.jpg)
មន្ត្រីនគរបាលដែលប្រើហិង្សា និងនារីរងគ្រោះ។ រូបថត ប៉ូលិស
ភ្នំពេញៈ សមត្ថកិច្ចនគរបាលបានឃាត់ខ្លួនមន្ត្រីនគរបាលអន្តរាគមន៍នៃអធិការដ្ឋាននគរបាលខណ្ឌ៧មករាម្នាក់ បន្ទាប់ពីមានបទបញ្ជាពីលោក នេត សាវឿន អគ្គស្នងការនគរបាលជាតិ និងលោកស្នងការនគរបាលរាជធានីភ្នំពេញ ពាក់ព័ន្ធនឹងការប្រើហិង្សាលើនារីអ្នកជិះម៉ូតូមិនគោរពច្បាប់ចរាចរណ៍ម្នាក់បណ្ដាលឱ្យរងរបួសកាលពីយប់ថ្ងៃទី ៨ ខែកញ្ញា។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានឱ្យដឹងនៅថ្ងៃទី ៩ ខែកញ្ញានេះថា ការឃាត់ខ្លួន និងចាត់វិធានការទៅតាមច្បាប់ចំពោះមន្ត្រីនគរបាលខណ្ឌ៧មករាម្នាក់នេះ គឺដោយអនុវត្តតាមបទបញ្ជារបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកលោក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ។ បច្ចុប្បន្ន មន្ត្រីនគរបាលដែលប្រើហិង្សានោះត្រូវបានឃាត់ខ្លួននៅអធិការដ្ឋាននគរបាលខណ្ឌ ៧មករា ភ្លាមៗបន្ទាប់ពីបានកើតហេតុ។
លោកថ្លែងថា៖ «កម្លាំងសមត្ថកិច្ចនឹងឱ្យមន្ត្រីបង្កហេតុជួបជាមួយក្រុមគ្រួសារជនរងគ្រោះចរចាគ្នារឿងសំណងថ្លៃព្យាបាល។ បើជនរងគ្រោះមិនសុខចិត្តសមត្ថកិច្ចនឹងអនុវត្តបន្តដោយកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធីច្បាប់»។
លោក សាន សុខសីហា បានបញ្ជាក់ថា៖ «ប្រសិនបើជនរងគ្រោះចរាចរណ៍ត្រូវគ្នាបញ្ចប់រឿងត្រឹមសំណងមន្ត្រីនោះក៏នៅតែត្រូវអនុវត្តវិន័យកងកម្លាំងផងដែរ។ ចំពោះអ្នកបើកបរល្មើសច្បាប់ចរាចរណ៍គេចពីសមត្ថកិច្ចក៏នឹងត្រូវអនុវត្តតាមច្បាប់ផងដែរ»។
នៅវេលាម៉ោងប្រមាណ ៨ និង ២០ នាទីយប់ ថ្ងៃទី ៨ ខែ កញ្ញា ឆ្នាំ ២០២១ មានករណីប្រើអំពើហិង្សាមួយប្រព្រឹត្តដោយមន្ត្រីនគរបាលខណ្ឌ៧មករា ទៅលើនារីអ្នកជិះម៉ូតូមិនពាក់មួកសុវត្ថិភាពម្នាក់នៅក្នុងសង្កាត់វាលវង់ ខណ្ឌ ៧មករា រាជធានីភ្នំពេញ បណ្ដាលឱ្យរងរបួស។
បើតាមរបាយការណ៍របស់ស្នងការដ្ឋាននគរបាលរាជធានីភ្នំពេញ មុនពេលកើតហេតុ ជនរងគ្រោះ ២ នាក់បងប្អូន បានជិះម៉ូតូដោយមិនពាក់មួកសុវត្ថិភាព។ លុះពេលជិះដល់គោលដៅត្រួតពិនិត្យ ក៏ព្យាយាមជិះបកក្រោយវិញ ហើយក៏ត្រូវបានមន្ត្រីនគរបាលម្នាក់យកអាយកូមវាយបណ្តាលឱ្យត្រូវនារីអ្នកជិះខាងក្រោយបែកក្បាល និងធ្លាក់ពីលើម៉ូតូផងដែរ។
របាយការណ៍បានឱ្យដឹងថា នារីជាជនរងគ្រោះក្នុងអំពើហិង្សានេះ មានឈ្មោះ ងន ស្រីនិច អាយុ ២២ ឆ្នាំ។ រីឯអ្នកឌុបជាប្អូនប្រុសឈ្មោះ ងន សិលា អាយុ ១៨ ឆ្នាំ។ ចំណែក មន្ត្រីអន្តរាគមន៍ដែលប្រើហិង្សាត្រូវបានគេស្គាល់ថា មាន ឈ្មោះ ម៉ាត់ ពិសី៕
វីដេអូ៖
