.jpg)
លោក នេត្រ ភក្ត្រា ប្រគល់រង្វាន់ដល់សាលាដែលឈ្នះជយលាភីសាលាមេត្រីបរិស្ថាន។ រូប បរិស្ថាន
ភ្នំពេញៈ សាលាបឋមសិក្សា និងមធ្យមសិក្សាចំនួន ៦ ទទួលជយលាភីសាលាមេត្រីបរិស្ថានឆ្នាំ ២០២១ ក្រោយពីបញ្ចប់ការជ្រើសរើសចេញពីចលនាប្រឡងប្រណាំងសាលាមេត្រីបរិស្ថានឆ្នាំនេះ ក្នុងចំណោមសាលាបឋមសិក្សា និងមធ្យមសិក្សាសរុបចំនួន ៤៨ នៅទូទាំងប្រទេស។ នេះបើតាមក្រសួងបរិស្ថាន។
សាលាជយលាភីទាំង ៦ នោះរួមមានសម្រាប់កម្រិតបឋមសិក្សា ទី ១ សាលាបឋមសិក្សាវត្តចែងខេត្តបាត់ដំបង ជយលាភីកម្រិតមាស ២ សាលាបឋមសិក្សាក្រវាន់ខេត្តសៀមរាប ជយលាភីកម្រិតប្រាក់ ៣ សាលាបឋមសិក្សាឈើខ្លឹម ខេត្តត្បូងឃ្មុំ ជយលាភីកម្រិតសំរឹទ្ធ។ ចំណែកសាលាជយលាភីកម្រិតមធ្យមសិក្សា រួមមាន ទី ១ វិទ្យាល័យ ហ៊ុន សែន មិត្តភាព ខេត្តព្រះសីហនុ ទទួលបានជយលាភីកម្រិតមាស ២ វិទ្យាល័យ ហ៊ុន សែន សម្ភៈបុរៈ ខេត្តក្រចេះទទួលបានជយលាភីកម្រិតប្រាក់ ៣ វិទ្យាល័យ ចំណេះទូទៅ និងបច្ចេកទេស ព្រះបាទសម្តេចព្រះបរមនាថ នរោត្តម សីហមុនី ខេត្តកំពង់ឆ្នាំង ទទួលបានជយលាភីកម្រិតសំរិទ្ធ។
លោក នេត្រ ភក្ត្រា រដ្ឋលេខាធិការក្រសួងបរិស្ថាននៅថ្ងៃទី ៨ កញ្ញា បានធ្វើជាអធិបតីក្នុងពិធីប្រគល់ពានរង្វាន់ និងវិញ្ញាបនបត្រព្រមទាំងថវិកាមួយចំនួនដល់សាលារៀនជយលាភីមេដាយមាស គឺសាលាបឋមសិក្សា វត្តចែង ខេត្តបាត់ដំបង និងជយលាភីមេដាយសំរិទ្ធ គឺវិទ្យាល័យចំណេះទូទៅ និងបច្ចេកទេសព្រះបាទសម្តេចព្រះបរមនាថ នរោត្តម សីហមុនី ខេត្តកំពង់ឆ្នាំង។
លោកថ្លែងថា ក្រសួងបរិស្ថានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារសម្របសម្រួលកិច្ចសហប្រតិបត្តិការរវាងក្រសួងបរិស្ថាន និងក្រសួងអប់រំ យុវជន និងកីឡា ក្នុងក្របខ័ណ្ឌការងារអប់រំ ការងារបណ្តុះបណ្តាលការសិក្សាស្រាវជ្រាវ និងការងារផ្តល់សេវាពិគ្រោះយោបល់លើវិស័យបរិស្ថាន។ ជាពិសេសគណៈកម្មការវាយតម្លៃសាលាមេត្រីបរិស្ថាន ដែលបានផ្តល់កិច្ចសហការយ៉ាងល្អប្រសើរ និងទទួលបានលទ្ធផលជាផ្លែផ្កាគួរឱ្យកត់សម្គាល់ក្នុងការរៀបចំការប្រឡងប្រណាំងសាលាមេត្រីបរិស្ថានចំនួន ៣ លើកមកនេះ។
លោកក៏បានកោតសរសើរចំពោះសាលាបឋមសិក្សា និងមធ្យមសិក្សាចំនួន ៤៨ ទៀតដែលបានចូលរួមក្នុងចលនាប្រឡងប្រណាំងមេត្រីបរិស្ថាននៅឆ្នាំ ២០២១នេះ។ ការប្រកួតប្រជែងសាលាមេត្រីបរិស្ថានបានធ្វើឡើងរៀងរាល់ ២ ឆ្នាំម្តង ហើយឆ្នាំនេះ គឺជាលើកទី ៣។
លោក នេត្រ ភក្ត្រា បញ្ជាក់ថា៖ «ការប្រឡងប្រណាំងសាលាមេត្រីបរិស្ថាន គឺជាគំនិតផ្តួចផ្តើម និងជាយន្តការមួយដ៏មានសារៈសំខាន់ក្នុងចំណោមយន្តការ និងវិធានការជាច្រើនទៀត ដែលក្រសួងបរិស្ថាន និងភាគីពាក់ព័ន្ធទាំងអស់បានខិតខំជំរុញអនុវត្តជាបន្តបន្ទាប់»។
លោកបន្តថា គំនិតផ្តួចផ្ដើមនេះសំដៅធ្វើឱ្យប្រសើរឡើងនូវកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវចម្រុះ និងការរស់នៅដោយចីរភាពតាមរយៈការបញ្ជ្រាបចំណេះដឹង និងចំណេះធ្វើក្នុងចំណោមកុមារ សិស្សានុសិស្ស និងយុវជននៅតាមសាលារៀន និងគ្រឹះស្ថានអប់រំ ដែលជាកន្លែងប្រមូលផ្តុំមានលក្ខណៈងាយស្រួលក្នុងការផ្លាស់ប្តូរទម្លាប់ ផ្នត់គំនិត និងឥរិយាបថរបស់កុមារ និងយុវជនចំពោះអនាម័យ និងបរិស្ថាន។
លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន លើកឡើងថា ការរៀបចំផ្តល់តម្លៃសាលាមេត្រីបរិស្ថាន បានជំរុញ និងលើកទឹកចិត្តដល់សាលារៀនទាំងអស់បន្តវប្បធម៌ស្រឡាញ់ និងចូលរួមក្នុងសកម្មភាពមេត្រីបរិស្ថានកាន់តែប្រសើរឡើងថែមទៀត។
លោកថ្លែងថា៖ «ដូចនេះ សាលារៀនចាំបាច់ត្រូវសហការជិតស្និទ្ធជាមួយអាជ្ញាធរដែនដីគ្រប់លំដាប់ថ្នាក់ អ្នកពាក់ព័ន្ធដទៃទៀតក្នុងសហគមន៍ អាណាព្យាបាលសិស្ស ដើម្បីធានាឱ្យបាននូវការអប់រំបរិស្ថាន ដើម្បីមូលដ្ឋានស្អាត សុខភាពល្អ និងមានការអភិវឌ្ឍរុងរឿង»។
បើតាមក្រសួងបរិស្ថាន ចលនាសាលាមេត្រីបរិស្ថានកម្ពុជា ឆ្លុះបញ្ចាំងយ៉ាងច្បាស់នូវការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ជាពិសេសក្រសួងបរិស្ថាន និងក្រសួងអប់រំលើការបញ្ជ្រាបចំណេះដឹង ការផ្លាស់ប្ដូរផ្នត់គំនិត។ ការលើកកម្ពស់ស្មារតីស្រឡាញ់បរិស្ថាន និងការជំរុញប្រតិបត្តិមេត្រីភាពបរិស្ថាន សំដៅគាំទ្រដល់កិច្ចគាំពារបរិស្ថាន ការអភិរក្សជីវចម្រុះ ការប្រើប្រាស់ធនធានធម្មជាតិឱ្យបានសមស្រប និងមាននិរន្តរភាព និងការរស់នៅដោយចីរភាព។
ដើម្បីទទួលបានជយលាភីសាលាមេត្រីបរិស្ថាន សាលារៀនត្រូវមានលក្ខខណ្ឌវិនិច្ឆ័យ ៤ ចំណុច គឺទី១ មានគោលការណ៍ និងរដ្ឋបាលរបស់សាលាលើការងារបរិស្ថាន ទី២ មានការបង្រៀនមេរៀនបរិស្ថាន និងសកម្មភាពអប់រំបរិស្ថានក្នុងសាលា និងសហគមន៍ជុំវិញ។ ទី៣ ជាកម្មវិធីសិក្សាបន្ថែម ឬបញ្ជ្រាបមានសម្ភារបរិក្ខារអប់រំបរិស្ថាន ហេដ្ឋារចនាសម្ព័ន្ធនានា និងការប្រតិបត្តិ បរិស្ថាន ទី៤ មានភាពជាដៃគូជាមួយអ្នកពាក់ព័ន្ធ និងការផ្សព្វផ្សាយតាមសហគមន៍៕
