.jpg)
ខ្សែកាប្លិ៍ និងខ្សែភ្លើងតភ្ជាប់រញ៉េរញ៉ៃនៅទីតាំង ១ កន្លែង ក្នុងរាជធានីភ្នំពេញ។ ហេង ជីវ័ន
ភ្នំពេញៈ រដ្ឋបាលរាជធានីភ្នំពេញ សម្រេចទុកពេល ១៥ ថ្ងៃ ឱ្យប្រជាពលរដ្ឋ ម្ចាស់អាជីវកម្មដ្ឋាន អង្គភាពរដ្ឋ នៅវិថីព្រះអង្គយុគន្ធ និងវិថីឧកញ៉ាសន្ធរម៉ុក ប្រញាប់រួសរាន់រៀបចំរុះរើខ្សែកាប្លិ៍អាកាសចេញ ដើម្បីលើកកម្ពស់សោភណភាពរាជធានីភ្នំពេញ ឱ្យកាន់តែល្អស្រស់បំព្រង។
តាមសេចក្តីជូនដំណឹងដែលចុះហត្ថលេខា ដោយលោកឃួង ស្រេង អភិបាលរាជធានីភ្នំពេញ កាលពីថ្ងៃទី ៦ ខែកញ្ញា បញ្ជាក់ថា ដើម្បីលើក កម្ពស់សោភណភាពរាជធានីភ្នំពេញ ឱ្យកាន់តែល្អស្រស់បំព្រង សក្តិសមជាបេះដូងនៃព្រះរាជាណាចក្រកម្ពុជា ក្រុមការងារចម្រុះរបស់រដ្ឋបាលរាជធានីភ្នំពេញ នឹងធ្វើការរៀបចំសណ្តាប់ធ្នាប់ បណ្តាញខ្សែកាបិ៍្លអាកាសតាមដងផ្លូវចំនួន២ គឺ វិថីព្រះអង្គយុគន្ធរ (ផ្លូវលេខ ១៩) ចាប់ពីផ្លូវលេខ ១០៨ ដល់ផ្លូវលេខ ៩៨ និងវិថីឧកញ៉ាសន្ធរម៉ុក (ផ្លូវលេខ ៩៨) ចាប់ពីផ្លូវលេខ ១៩ ដល់តិរៈវិថីព្រះស៊ីសុវត្ថិ។
រដ្ឋបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋ អង្គភាពរដ្ឋ បណ្តាក្រុមហ៊ុនឯកជន ក៏ដូចជាអ្នកពាក់ព័ន្ធទាំងអស់ផ្តល់ការអធ្យាស្រ័យ និងចូលរួមសហការអនុវត្តឱ្យបានម៉ឺងម៉ាត់តាមខ្លឹមសារខាងលើនេះ ប្រកបដោយស្មារតីទទួលខុសត្រូវខ្ពស់។ នេះបើតាមសេចក្តីជូនដំណឹង។
លោកម៉េត មាសភក្តី អ្នកនាំពាំក្យរដ្ឋបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែកញ្ញា ថា កិច្ចការនេះ រដ្ឋបាលរាជធានីភ្នំពេញ ធ្លាប់បានអនុវត្តនៅតាមផ្លូវជាច្រើនខ្សែរួចមកហើយ ដោយផ្តើមចេញពីផ្លូវធំៗ រួមមានផ្លូវនរោត្តម ផ្លូវសហព័ន្ធរុស្សី ផ្លូវម៉ៅសេទុង និងផ្លូវកម្ពុជាក្រោមជាដើម វាមិនមែនជាការងារថ្មីនោះទេ។
លោកថា រដ្ឋបាលរាជធានីភ្នំពេញមានផែនការ ជាបន្តបន្ទាប់ ដើម្បីឱ្យម្ចាស់អាជីវកម្មដ្ឋាន អង្គភាពរដ្ឋ រុះរើខ្សែកាប្លិ៍អាកាសចេញនៅតាមកំណាត់ផ្លូវផ្សេងៗទៀត ដើម្បីធ្វើយ៉ាងណាទម្លាក់ខ្សែកាប្លិ៍នេះចូលទៅក្នុងក្រោមដី សម្រាប់សោភណភាព និងសុវត្ថិភាពជូនប្រជាពលរដ្ឋដែលធ្វើដំណើរ និងរស់នៅក្នុងទីក្រុងភ្នំពេញ។
លោកថ្លែងថា៖ «កំណាត់ខ្សែមុន មានការចូលរួមពីប្រជាពលរដ្ឋ និងក្រុមហ៊ុន និងទទួលបានលទ្ធផលល្អប្រសើរ។ ប៉ុន្តែគ្រាន់តែការទម្លាក់ខ្សែកាប្លិ៍នេះ វាមិនអាចចប់បានទេ គឺត្រូវមានកម្មវិធីការងាររបស់យើង គឺត្រូវធ្វើខ្សែណាមុនជាដើម ហើយកិច្ចការងារថ្មីនេះ យើងបន្តពីការងារចាស់របស់យើង»។
ប្រជាពលដ្ឋម្នាក់រស់នៅក្នុងទីក្រុងភ្នំពេញ លោក ឡុង ហាន គាំទ្រវិធានការរបស់រដ្ឋបាលរាជធានីភ្នំពេញ ដែលតម្រូវឱ្យរុះរើខ្សែកាប្ល៍លើអាកាសនេះដែលធ្វើឱ្យទីក្រុងភ្នំពេញមានសោភណភាព។ ព្រោះកន្លែងខ្លះ គេបង្កប់នៅក្នុងដី ដែលមិនប៉ះពាល់ដល់សណ្តាប់ធ្នាប់សាធារណៈ។
លោកនិយាយថា នៅពេលបង្កប់ខ្សែកាប្លិ៍នេះនៅក្នុងដី វាមិនបង្កហានិភ័យដល់ការដាច់ខ្សែភ្លើង នៅពេលបាក់ដើមឈើ ឬរលំអគារផ្សេងៗ។ ប៉ុន្តែការរៀបចំខ្សែកាប្លិ៍នៅក្រោមដីនេះ និងការរុះរើ ក៏វាធ្វើឱ្យប៉ះពាល់ដល់ពលរដ្ឋ ដែលរស់នៅ និងប្រកបអាជីវកម្មនៅតាមផ្លូវផងដែរ ព្រោះត្រូវការពេលក្នុងការរុះរើនិងការរៀបចំ ។
លោកថ្លែងថា៖ «ទោះជាយ៉ាងណា ខ្ញុំគិតថា វាល្អនៅពេលដែលរើខ្សែកាប្លិ៍លើអាកាសនេះចេញ។ ព្រោះកន្លែងខ្លះ ខ្ញុំឃើញវាមានភាពរញ៉េរញ៉ៃ ហើយនៅពេលដែលត្រូវរើរុះចេញ វាមានសោភណភាពល្អប្រសើរនៅក្នុងទីក្រុងភ្នំពេញ»៕
វីដេអូ៖
