីប្រជាពលរដ្ឋ ដោយមិនមានឯកសារច្បាប់ត្រឹមត្រូវ។
ក្នុងពាក្យបណ្តឹង លោក សូ សាមឿន បានស្នើសុំអង្គភាពប្រឆាំងអំពើពុករលួយជួយស៊ើបអង្កេតលើប្រធានសាខា ក.ប.ប. ខេត្តបន្ទាយមានជ័យ និងមន្ត្រីក្រោមឱវាទក្នុងករណីជំរិតយកលុយពីលោកចំនួន ១ លាន ៤ សែនរៀល ដោយមិនមានឯកសារច្បាស់លាស់ និងចាត់ទុកជាការប្រព្រឹត្តអំពើពុករលួយជាប្រព័ន្ធ ក្នុងការបំពេញការងារ ជាសេវាកម្មសាធារណៈរបស់រដ្ឋ។
លោក សាមឿន បានចាត់ទុកសកម្មភាពជំរិតទារប្រាក់ដោយគ្មានវិក្កយបត្ររបស់មន្ត្រី ក.ប.ប. ខេត្តបន្ទាយមានជ័យនេះថា ជាទង្វើប្រព្រឹត្តអំពើពុករលួយលក្ខណៈប្រព័ន្ធ។ អង្គភាពប្រឆាំងអំពើពុករលួយគួរតែមានវិធានការផ្លូវច្បាប់ និងបើកការស៊ើបអង្កេតកោះហៅឱ្យចូលខ្លួនបំភ្លឺនៅចំពោះមុខអង្គភាពតាមនីតិវិធីច្បាប់ជាធរមាន។
លោក លន់ ស៊ីថា អនុប្រធានការិយាល័យ ក.ប.ប. ខេត្តបន្ទាយមានជ័យថ្លែងនៅថ្ងៃទី ៧ ខែកញ្ញា ថា មូលហេតុដែលអ្នកដឹកអីវ៉ាន់នោះត្រូវពិន័យ ព្រោះមន្ត្រី ក.ប.ប. បានរកឃើញថា គាត់បានដឹកជញ្ជូនប្រហិតចម្រុះជាច្រើនដោយខុសបច្ចេកទេស។ មានទាំងនាំចូលស្រាដោយគ្មានច្បាប់អនុញ្ញាត បំពានកម្មសិទ្ធិបញ្ញា និងមានសរសៃគុយទាវគ្មានកាលបរិច្ឆេទប្រើប្រាស់ត្រឹមត្រូវចំនួន ៣៤០ គីឡូក្រាមផងដែរ។
លោកថា ពេលមន្ត្រី ក.ប.ប. ធ្វើការពិន័យអ្នករកស៊ីដឹកជញ្ជូននោះបានយល់ព្រមដោយ ស្រុះស្រួលគ្នាជាដំណាក់កាលបន្តបន្ទាប់ ដែលក្នុងនោះទំហំទឹកប្រាក់ដែលត្រូវពិន័យចំពោះការល្មើសនេះមានចំនួន ៥ លានរៀល។ ប៉ុន្តែដោយសារអាជីវករមានការសុំបន្ធូរបន្ថយ ក៏ស្រុះស្រួលគ្នាមកនៅត្រឹម ២ លានរៀល។ ជាក់ស្តែងពេលនោះគាត់បង់បានតែ ៤០ ម៉ឺនរៀលប៉ុណ្ណោះនៅសល់ ១ លាន ៦០ ម៉ឺនទៀតថា នឹងមកបង់នៅថ្ងៃបន្ទាប់។
ប៉ុន្តែនៅថ្ងៃបន្ទាប់ដែលត្រូវបង់លុយ អ្នករកស៊ីដឹកជញ្ជូនអីវ៉ាន់រូបនោះ នៅមិនមានលុយគ្រប់សម្រាប់បង់ ទើបមន្ត្រី ក.ប.ប. តម្រូវឱ្យបង់តាមលទ្ធភាពសិន។ នៅពេលបង់បង្គ្រប់ចុងក្រោយត្រូវតែទៅកន្លែង ដើម្បីទទួលវិក្កយបត្រ ប៉ុន្តែអាជីវករនោះបែរជាមិនបានមកកន្លែងមន្ត្រី ក.ប.ប ដែលបានកំណត់ហើយបែរជាប្តឹងទៅវិញ។
លោកថ្លែងថា៖ «ចំពោះបុគ្គលល្មើសយើងឱ្យ ១៥ ថ្ងៃ បើគាត់មិនមកបង់ពិន័យទេ យើងធ្វើលិខិតជូនដំណឹងគាត់មួយ។ បន្ទាប់មក ១៥ ថ្ងៃទៀតគ្រប់ ៣០ ថ្ងៃ បើគាត់មិនមកទៀត អាហ្នឹងយើងប្តឹងទៅតុលាការតាមច្បាប់ ដើម្បីយកប្រាក់ពិន័យ»។
លោកបញ្ជាក់ថា មន្ត្រី ក.ប.ប. បានចុះធ្វើកិច្ចការងារទៅតាមច្បាប់ដែលបានកំណត់តែប៉ុណ្ណោះ ប៉ុន្តែប្រជាពលរដ្ឋជាច្រើនមិនបានយល់ ហើយក៏មិនព្រមចូលខ្លួនមកស្តាប់ការណែនាំដើម្បីឱ្យដឹងច្បាស់។ កន្លងមក មន្ត្រី ក.ប.ប. ក៏បានផ្សព្វផ្សាយជូនដំណឹងឱ្យពលរដ្ឋទូទៅបានដឹង មុននឹងចុះអនុវត្តការងារជាក់ស្តែងផងដែរ។
លោកថ្លែងថា៖ «យើងមានចេញវិក្កយបត្រមានអីត្រឹមត្រូវតាមច្បាប់ទាំងអស់ហ្នឹង ប៉ុន្តែគាត់អត់យល់។ ព្រោះនេះជាការងារចុះអនុវត្តដំបូង អ៊ីចឹងអាជីវករមួយចំនួនធំណាស់ដែលគាត់អត់យល់។ ចំពោះការពិន័យអន្តរការណ៍ហ្នឹង គឺស្វែងរកបទល្មើស និងដាក់បន្ទុកដើម្បីពិន័យ»។
លោកឱម យ៉ិនទៀង ប្រធាន អង្គភាពប្រឆាំងអំពើពុករលួយមិនអាចទាក់ទងសុំអត្ថាធិប្បាយបានទេកាលពីថ្ងៃទី ៧ កញ្ញា៕
វីដេអូ៖
