កំពង់ធំៈ មន្ដ្រីឧទ្យានុរក្សនៃមន្ទីរបរិស្ថានខេត្ដកំពង់ធំ និងអង្គការធ្វើការងារផ្នែកអភិរក្សសត្វស្លាប បានកត់ត្រាប្រភេទសត្វស្លាប ពិសេសសត្វស្លាបដែលកំពុងឈានទៅរកការគំរាមកំហែងនៅលើពិភពលោក មានវត្ដមានជាង ៦០ ប្រភេទនៅតំបន់រ៉ាមសារស្ទឹងសែន និងបឹងឆ្មានៃខេត្ដកំពង់ធំ។
លោក តុប កក្កដា ប្រធានមន្ទីរបរិស្ថានខេត្តកំពង់ធំបានថ្លែងនៅថ្ងៃទី ៧ ខែកញ្ញា ថា រយៈពេលប៉ុន្មានឆ្នាំចុងក្រោយនេះ តាមរយៈការអង្កេត និងកត់ត្រាជាប្រចាំបានសង្កេតឃើញប្រភេទសត្វស្លាបជាច្រើនប្រភេទមានវត្តមាននៅក្នុងតំបន់រ៉ាមសារ ស្ទឹងសែន និងបឹងឆ្មានៃខេត្ដកំពង់ធំ។
លោកថ្លែងថា៖ «យើងឃើញមានវត្ដមានសត្វស្លាបជាង ៦០ ប្រភេទ ដែលបានមករកចំណីនៅតំបន់រ៉ាមសារស្ទឹងសែន និងបឹងឆ្មា។ លទ្ធផលនេះ គឺដោយសារការអនុវត្ដច្បាប់ចំពោះប្រជាពលរដ្ឋមួយចំនួន និងការចុះល្បាតជាប្រចាំរបស់មន្ដ្រីឧទ្យានុរក្ស»។
លោក កក្កដា បានឱ្យដឹងថា កាលពីមុននៅពេលរដូវវស្សាមកដល់ ប្រជាពលរដ្ឋតែងតែធ្វើសកម្មភាពដាក់អន្ទាក់ និងបំពុលសត្វស្លាប។ ប៉ុន្ដែនាប៉ុន្មានឆ្នាំចុងក្រោយនេះ តាមរយៈការរឹតបន្តឹង និងអនុវត្ដច្បាប់ លើសកម្មភាពល្មើសច្បាប់របស់ប្រជាពលរដ្ឋ គឺចំនួនវត្ដមានសត្វស្លាបបានកើនឡើងច្រើន ជាពិសេសប្រភេទសត្វដែលមិនធ្លាប់មានវត្ដមាននៅក្នុងតំបន់នេះ។
លោក ប៊ូ វរសក្ស នាយកស្តីទីអង្គការជីវិតធម្មជាតិនៅកម្ពុជា និងជានាយកកម្មវិធីអង្គការ BirdLife ថ្លែងថា នៅរៀងរាល់ដើមរដូវវស្សាសត្វស្លាបជាច្រើនប្រភេទ ដូចជា សត្វទុងប្រផេះ ជាដើម តែងតែផ្លាស់ទីមកតំបន់រ៉ាមសារស្ទឹងសែននេះ ដើម្បីរកចំណី ដល់ពេលទឹកស្រក វាក៏ផ្លាស់ទីទៅរកចំណីនៅកន្លែងផ្សេង។ សត្វទុងប្រផេះបានកំពុងបង្ហាញខ្លួននៅក្នុងតំបន់ដីសើមនេះប្រមាណជា ៤០ ក្បាល។ នេះបើយោងតាមកំណត់ត្រាក្នុងខែសីហាកន្លងទៅរបស់អង្គការជីវិតធម្មជាតិនៅកម្ពុជា។
តំបន់រ៉ាមសារ បឹងឆ្មា មានផ្ទៃដីជាង ២៨ ០០០ ហិកតា និងតំបន់រ៉ាមសារស្ទឹងសែន ១៨ ០០០ ហិកតា៕