.jpg)
លោក រ៉ុង ឈុន ចុះទៅជួបកម្មករអំឡុងពេលធ្វើការតវ៉ារឿងប្រាក់ខែនៅក្បែរផ្ទះលោកនាយករដ្ឋមន្ត្រី កាលពីខែ កក្កដា ឆ្នាំ ២០២០។ ហុង មិនា
ភ្នំពេញៈ អគ្គនាយកដ្ឋានពន្ធនាគារនៃក្រសួងមហាផ្ទៃគ្រោងនឹងបញ្ជូនលោក រ៉ុង ឈុន ដែលកំពុងជាប់ពន្ធនាគារ ដែលកំពុងមានជំងឺស្រវាំងភ្នែកខាងស្ដាំ ហើយគ្រូពេទ្យតម្រូវឱ្យវះកាត់ នៅពេលដែលក្រុមគ្រូពេទ្យកោះហៅ។
អ្នកនាំពាក្យអគ្គនាយកដ្ឋានពន្ធនាគារលោក នុត សវនា បានថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៧ ខែកញ្ញានេះថា៖ «គាត់អត់មានឈឺបញ្ហាសុខភាពអ្វីដទៃទេគ្រាន់តែភ្នែកហ្នឹងទាល់តែពេទ្យខាងក្រៅ [ពន្ធនាគារ] បានគេមានលទ្ធភាពមើលគាត់កើត។ ពេទ្យថា ទាល់តែវះកាត់ ភ្នែកហ្នឹង។ ពេទ្យថា រើសថ្ងៃដើម្បីយកគាត់មកវះកាត់។ យើងក៏រង់ចាំមើលថា ពេទ្យទំនេរពេលណា យើងបញ្ជូនគាត់ទៅពេលហ្នឹង»។
លោក នុត សវនា បានឱ្យដឹងថា អគ្គនាយកដ្ឋានពន្ធនាគារបានបញ្ជូន លោក រ៉ុង ឈុន ទៅពិនិត្យសុខភាព នៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី ៤ ខែកញ្ញា។ ក្រោយគ្រូពេទ្យពិនិត្យ នៅថ្ងៃដដែល គ្រូពេទ្យថា គ្មានបញ្ហាអ្វីទេ អាចបញ្ជូនគាត់ទៅពន្ធនាគារ [មណ្ឌលអប់រំកែប្រែទី ១] វិញបាន។ ដូច្នេះទើបអគ្គនាយកដ្ឋានពន្ធនាគារសម្រេចយកគាត់មកពន្ធនាគារវិញមក។
លោកថ្លែងថា៖ «យើងទុកគាត់នៅសិន ពេទ្យហៅពេលណា យើងនឹងបញ្ជូនគាត់ទៅពេលហ្នឹង»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ដែលជាមនុស្សជិតស្និទ្ធលោក រ៉ុង ឈុន ប្រាប់ ភ្នំពេញ ប៉ុស្ដិ៍ នៅថ្ងៃទី ៧ ខែកញ្ញាថា កាលពីថ្ងៃទី ៦ ខែកញ្ញា លោក រ៉ុង ឈុន បានទូរស័ព្ទ ឱ្យដឹងថា គាត់បានទៅពិនិត្យសុខភាពនៅមន្ទីរពេទ្យរុស្ស៊ី ពេទ្យឱ្យថ្នាំគាត់សម្រាប់លេប ហើយក៏បានបញ្ជូនមកពន្ធនាគារវិញ មិនបានឱ្យសម្រាកនៅមន្ទីរពេទ្យទេ។
លោកស្រីថ្លែងថា៖ «ពេទ្យផ្ដាំផ្ញើថាឱ្យគាត់ត្រូវតែទៅពិនិត្យសុខភាពជាប្រចាំ ព្រោះអីភ្នែករបស់គាត់មានបញ្ហាធ្ងន់ធ្ងរ។ នេះជាអ្វីដែលលោក រ៉ុង ឈុន គាត់បានប្រាប់ខ្ញុំបែបនេះ»។
សាលាដំបូងរាជធានីភ្នំពេញនៅថ្ងៃទី ១៨ ខែសីហា បានប្រកាសសាលក្រម ផ្តន្ទាទោស លោក រ៉ុង ឈុន ឱ្យជាប់ពន្ធនាគារ ២ ឆ្នាំក្រោមការចោទប្រកាន់ ពីបទញុះញង់បង្កើតឱ្យមាន ភាពវឹកវរធ្ងន់ធ្ងរដល់សន្តិសុខ សង្គមតាម មាត្រា ៤៩៤ និង មាត្រា ៤៩៥ នៃក្រមព្រហ្មទណ្ឌ។
លោក រ៉ុង ឈុន គឺជាប្រធានសហភាពសហជីពកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា និងធ្លាប់ជាអតីតសមាជិកគណៈកម្មាធិការជាតិរៀបចំការបោះឆ្នោតពីកូតាអតីតគណបក្សសង្គ្រោះជាតិកាលពីឆ្នាំ ២០១៣។ លោកត្រូវបានចាប់ខ្លួននៅយប់ថ្ងៃទី ៣១ កក្កដា ពាក់ព័ន្ធបង្ហោះរឿងព្រំដែនកម្ពុជា-វៀតណាម៕
