.jpg)
ទិដ្ឋភាពនៃការបើកសិក្ខាសាលានៅថ្ងៃទី ៩ កញ្ញា ឆ្នាំនេះ។ រូបថត (គ.ជ.អ.ប)
ភ្នំពេញៈ លេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) នៅថ្ងៃទី ៩ ខែ កញ្ញា ឆ្នាំនេះ បានធ្វើសិក្ខាសាលាពិគ្រោះយោបល់តាមប្រព័ន្ធហ្សូមលើ «សេចក្តីព្រាងឯកសារកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (២០២១-២០៣០)» ដើម្បីប្រមូលធាតុចូលបន្ថែមទៅក្នុងឯកសារកម្មវិធីជាតិ។
លោក ង៉ាន់ ចំរើន រដ្ឋលេខាធិការក្រសួងមហាផ្ទៃនិងជាប្រធានលេខាធិការដ្ឋាន គ.ជ.អ.ប បានធ្វើជាអធិបតីក្នុងអង្គសិក្ខាសាលានេះដោយមានការចូលរួមពីតំណាងមកពីក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិទូទាំងប្រទេសជាង ៤៥០ នាក់។
លោកបានថ្លែងថា នាចុងឆ្នាំ ២០២០ កន្លងមកនេះ លេខាធិការដ្ឋាន គ.ជ.អ.ប បានអនុវត្តបញ្ចប់នូវកម្មវិធីជាតិរយៈពេល ១០ ឆ្នាំ ដំណាក់កាលទី១ (២០១០-២០២០) ដោយសម្រេចបាននូវសមិទ្ធផលថ្មីៗជាច្រើនបន្ថែមទៀតពាក់ព័ន្ធនឹងការរៀបចំនិងដាក់ឱ្យដំណើរការស្ថាប័នរដ្ឋបាលថ្នាក់ក្រោមជាតិស្របតាមគោលការណ៍នៃការអភិវឌ្ឍតាមបែបប្រជាធិបតេយ្យ។
លោក ង៉ាន់ ចំរើន បានឱ្យដឹងថា ក្នុងបំណងជំរុញការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការឱ្យកាន់តែស៊ីជម្រៅ រាជរដ្ឋាភិបាលបានសម្រេចរៀបចំនូវកម្មវិធីជាតិដំណាក់កាលទី២ សម្រាប់រយៈពេល ១០ ឆ្នាំបន្ថែមទៀត គឺចាប់ពីឆ្នាំ ២០២១ ដល់ឆ្នាំ ២០៣០។ ការរៀបចំកម្មវិធីជាតិនេះសំដៅបន្តពង្រឹងស្ថាប័នរដ្ឋបាលថ្នាក់ក្រោមជាតិឱ្យកាន់តែមានសក្តានុពលក្នុងការចូលរួមចំណែកសម្រេចបាននូវចក្ខុវិស័យរបស់រាជរដ្ឋាភិបាលនោះ គឺការប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០។
លោកថ្លែងថា៖ «សិក្ខាសាលានាពេលនេះគឺ ដើម្បីពិគ្រោះយោបល់ និងប្រមូលធាតុចូលនានាដើម្បីកែលម្អ និងរៀបចំបញ្ចប់នូវសេចក្តីព្រាងឯកសារកម្មវិធីជាតិដំណាក់កាលទី២ នេះ សម្រាប់ដាក់ឆ្លងកិច្ចប្រជុំ គ.ជ.អ.ប. មុននឹងដាក់ជូនរាជរដ្ឋាភិបាលពិនិត្យ និងសម្រេចនាពេល ឆាប់ៗខាងមុខនេះ»។
លោក ង៉ាន់ ចំរើន បានលើកឡើងថា ការរៀបចំតាក់តែងកម្មវិធីជាតិដំណាក់កាលទី២ នេះ គឺស្ថិតក្រោមការដឹកនាំ និងសម្របសម្រួលរបស់ គ.ជ.អ.ប. ដោយមានជំនួយបច្ចេកទេសពីក្រុមទីប្រឹក្សាជាតិ និងអន្តរជាតិដែលគាំទ្រដោយដៃគូអភិវឌ្ឍន៍មួយចំនួន។
ការរៀបចំតាក់តែងកម្មវិធីជាតិនេះបានចាប់ផ្ដើមក្នុងខែឧសភា ឆ្នាំ ២០២០ ដោយផ្តើមចេញពីការរៀបចំជាឯកសារទស្សនទានមួយដែលកំណត់នូវចក្ខុវិស័យពាក់ព័ន្ធនឹងសមិទ្ធផលរំពឹងទុកសំខាន់ៗនៃកំណែទម្រង់រដ្ឋបាលថ្នាក់ក្រោមជាតិ ដើម្បីតម្រង់ទិសក្នុងការរៀបចំតាក់តែងឯកសារលម្អិតនៃកម្មវិធីជាតិដំណាក់កាលទី២។
បើតាមលោក ង៉ាន់ ចំរើន ចក្ខុវិស័យសំខាន់នៃការរៀបចំ និងអនុវត្តកម្មវិធីជាតិដំណាក់កាលទី ២ នេះ គឺផ្តោតលើការបែងចែកសិទ្ធិអំណាច តួនាទី និងការទទួលខុសត្រូវរវាងក្រសួង ស្ថាប័នថ្នាក់ជាតិនិងរដ្ឋបាលថ្នាក់ក្រោមជាតិ ឱ្យកាន់តែមានភាពច្បាស់លាស់ស្របតាមគោលនយោបាយវិមជ្ឈការ។ ពោលគឺ«ការបង្ខិតការធ្វើសេចក្ដីសម្រេចចិត្តលើការផ្តល់សេវាសាធារណៈឱ្យទៅកៀកជិតប្រជាពលរដ្ឋ» ។
រដ្ឋាភិបាលកម្ពុជាបានដាក់ចេញផែនការរយៈពេល ១០ ឆ្នាំ ក្នុងការបន្តអនុវត្ដកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិតាមរយៈការបន្តធ្វើកំណែទម្រង់រចនាសម្ព័ន្ធរដ្ឋបាលសាធារណៈឱ្យកាន់តែស៊ីជម្រៅ និងមានប្រសិទ្ធភាពក្រោយពីអនុវត្ដកម្មវិធីនេះរយៈពេល ១០ ឆ្នាំដំបូង ដែលបានបញ្ចប់កាលពីចុងឆ្នាំ ២០២០ កន្លងទៅ។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃធ្លាប់បានលើកឡើងក្នុងពេលធ្វើជាអធិបតីក្នុងសិក្ខាសាលាបែបនេះកាលពីថ្ងៃទី ៦ ខែ វិច្ឆិកា ឆ្នាំ ២០២០ ថា ផ្អែកលើសមិទ្ធផល មេរៀនបទពិសោធ និងបញ្ហាប្រឈមនានាដែលត្រូវបន្តដោះស្រាយ និងដើម្បីចូលរួមចំណែកសម្រេចបាននូវចក្ខុវិស័យរបស់រាជរដ្ឋាភិបាលក្នុងការប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ រាជរដ្ឋាភិបាលចាំបាច់ត្រូវរៀបចំ និងដាក់ឱ្យអនុវត្តនូវកម្មវិធីជាតិដំណាក់កាលទី២ សម្រាប់រយៈពេល ១០ ឆ្នាំបន្ថែមទៀត គឺចាប់ពីឆ្នាំ ២០២១ ដល់ឆ្នាំ ២០៣០។
លោកបានថ្លែងថា ដើម្បីធានាដល់ការសម្រេចបាននូវចក្ខុវិស័យរយៈពេល ១០ ឆ្នាំខាងមុខ ចាំបាច់ត្រូវបន្តធ្វើកំណែទម្រង់រចនាសម្ព័ន្ធរដ្ឋបាលសាធារណៈឱ្យកាន់តែស៊ីជម្រៅ និងមានប្រសិទ្ធភាព។ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលសាធារណៈ គឺជាកត្តាដ៏មានសារៈសំខាន់មួយក្នុងការចូលរួមចំណែកសម្រេចបាននូវចក្ខុវិស័យនេះ៕
