ភ្នំពេញៈ មន្ត្រីបរិស្ថានខេត្តមណ្ឌលគិរីកំពុងសា្រវជ្រាវបទល្មើសកាប់រានដីព្រៃស្ថិតនៅភូមិពូលូង សង្កាត់រមនា ក្រុងសែនមនោរម្យ ប៉ុន្តែសហគមន៍ពូលូងនិងមន្ត្រីសង្គមស៊ីវិលលើកឡើងថា មានការកាប់រានទន្ទ្រានព្រៃអស់ទៅហើយទើបធ្វើការស្រាវជ្រាវ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី ថ្លែងនៅថ្ងៃទី ៩ កញ្ញា ថា ការកាប់រានទន្ទ្រានដីព្រៃនៅភូមិពូលូង កំពុងស្ថិតក្នុងការស្រាវជ្រាវមិនទាន់ដឹងថា ជាការកាប់រានក្នុងទ្រង់ទ្រាយធំ ឬយ៉ាងណានោះទេ។ ការឈូសឆាយដីព្រៃនៅតំបន់នោះ ភាគច្រើន គឺម្ចាស់កម្មសិទ្ធិ ដែលបានទិញហើយធ្វើការឈូសឆាយដើម្បីអភិវឌ្ឍដីរបស់ពួកគេ។
លោកថ្លែងថា៖ «ម្តុំហ្នឹងភាគច្រើនចម្ការគេដាំតាំងពីណាពីណីមក។ ជួនណាទៅគេអ្នកភ្នំពេញទៅទិញ ហើយគេស្តារកន្លែងហ្នឹងឡើងវិញអ៊ីចឹងទៅ។ គេឈូសដំណាំចាស់ទៅ ហើយគេធ្វើថ្មីឡើងវិញ ប៉ុន្តែយ៉ាងណាអត់ទាន់ដឹងច្បាស់ថាម៉េចទេ ព្រោះឥឡូវមន្ត្រីបរិស្ថានកំពុងស៊ើបមើល»។
អ្នកស្រីរឿន ហែង សមាជិកសហគមន៍ពូលូង និយាយនៅថ្ងៃទី ៩ កញ្ញាថា ការឈូសឆាយដីព្រៃនៅទីនោះមានដាក់គ្រឿងចក្រឈូសឆាយបានស្ទើររួចរាល់អស់ទៅហើយ។ ដីតំបន់នោះជាដីព្រៃរបស់រដ្ឋ ប៉ុន្តែត្រូវបានពលរដ្ឋជាអ្នកខិលខូចក្នុងភូមិឃុបឃិតជាមួយអាជ្ញាធរ ដើម្បីធ្វើការលក់ដូរឱ្យទៅអ្នកមានលុយ។ អ្នកស្រីប៉ាន់ប្រមាណថា ដីព្រៃដែលត្រូវបានឈូសឆាយនោះមានទំហំប្រមាណពី ៥០០ ទៅ ១ ០០០ ហិកតា។
អ្នកស្រីថ្លែងថា៖ «ខ្ញុំគិតថា វាអស់ទៅហើយ គេលែងឈូសហើយហ្នឹង ទើបឃើញគេចុះទៅពិនិត្យទៅមើល។ ខ្ញុំនិយាយឱ្យត្រង់ទៅពិនិត្យ ទៅមើលធ្វើអីទេ។ អាពេលមានព្រៃគគោក គេទៅកាប់ទៅត្រាយហ្នឹង មិនទៅមើលផង»។
លោក ភី ងូក ចៅសង្កាត់រមនា ថ្លែងនៅថ្ងៃទី ៩ កញ្ញាថា ជុំវិញរឿងនេះ លោកមិនទាន់បានដឹងច្បាស់នោះទេ ដោយលោកកំពុងស្រាវជ្រាវមើលករណីដែលកើតឡើងនៅតំបន់នោះផងដែរ។ លោកបញ្ជាក់ថា៖ «ចាំមើលខ្ញុំធ្វើការសិក្សាស្រាវជ្រាវមើលសិន។ បើបានលទ្ធផលយ៉ាងណាចាំខ្ញុំផ្តល់ជូននៅពេលក្រោយ»។
អ្នកស្រី យុន រ៉ាវី អ្នកសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តមណ្ឌលគិរី ថ្លែងនៅថ្ងៃទី ៩ កញ្ញាថា ដីព្រៃនៅតំបន់នោះត្រូវបានឈូសឆាយអស់ទៅហើយ ដោយគ្មានការទប់ស្កាត់តាំងពីដើមទីមក។ ចំណែកខាងសហគមន៍ ក៏មិនបានរាយការណ៍ ឬក៏ស្វែងរកការអន្តរាគមន៍ពីខាងណាមួយ ដើម្បីជួយដោះស្រាយនោះដែរ។ ដើម្បីរក្សាការពារដីព្រៃរបស់រដ្ឋកុំឱ្យបាត់បង់ លុះត្រាតែ ពលរដ្ឋជាម្ចាស់ដីធ្លី ព្រៃឈើទាំងអស់គ្នាមានការសហការគ្នាល្អទៅវិញទៅមក។ គ្រប់គ្នាអាចការពារព្រៃឈើ ដែលនៅសេសសល់បាន ដោយពង្រឹងឡើងវិញ ឱ្យសហគមន៍មានការយល់ដឹងរឿងដីធ្លីព្រៃឈើ និងធនធានធម្មជាតិទាំងអស់។
អ្នកស្រីថ្លែងថា៖ «យើងមានវគ្គបណ្តុះបណ្តាលផ្សព្វផ្សាយអីផ្សេងៗអ៊ីចឹងទៅ ដើម្បីឱ្យគាត់មានការគ្រប់គ្រងបានល្អ ហ៊ានបញ្ចេញមតិក្នុងការការពារ។ និយាយទៅទាល់តែពួកគាត់ចេះរួមគ្នា ទើបអាចធ្វើបាន សង្គមស៊ីវិលតែម្នាក់ឯង គឺជួយអត់បានដែរហ្នឹង»៕
វីដេអូ៖