ភ្នំពេញៈ អ្នកកាសែតចំនួន ១០ នាក់ ដែលត្រូវបានចាប់ខ្លួនក្នុងបទកំហែងយកបា្រក់កំពុងត្រូវបានមន្ត្រីកងរាជអាវុធហត្ថខេត្តស្ទឹងត្រែងសាកសួរ ក្រោយពីពួកគេបានឃាត់រថយន្តដឹកឈើ ១ គ្រឿង របស់ប្រជាពលរដ្ឋ កាលពីថ្ងៃទី ៧ កញ្ញា។ នេះបើតាមមន្ត្រីកងរាជអាវុធហត្ថលើផ្ទៃប្រទេស។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី និយាយនៅថ្ងៃពុធថា មន្ត្រីជំនាញកងរាជអាវុធហត្ថខេត្តស្ទឹងត្រែង កំពុងដំណើការនីតិវិធីស៊ើបសួរ ដើម្បីយកចម្លើយពីអ្នកសារព័ត៌មានចំនួន ១០ នាក់ ដែលត្រូវបានឃាត់ខ្លួន ក្នុងបទល្មើសកំហែងយក។
លោកថ្លែងថា កាលពីព្រឹកថ្ងៃទី ៧ កញ្ញា ឆ្នាំ ២០២១ ក្រុមអ្នកសារព័ត៌មានទាំងនោះ បានធ្វើសកម្មភាពល្មើសច្បាប់ ដោយបានឃាត់រថយន្តដឹកឈើ១គ្រឿងឱ្យឈប់នៅលើកំណាត់ផ្លូវជាតិលេខ៩ នៅត្រង់ចំណុច ផ្លូវចូលភូមិជាំធំ ឃុំស្រែឫស្សី ស្រុកថាឡាបរិវ៉ាត់ ខេត្តស្ទឹងត្រែង ហើយបានកំហែងយកប្រាក់ចំនួន ៤ ០០០ ដុល្លារ ពីអ្នកដឹកឈើនោះ។
លោកបញ្ជាក់ថា៖ «ក្រោយទទួលបណ្ដឹងពីម្ចាស់រថយន្តដឹកឈើ ក្រុមកម្លាំងកងរាជអាវុធហត្ថខេត្តស្ទឹងត្រែង បានចុះអន្តរាគមន៍ បង្ក្រាបចាប់ជនសង្ស័យជាអ្នកសារព័ត៌មានចំនួន ៣ នាក់បានភ្លាមៗ នៅកន្លែងកើតហេតុ»។
លោក អេង ហ៊ី បន្ថែមថា៖ «ចំណែក ៧ នាក់ទៀត បានឡើងជិះរថយន្តបើករត់គេចឆ្ពោះទៅខេត្តព្រះវិហារ ហើយក៏ត្រូវបានកម្លាំងកងរាជអាវុធហត្ថស្រុកឆែប ខេត្តព្រះវិហារ សហការចាប់បញ្ជូនមកកាន់ខេត្តស្ទឹងត្រែងវិញ ដើម្បីចំណាត់ការនីតិវិធីទៅតាមផ្លូវច្បាប់។ នៅពេលនេះ ពួកគេកំពុងស្ថិតក្រោមការស៊ើបសួរចម្លើយពីមន្ត្រីជំនាញកងរាជអាវុធហត្ថនៅឡើយ»។
បើតាមលោក សេង សំអាន មេបញ្ជាការកងរាជអាវុធហត្ថមូលដ្ឋានស្រុកថាឡាបរិវ៉ាត់ ខេត្តស្ទឹងត្រែង នៅព្រឹកថ្ងៃទី ៧ កញ្ញា គេបានឃើញក្រុមអ្នកសារព័ត៌មានទាំងនោះមានគ្នា ១១ នាក់ បានធ្វើដំណើរតាមរថយន្តចំនួន៣គ្រឿងប្រដេញតាមរថយន្តយីឌុក១គ្រឿង ដែលផ្ទុកពេញទៅដោយឈើគ្រឿងផ្ទះចាស់ៗ។
លុះមកដល់ចំណុចកើតហេតុ ពួកគេក៏បានកាក់រថយន្តយីឌុកនោះជាប់ ហើយបានសំឡុតទារប្រាក់ចំនួន ៤ ០០០ ដុល្លារ ពីអ្នកបើកបររថយន្តដឹកឈើនោះ។ ប៉ុន្តែម្ចាស់ឈើនិងជាអ្នកបើករថយន្តដឹកឈើគ្រឿងផ្ទះចាស់ៗនោះមិនព្រម ព្រោះគាត់សំអាងលើលិខិតអនុញ្ញាតពីមន្ត្រីជំនាញផ្នែករដ្ឋបាលព្រៃឈើថាឡាបរិវ៉ាត់ ដើម្បីដឹកឈើនោះទៅប្រើប្រាស់សង់ផ្ទះនៅខេត្តតាកែវ។
លោកបញ្ជាក់ថា៖ «តាមការអះអាងរបស់បុរសជាម្ចាស់ឈើ ក្រុមអ្នកសារព័ត៌មានទាំងនោះ នៅតែទាមទារឱ្យគាត់បង់ប្រាក់ឱ្យពួកគេ ៤ ០០០ ដុល្លារ បើទោះជាគាត់បានបង្ហាញលិខិតអនុញ្ញាតនោះឱ្យពួកគេពិនិត្យក៏ដោយ។ ដោយទ្រាំពុំបានគាត់ក៏សម្រេចចិត្តទូរស័ព្ទប្ដឹងមកកាន់សមត្ថកិច្ចយើងឱ្យជួយអន្តរាគមន៍ ដោយចោទប្រកាន់ក្រុមអ្នកសារព័ត៌មានទាំងនោះ ពីបទកំហែងយក»។
លោកបន្តថា ក្រោយពីមានពាក្យបណ្ដឹង ពីអ្នកដឹកឈើ កម្លាំងកងរាជអាវុធហត្ថខេត្តស្ទឹងត្រែង ក្រោមកិច្ចសហការជាមួយកម្លាំងកងរាជអាវុធហត្ថមូលដ្ឋានស្រុកថាឡាបរិវ៉ាត់ ក៏បានឃាត់រថយន្ត ១ គ្រឿង និងមនុស្ស៣នាក់។ ចំណែករថយន្ត ២ គ្រឿង និងមនុស្ស ៧ នាក់ទៀត ត្រូវបានកងរាជអាវុធហត្ថ ស្រុកឆែប ខេត្តព្រះវិហារ ឃាត់បញ្ជូនមកខេត្តស្ទឹងត្រែង។ រីឯម្នាក់ទៀត កំពុងត្រូវបានតាមស្វែងរកចាប់ខ្លួន។
លោកបន្ថែមថា ជនសង្ស័យទាំង ១០ នាក់ ត្រូវបានបញ្ជូនខ្លួនភ្លាមៗទៅកាន់ការិយាល័យព្រហ្មទណ្ឌកងរាជអាវុធហត្ថខេត្តស្ទឹងត្រែង ដើម្បីមានចំណាត់ការតាមនីតិវិធី។ ចំណែកវត្ថុតាងរថយន្ត៣គ្រឿងរបស់ជនសង្ស័យ និងរថយន្តដឹកឈើ ដែលជាភាគីម្ចាស់បណ្ដឹងត្រូវបានឃាត់ទុក ជាបណ្ដោះអាសន្ននៅបញ្ជាការដ្ឋានកងរាជអាវុធហត្ថខេត្តផងដែរ៕
វីដេអូ៖