.jpg)
លោក ហង់ជួន ណារ៉ុន (ស្ដាំ) និងភាគីក្រុមហ៊ុនចុះហត្ថលេខាពីថ្ងៃ ៧ កញ្ញា។ រូបថត ក្រសួងអប់រំ
ភ្នំពេញៈ ក្រសួងអប់រំយុវជន និងកីឡា តាមរយៈការចុះអនុស្សរណៈជាមួយក្រុមហ៊ុន Prince Holding Group លើកម្មវិធី «អាហារូបករណ៍ចេនហ្ស៊ីសម្រាប់និស្សិតកម្ពុជា» នឹងផ្ដល់អាហារូបករណ៍រួមមាន ថ្លៃសិក្សាប្រចាំឆ្នាំ និងប្រាក់ឧបត្ថម្ភប្រចាំខែដល់និស្សិតកម្ពុជា ៤០០ នាក់ រយៈពេល ៧ ឆ្នាំ (ឆ្នាំ២០២២-២៨) សម្រាប់សិក្សាថ្នាក់បរិញ្ញាបត្រ។
តាមសេចក្ដីប្រកាសព័ត៌មានរបស់ក្រសួងអប់រំនៅថ្ងៃទី ៨ កញ្ញាឱ្យដឹងថា ការចុះអនុស្សរណៈនេះត្រូវបានធ្វើឡើងរវាងលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក ចេន ហ្ស៊ី អគ្គនាយកក្រុមហ៊ុន Prince Holding Group កាលពីថ្ងៃទី ៧ កញ្ញា នៅទីស្ដីការក្រសួងអប់រំ។
បើតាមសេចក្ដីប្រកាសព័ត៌មាន និស្សិតដែលអាចទទួលអាហារូបករណ៍នេះនឹងមានឱកាសចូលសិក្សានៅសាកលវិទ្យាល័យរដ្ឋចំនួន ៣ រួមមាន សាកលវិទ្យាល័យភូមិន្ទភ្នំពេញ (ជំនាញព័ត៌មានវិទ្យា វិស្វកម្មបច្ចេកវិទ្យាព័ត៌មាន និងពាណិជ្ជកម្មអន្តរជាតិ) សាកលវិទ្យាល័យជាតិគ្រប់គ្រង (ជំនាញសេដ្ឋកិច្ចឌីជីថល និងបដិសណ្ឋារកិច្ច) និងវិទ្យាស្ថានបច្ចេកវិទ្យាកម្ពុជា (ជំនាញសំណង់ស៊ីវិល)។ សរុបមក សម្ព័ន្ធក្រុមហ៊ុន ព្រីនស៍ គ្រុប នឹងផ្តល់ថវិកាជាង ២ លានដុល្លារក្នុងរយៈពេល ៧ ឆ្នាំ។
ក្រៅពីនេះ ក្រុមហ៊ុននឹងផ្តល់ឱកាសការងារជូនដល់និស្សិតជយលាភីដែលទទួលអាហារូបករណ៍នេះឱ្យចូលហ្វឹកហាត់ការងារនៅក្នុងបណ្តាញធុរកិច្ចនៃក្រុមហ៊ុនបន្ថែមទៀត។
ចំណែកលោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡាបានស្វាគមន៍គំនិតផ្តួចផ្តើម និងការរៀបចំកម្មវិធីអាហារូបករណ៍នេះ ហើយថាក្រសួងនឹងផ្តល់ការសម្របសម្រួលដល់ការជ្រើសរើសនិស្សិតជយលាភី។ នេះបើតាមសេចក្ដីប្រកាសព័ត៌មាន។
លោករដ្ឋមន្ដ្រីបានលើកឡើងថា៖ «ផ្លូវឆ្ពោះទៅរកការងើបឡើងវិញរបស់ប្រទេសកម្ពុជានឹងទាមទារឱ្យមានគំនិតថ្មីៗមកពីគ្រប់តំបន់នៃប្រទេស និងក្រសួងអប់រំរួមជាមួយដៃគូនានា គឺនឹងអាចយកឈ្នះរាល់ឧបសគ្គទាំងឡាយ។ តាមរយៈការផ្តល់ការណែនាំ តម្រង់ទិស ការធានានូវលទ្ធភាពទទួលបានការអប់រំប្រកបដោយសមធម៌ និងឱកាសការងារ ដើម្បីធានាបានថា និស្សិតដែលមានទេពកោសល្យផ្តោតទៅលើការរៀនសូត្រនឹងទទួលបាននូវជំនាញដែលមានសារៈសំខាន់សម្រាប់អនាគតរបស់ប្រទេសកម្ពុជា»។
លោក Gabriel Tan ប្រធានផ្នែកទំនាក់ទំនងនៃក្រុមហ៊ុន Prince Holding Group បានថ្លែងថា ក្រុមហ៊ុនមានសេចក្តីរីករាយដែលបានបើកដំណើរការកម្មវិធីអាហារូបករណ៍ធំបំផុតមួយនៅកម្ពុជាដែលទទួលបានការឧបត្ថម្ភដោយសហគ្រាសឯកជន។
លោកថ្លែងថា៖ «អង្គភាពផ្សេងៗរបស់សម្ព័ន្ធក្រុមហ៊ុន ព្រីនស៍ គ្រុប មានក្តីរំភើបរីករាយក្នុងការទទួលស្វាគមន៍និស្សិតកម្ពុជាឱ្យចូលមកចូលរួមជាមួយគ្រួសាររបស់យើង ដែលយើងនឹងបង្កើតនូវកម្មវិធីកម្មសិក្សាដ៏រឹងមាំ និងការបណ្តុះបណ្តាលសិក្ខាកាមក្នុងការគ្រប់គ្រង ដើម្បីអប់រំអ្នកដឹកនាំសម្រាប់ថ្ងៃស្អែក»។
លោកបានបន្តថា អាហារូបករណ៍ ចេន ហ្ស៊ី បាននិងកំពុងស្វែងរកការផ្តល់ជូនទាំងទៅលើបទពិសោធសិក្សា និងបទពិសោធការងារជាក់ស្តែងដល់សិស្សនិស្សិតតាមរយៈការផ្តល់នូវការអប់រំកម្រិតដំបូងហើយទទួលបាននូវបទពិសោធការងារលំដាប់អន្តរជាតិ។
តាមសេចក្ដីប្រកាសព័ត៌មាន សម្ព័ន្ធក្រុមហ៊ុន ព្រីនស៍ គ្រុប នឹងធ្វើការជាមួយក្រសួងអប់រំ ដើម្បីធានាបានថានិស្សិតទទួលបានការគាំទ្រផ្នែកហិរញ្ញវត្ថុ ការបណ្តុះបណ្តាល ការណែនាំបង្ហាត់បង្ហាញ និងឱកាសការងារ ដើម្បីជំរុញដល់ការសិក្សាក្នុងវិស័យចំនួន ៣ រួមមាន ការអភិវឌ្ឍប្រកបដោយចីរភាពនៃវិស័យអចលនទ្រព្យ ការជំរុញនៃការរួមបញ្ចូលហិរញ្ញវត្ថុ និងសេដ្ឋកិច្ចឌីជីថលនៅក្នុងវិស័យធនាគារ និងហិរញ្ញវត្ថុ ព្រមទាំងការលើកកម្ពស់ស្តង់ដាបដិសណ្ឋារកិច្ចលំដាប់ពិភពលោក ដើម្បីបំពេញតម្រូវការមូលធននៃធនធានមនុស្សនាពេលអនាគតសម្រាប់សេដ្ឋកិច្ចក្នុងតំបន់៕
