ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានប្រាប់ដល់មន្ត្រីជំនាញនៃក្រសួងព័ត៌មាន ចាប់ផ្ដើមតាមដាន និងត្រួតពិនិត្យ ទៅលើគេហទំព័រ ដែលបានចុះបញ្ជិកាត្រឹមត្រូវ ហើយផ្សព្វផ្សាយព័ត៌មាន ក្លែងក្លាយ ដែលមានខ្លឹមសារញុះញង់ និងបំពុលសង្គម ដែលត្រូវរាយការណ៍ និងពិនិត្យក្នុងរយៈពេល ៣ ខែម្ដង ដើម្បីមានវិធានការ។
យោងតាមការឱ្យដឹងនៅក្នុងកិច្ចប្រជុំសាមញ្ញប្រចាំសប្តាហ៍ ថ្នាក់ដឹកនាំ ក្រសួងព័ត៌មាន តាមប្រព័ន្ធ ZOOM នៅថ្ងៃទី ៦ ខែ កញ្ញា ឆ្នាំ ២០២១ លោក ខៀវ កាញារីទ្ធ បានថ្លែងថា គណៈកម្មការតាមដានការផ្សព្វផ្សាយព័ត៌មានក្លែងក្លាយ ជាក្រុមពិនិត្យមើលតែពីដំណឹងដែលបំពុល ព័ត៌មានដែលមិនពិត បំភ្លៃសង្គម គឺខុសពីគណ:កម្មការតាមដានវាយតម្លៃ និងលើកសរសើរក្រមសីលធម៌ វិជ្ជាជីវ:សារព័ត៌មាន ដើម្បីជាការលើកនូវតម្លៃ សីលធម៌ និងតម្លៃតួនាទីសង្គមរបស់អ្នកសារព័ត៌មានឡើងវិញ។
លោករដ្ឋមន្ត្រីបានថ្លែងថា៖ «ក្រុមប្រឆាំងព័ត៌មានក្លែងក្លាយ គួរធ្វើការពិនិត្យ បូកសរុបមើលតើមានគេហទំព័រប៉ុន្មាន និងឈ្មោះអ្វីខ្លះ? ដែលបាននិយាយ ផ្សព្វផ្សាយព័ត៌មានក្លែងក្លាយអំពីអ្វី និងប៉ុន្មានដង? ដោយកិច្ចការងារនេះធ្វើការបូកសរុបរយ:ពេល ៣ ខែម្តង»។
លោក ផុស សុវណ្ណ អ្នកនាំពាក្យក្រសួងព័ត៌មានប្រាប់ភ្នំពេញប៉ុស្តិ៍ថា លោករដ្ឋមន្ត្រី បានឱ្យគណៈកម្មការតាមដានការផ្សព្វផ្សាយព័ត៌មានក្លែងក្លាយ គិតគូរត្រួតពិនិត្យលើបណ្តាគេហទំព័រដែលបានចុះបញ្ជីត្រឹមត្រូវ ហើយផ្សព្វផ្សាយព័ត៌មានមិនពិត និងរាយការណ៍ជូនលោករដ្ឋមន្ត្រីវិញ ប៉ុន្តែកិច្ចការនេះ គណៈកម្មការបានធ្វើរួចហើយ គ្រាន់តែកន្លងមក នេះបានតាមដាន និងពិនិត្យទៅលើគណនីគេហទំព័រទាំងអស់។
លោកថ្លែងបន្តថា ចាប់ផ្តើមពីពេលនេះតទៅលោករដ្ឋមន្ត្រី ខៀវ កាញារីទ្ធ ឱ្យពិនិត្យទៅលើកិច្ចការនេះបន្ថែមទៀត និងរាយការណ៍ជូនលោកក្នុងរយៈពេល ៣ ខែម្តង ដើម្បីឱ្យលោកមានមូលដ្ឋានក្នុងការសម្រេចចិត្តថា ត្រូវមានវិធានការបែបណាមួយសមស្រប។
លោកថ្លែងថា៖ «កន្លងមកនេះ យើងមើលឃើញហើយ ថា មានការចុះផ្សាយព័ត៌មានមិនពិត ដោយក្នុងចំណោមនោះ យើងក៏បានពិនិត្យទៅលើផេចដែលចុះបញ្ជិកាត្រឹមត្រូវឬអត់ដែរ»។
បើតាមលោក ផុស សុវណ្ណ នៅពេលដែលមានគេហទំព័របានចុះបញ្ជិកាហើយបានផ្សព្វផ្សាយព័ត៌មានមិនពិត ឬក្លែងក្លាយ ក្រសួងនឹងមានវិធានការ ដោយកោះហៅមកអប់រំណែនាំ ប៉ុន្តែបើធ្ងន់ធ្ងរខ្លាំង គឺអាចព្រមាន ឬ ដកអាជ្ញាប័ណ្ណឈប់ឱ្យផ្សព្វផ្សាយបន្តទៀត។ មួយវិញទៀតសម្រាប់ផេកដែលមិនបានចុះបញ្ជិកាត្រឹមត្រូវតាមច្បាប់ក្រសួងមានតួនាទីរៀបចំទៅឱ្យសមត្ថកិច្ចពាក់ព័ន្ធចាត់វិធានការទៅតាមផ្លូវច្បាប់បន្តទៀត។
លោក ប៉ែន បូណា ប្រធានក្លិបអ្នកកាសែតកម្ពុជាបានថ្លែងថា គេហទំព័រព័ត៌មានដែលចុះបញ្ជិកាត្រឹមត្រូវពីក្រសួងព័ត៌មាន មិនគួរណា ផ្សព្វផ្សាយព័ត៌មានមិនពិត និងក្លែងក្លាយឱ្យពលរដ្ឋយល់ច្រឡំ និងបង្កភាពវឹកវរដល់សង្គមនោះទេ។
លោកថ្លែងថា៖ «អ្នកសារព័ត៌មានដែលមានគេហទំព័រ ត្រូវចូលរួមផ្សាព្វផ្សាយព័ត៌មានណាដែលមានប្រយោជន៍ដល់សង្គម និងឈរលើមូលដ្ឋានក្រមសីលធម៌ និងវិជ្ជាជីវៈ ប៉ុន្តែបើផ្សព្វផ្សាយព័ត៌មានក្លែងក្លាយ និងមិនពិត វាអាចបង្កឱ្យមានហានិភ័យដល់សង្គមជាតិ»។ គណៈកម្មការតាមដានការផ្សព្វផ្សាយព័ត៌មានក្លែងក្លាយបានឱ្យដឹងថា នៅក្នុងខែសីហាបានស្រង់ប្រភពដែលផ្សព្វផ្សាយពាក់ព័ន្ធនឹងដំណឹង ក្លែងក្លាយ ព័ត៌មានមិនពិតញុះញង់ បំពុលសង្គម និងប្រមាថថ្នាក់ដឹកនាំមានចំនួន ១៦០ ករណីក្នុងចំណោមប្រភពចំនួន ៧៨៕