បន្ទាយមានជ័យៈ ក្រុមការងារបច្ចេកទេសនៃមន្ទីរសុខាភិបាលខេត្ដបន្ទាយមានជ័យបានចាប់ផ្ដើមស្រាវជ្រាវ ភាពមិនប្រក្រតីនៃការគ្រប់គ្រងសេវាសុខាភិបាលរបស់លោក ច័ន្ទ វុឌ្ឍីណាវុឌ្ឍ ប្រធានមន្ទីរពេទ្យមិត្តភាពកម្ពុជា-ជប៉ុនមង្គលបូរី ក្រោយពីលោក អ៊ុំ រាត្រី អភិបាលខេត្តបន្ទាយមានជ័យ រិះគន់ដោយបានផ្សព្វផ្សាយតាមហ្វេសប៊ុកប៉ុន្មានថ្ងៃកន្លងមកនេះ។
លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៧ ខែកញ្ញានេះថា៖ «មកពេលពេលនេះ យើងមិនទាន់មានសេចក្ដីសម្រេចណាមួយថា ដកតំណែងលោក ច័ន្ទ វុឌ្ឍីណាវុឌ្ឍ ចេញពីប្រធានមន្ទីរពេទ្យមិត្តភាពកម្ពុជា-ជប៉ុនមង្គលបូរីនៅឡើយទេ ដោយក្រុមការងារបច្ចេកទេសកំពុងស្រាវជ្រាវ ប្រមូលព័ត៌មានលម្អិតលើការអនុវត្ដការងាររបស់ប្រធានមន្ទីរពេទ្យរូបនេះ ដើម្បីដាក់របាយការណ៍ទៅលោក អ៊ុំ រាត្រី ពិនិត្យសម្រេចតាមលក្ខន្តិកៈមន្ដ្រីរាជការ»។
លោក ច័ន្ទសង្វាតបានឱ្យដឹងថា ជាទូទៅទាក់ទងនឹងការងាររបស់មន្ដ្រីសុខាភិបាលខេត្ដគឺមានក្រមសីលធម៌វិជ្ជាជីវៈស្ដីពីលក្ខន្តិកៈមន្ដ្រីរាជការ។ ដូច្នេះទាមទារឱ្យមានការស្រាវជ្រាវមើលលើបាតុភាពដែលបានកើតឡើងថាតើមានកំហុសមែនឬទេ? កំហុសនោះមានទំហំប៉ុនណា? ជាដើម ដើម្បីមានវិធានការសម្រេច។
លោកថ្លែងថា៖ «បើសិនជាគាត់មានកំហុសយើងនឹងដាក់របាយការណ៍ទៅអភិបាលខេត្ដ ដើម្បីលោកពិនិត្យសម្រេចលើការដាក់ទណ្ឌកម្មវិន័យបែបៗណាទៅតាមលក្ខន្តិកៈមន្ដ្រីរាជការ។ មកដល់ម៉ោងនេះខ្ញុំអត់បាននិយាយអំពីទាក់ទងនឹងការផ្លាស់ប្ដូរទេ។ ខ្ញុំអត់មានផ្ដល់ព័ត៌មានទៅសារព័ត៌មានណាមួយ អំពីការផ្លាស់ប្ដូរ ការតែងតាំងណាមួយឡើយ»។
លោក ច័ន្ទសង្វាត បានឱ្យដឹងថា បច្ចុប្បន្នមន្ទីរសុខាភិបាលខេត្ដបានផ្ទេរមុខងារទាំងអស់ឱ្យស្ថិតនៅក្នុងការគ្រប់គ្រងរបស់រដ្ឋបាលខេត្ដក្រោមការគ្រប់គ្រងរបស់អភិបាលខេត្ដជាអ្នកសម្រេច។
លោកថា៖ «លោក ច័ន្ទ វុឌ្ឍីណាវុឌ្ឍ កន្លងមកមិនទាន់បានមានកំហុសដែលមន្ទីរសុខាភិបាលបានដាក់ទណ្ឌកម្ម ឬព្រមានដោយប្រការណាមួយទេ។ លោក វុឌ្ឍីណាវុឌ្ឍ បានខិតខំប្រឹងប្រែងបំពេញការងារបានល្អប្រសើរ ប៉ុន្ដែពេលខ្លះវាអាចជាការងារច្រើនក្នុងនាមជាអ្នកដឹកនាំ គឺយើងមិនចង់ឱ្យមានបញ្ហាកើតឡើងទេ»។
លោក ច័ន្ទសង្វាត បានឱ្យដឹងថា បញ្ហាខ្លះអាចមិនមែនផ្ដើមចេញអំពីលោកច័ន្ទ វុឌ្ឍីណាវុឌ្ឍទេ ប៉ុន្ដែអាចផ្ដើមចេញពីកូនចៅក្រោមឱវាទដែលអាចមានការធ្វេសប្រហែសលើការងារមួយចំនួន ដូច្នេះត្រូវការពិនិត្យលើលទ្ធភាពការងារនោះដែរ ហើយក្នុងនាមជាថ្នាក់ដឹកនាំលោក ច័ន្ទ វុឌ្ឍីណាវុឌ្ឍ គឺត្រូវតែទទួលខុសជំនួសកូនចៅ។
លោកបញ្ជាក់ថា ក្រុមការងារប្រមូលព័ត៌មានឱ្យបានគ្រប់ជ្រុងជ្រោយ ដើម្បីវិភាគនឹងដាក់ស្នើទៅលោកអភិបាលខេត្ដពិនិត្យពិចារណា។
លោកបន្តថា៖ «ប៉ុន្ដែជាទូទៅខ្ញុំគិតថាកំហុសឆ្គងនេះវាមិនជាបញ្ហាអ្វីធំដុំណាស់ណាទេ ប៉ុន្ដែជាធម្មតាក្នុងនាមជាអ្នកទទួលខុសត្រូវជាអ្នកដឹកនាំប្រធានមន្ទីរពេទ្យត្រូវតែទទួលខុសត្រូវហើយក្នុងការងារនេះ»។
លោក អ៊ុំ រាត្រី អភិបាលខេត្ដបន្ទាយមានជ័យនៅថ្ងៃទី ៧ ខែកញ្ញា មិនទាន់ឆ្លើយតបចំពោះករណីនេះទេ ក្រោយពីឃើញសំណួរភ្នំពេញប៉ុស្ដិ៍តាមបណ្ដាញសារតេឡេក្រាម។
កាលពីថ្ងៃទី ៤ ខែកញ្ញា លោកបានសរសេរបង្ហោះនៅលើហ្វេសប៊ុកថា៖ «ថ្ងៃនេះ [ទី ៤ ខែកញ្ញា] ម៉ោង ១០ និង ៥ នាទីយប់ខ្ញុំបានបរិច្ចាគឈាម ដើម្បីជួយសង្គ្រោះ លោក អិន លីអាន មានឋានន្តរស័ក្តិវរសេនីយ៍ទោជាក្រុមការងារអង្គរក្សសម្តេចតេជោដែលបានមកបំពេញបេសកកម្មនៅខេត្តបន្ទាយមានជ័យដែលត្រូវធ្វើការវះកាត់នៅមន្ទីរពេទ្យខេត្តមង្គលបូរីហើយដែលលោកប្រធានមន្ទីរពេទ្យប្រាប់ថា ជាគោលការណ៍ត្រូវរកអ្នកឱ្យឈាមជំនួស និងបង់ថ្លៃសេវាមុនធ្វើការវះកាត់ទោះអ្នកជំងឺធ្ងន់ក៏ដោយ»។
លោកបន្តថា៖ «តើការគ្រប់គ្រងរបៀបនេះគួរត្រូវសម្រេចយ៉ាងម៉េចចំពោះអ្នកគ្រប់គ្រងដែលមិនគិតពីក្រមសីលធម៌ និងមិនចេះចាត់ចែងការងារហើយមិនមែនលើកទី ១ ទេ គឺច្រើនលើកហើយដែលប្រជាពលរដ្ឋតែងតែរអ៊ូរទាំលើការផ្តល់សេវារបស់មន្ទីរពេទ្យដែលលោក ច័ន្ទវុឌ្ឍីណាវុឌ្ឍ ជាប្រធាន»។
លោក ស៊ុម ចាន់គា មន្ដ្រីសម្របសម្រួល សមាគមការពារសិទ្ធិមនុស្ស (អាដហុក) ប្រចាំខេត្ដបន្ទាយមានជ័យបានថ្លែងថា លោកអភិបាលខេត្ដ មិនគួរយករឿងរ៉ាវកំហុសកូនចៅមកបង្ហោះជាសាធារណៈបែបនេះទេ គួរតែហៅទៅប្រជុំ ឬធ្វើការណែនាំ ទើបជាការត្រឹមត្រូវ។
លោកបន្តថា៖ «នៅពេលខ្លះយើងឃើញការលើកឡើង ការបង្ហោះនោះ វាជាអារម្មណ៍មនុស្សម្នាក់ វាមិនអាចជាការទូទៅទេ។ ការបង្ហោះសាធារណៈបែបនេះ គឺបង្ហាញឱ្យគេឃើញពីកំហឹងរបស់គាត់។ ជាគោលការណ៍ ការអនុវត្ដការងារ ខុស ឬត្រូវ គួរតែមានការប្រឹក្សាលើក្រមសីលធម៌ វិជ្ជាជីវៈការងាររបស់មន្ដ្រីរាជការ»៕