ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) ប្រាប់ឱ្យអង្គការ អ្នកសង្កេតការណ៍ជាតិ អន្តរជាតិ និងគណបក្សនយោបាយ ដាក់ពាក្យស្នើសុំចុះឈ្មោះអ្នកសង្កេតការណ៍របស់ខ្លួន សម្រាប់ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ២០២១ ដែលនឹងចាប់ផ្តើមពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១។
តាមសេចក្តីជូនដំណឹងរបស់ គ.ជ.ប. កាលពីថ្ងៃទី ៦ ខែកញ្ញា ប្រាប់ឱ្យអង្គការ អ្នកសង្កេតការណ៍ជាតិដាក់ពាក្យស្នើសុំចុះឈ្មោះអ្នកសង្កេតការណ៍របស់ខ្លួន ចាប់ពីថ្ងៃទី ១២ ខែកញ្ញា ឆ្នាំ ២០២១ ដល់ថ្ងៃទី ២ ខែកុម្ភៈ ឆ្នាំ ២០២២។ ប៉ុន្តែ សម្រាប់អង្គការ អ្នកសង្កេតការណ៍អន្តរជាតិអាចដាក់ពាក្យស្នើសុំចុះឈ្មោះអ្នកសង្កេតការណ៍របស់ខ្លួនចាប់ពីថ្ងៃទី ១២ ខែ កញ្ញា ឆ្នាំ ២០២១ ដល់ថ្ងៃទី ៩ ខែ កុម្ភៈ ឆ្នាំ ២០២២។
គ.ជ.ប.បញ្ជាក់ថា អង្គការអ្នកសង្កេតការណ៍ជាតិ និងអន្តរជាតិ ដែលបានទទួលស្គាល់ និងអនុញ្ញាតជាផ្លូវការ ហើយទទួលបណ្ណសម្គាល់ ពី គ.ជ.ប. រួចហើយមានសិទ្ធិសង្កេតមើលដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតទាំងមូលក្នុងព្រះរាជាណាចក្រកម្ពុជា។
គ.ជ.ប. បន្តថា សម្រាប់គណបក្សនយោបាយអាចដាក់ពាក្យសុំចុះឈ្មោះភ្នាក់ងាររបស់ខ្លួនចាប់ពីថ្ងៃទី ៥ ខែ តុលា ឆ្នាំ ២០២១ រហូតដល់ថ្ងៃទី ២ ខែ កុម្ភៈ ឆ្នាំ ២០២២។ ពាក្យសុំចុះឈ្មោះជាភ្នាក់ងារគណបក្សនយោបាយត្រូវចុះហត្ថលេខាដោយប្រធាន ឬតំណាងនៃគណបក្សនយោបាយ ដែលទទួលបានការផ្ទេរសិទ្ធិជាលាយលក្ខណ៍អក្សរពីប្រធានគណបក្សនយោបាយ។ ការផ្ទេរសិទ្ធិនេះមិនអនុញ្ញាតឱ្យផ្ទេរសិទ្ធិបន្តឡើយ លើកលែងតែក្នុងលិខិតផ្ទេរសិទ្ធិនោះមានខ្លឹមសារអនុញ្ញាតឱ្យផ្ទេរសិទ្ធិបន្ត។
គណបក្សនយោបាយដែលបានចុះបញ្ជីត្រឹមត្រូវតាមច្បាប់ស្តីពីគណបក្សនយោបាយមានសិទ្ធិចាត់តាំងភ្នាក់ងាររបស់ខ្លួនមួយចំនួនតាមការចាំបាច់របស់គណបក្ស ដើម្បីសង្កេតមើលការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមសាលាឃុំ សង្កាត់ និងតាមការិយាល័យចុះឈ្មោះបោះឆ្នោតក្នុងឃុំ សង្កាត់ ដែលកំណត់ដោយ គ.ជ.ប.។
លោក ហង្ស ពុទ្ធា អ្នកនាំពាក្យ គ.ជ.ប. ប្រាប់ ភ្នំពេញ ប៉ុស្តិ៍ នៅថ្ងៃទី ៧ ខែកញ្ញាថា ក្នុងច្បាប់បោះឆ្នោតបានចែងថា គណបក្សនយោបាយ អង្គការ មិនមែនរដ្ឋាភិបាលជាតិ និងអន្តរជាតិ តម្រូវឱ្យដាក់ភ្នាក់ងាររបស់ខ្លួន ដើម្បីតាមដានអង្កេតការណ៍ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ២០២១ នេះ។
លោកបន្តថា សេចក្តីជូនដំណឹងរបស់ គ.ជ.ប. ឆ្លើយតបទៅអង្គការក្រៅរដ្ឋាភិបាលជាតិ និងអន្តរជាតិ និងគណបក្សនយោបាយមួយចំនួន ដែលមានបំណងចូលរួមដាក់ភ្នាក់ងារសង្កេតការណ៍របស់ខ្លួនអាចដាក់ពាក្យស្នើសុំ ដើម្បីទទួលបានការអនុញ្ញាតពី គ.ជ.ប. ក្នុងការចុះអង្កេតការណ៍នៅតាមការិយាល័យពិនិត្យ បញ្ជីឈ្មោះ និងចុះឈ្មោះបោះឆ្នោតនៅទូទាំងឃុំ សង្កាត់របស់ប្រទេសកម្ពុជា។
លោកថា អង្គការ សមាគមជាតិ និងអន្តរជាតិ និងគណបក្សនយោបាយ មានសិទ្ធិក្នុងការកត់ត្រា និងឆ្លុះបញ្ចាំងពីតម្លាភាពនៃដំណើរការពិនិត្យឈ្មោះ និងចុះឈ្មោះបោះឆ្នោតរួមនឹងការបោះឆ្នោតនៅទូទាំងប្រទេស។ ទោះជាយ៉ាងណា លុះត្រាអង្គការ សមាគមជាតិ និងអន្តរជាតិ និងភ្នាក់ងារគណបក្សនយោបាយដាក់ពាក្យស្នើសុំមក គ.ជ.ប. ទើបមានសិទ្ធិក្នុងការចុះសង្កេតការណ៍បាន។
លោកថា៖ «គ្រប់កាលៈទេសៈទាំងអស់ គ.ជ.ប. ចាត់ទុកភាគីពាក់ព័ន្ធទាំងអស់គឺជា ដៃគូដ៏សំខាន់ក្នុងការតាមដាន និងពិនិត្យ សង្កេតការណ៍លើដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត រួមជាមួយនឹងការបោះឆ្នោត ដើម្បីចូលរួមក្នុងដំណើរលទ្ធិប្រជាធិបតេយ្យក្នុងការបោះឆ្នោតនេះកាន់តែល្អប្រសើរថែមទៀត»។
លោក កង សាវាង្ស អ្នកសម្របសម្រួល ផ្នែកអង្កេត និងតស៊ូមតិនៃអង្គការឃ្លាំមើលការបោះឆ្នោត (Comfrel) ថ្លែងនៅថ្ងៃទី ៧ កញ្ញា ថាជារៀងរាល់ឆ្នាំ អង្គការរបស់លោកតែងតែដាក់ពាក្យស្នើសុំទៅ គជប ដើម្បីចុះឈ្មោះអ្នកសង្កេតការណ៍ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ២០២១ ប៉ុន្តែចំនួននៃអ្នកសង្កេតការណ៍តាមឃ្លាំមើល មិនត្រូវដាក់ចំនួនច្រើនទេ។ ឆ្នាំនេះអង្គការ ក៏នឹងត្រៀមសុំចុះឈ្មោះអ្នកសង្កេតការណ៍មួយចំនួនដែរ ព្រោះឆ្នាំនេះក៏ជាឆ្នាំត្រៀមសម្រាប់ការបោះឆ្នោតជ្រើសរើស ក្រុមប្រឹក្សាឃុំ សង្កាត់ ឆ្នាំ ២០២២។
លោកថ្លែងថា៖ «ដូច្នេះហើយបានជាយើងខ្ញុំខិតខំប្រឹងពិនិត្យមើល និងធ្វើយ៉ាងម៉េចឱ្យបញ្ជីឈ្មោះហ្នឹង វាល្អប្រសើរ និងគុណតម្លៃសម្រាប់កិច្ចការងារ ចូលរួមពីភាគីពាក់ព័ន្ធ»។
លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកថ្លែងថា គណបក្សរបស់លោកបានទទួលសេចក្តីជូនដំណឹងរបស់ គជប រួចហើយ។ គណបក្សនឹងដាក់ពាក្យស្នើសុំចុះបញ្ជីភ្នាក់ងារ ដើម្បីតាមដានសង្កេតការណ៍ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ២០២១ ខាងមុខនេះ៕
វីដេអូ៖