.jpg)
ប្រជាពលរដ្ឋចូលរួមនៅក្នុងពិធីបុណ្យកាន់បិណ្ឌនៅវត្តមួយក្នុងរាជធានីភ្នំពេញ កាលពីឆ្នាំមុន។ ហេង ជីវ័ន
ភ្នំពេញៈ ស្របពេលដែលរដូវបុណ្យកាន់បិណ្ឌ និងភ្ជុំបិណ្ឌ នឹងឈានចូលមកដល់ក្នុងពេលឆាប់ៗខាងមុខនេះ ក្រសួងសុខាភិបាលបានណែនាំដល់ប្រជាពលរដ្ឋត្រូវបង្កើនការប្រុងប្រយ័ត្នខ្ពស់ពីការឆ្លងវីរុសកូវីដ ១៩ និងការពារខ្លួនពីការពុលចំណីអាហារ ដោយត្រូវអនុវត្តនូវវិធានការសុវត្ថិភាពចំណីអាហារក្នុងពេលរដូវបុណ្យនេះ។
សេចក្តីណែនាំរបស់ក្រសួងសុខាភិបាលស្តីពីការការពារការចម្លងវីរុសកូវីដ ១៩ និងការពុលចំណីអាហារក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌចេញនៅថ្ងៃទី ៨ កញ្ញា លើកឡើងថា កម្ពុជាមានកិច្ចខិតខំប្រឹងប្រែងពីសំណាក់ប្រមុខរាជរដ្ឋាភិបាល ដែលមានលោកនាយករដ្ឋមន្ត្រី ហ៊ុន សែន បានដឹកនាំចង្អុលបង្ហាញផ្លូវប្រកបដោយគតិបណ្ឌិតខ្ពស់ ដែលបានធ្វើឱ្យករណីឆ្លងជំងឺកូវីដ ១៩ បន្តធ្លាក់ចុះជាបន្តបន្ទាប់ជាទីមោទនៈ។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង ថ្លែងថា៖ «ដើម្បីធានាឱ្យបាននូវការទប់ស្កាត់ការចម្លងជំងឺកូវីដ ១៩ និងឆ្ពោះទៅកាន់ការរស់នៅតាមបែបគន្លងប្រក្រតីភាពថ្មី យើងមិនត្រូវមានអារម្មណ៍ស្កប់ស្កល់ពេកនឹងអ្វីដែលជាសមិទ្ធផលដែលយើងទទួលបាននេះទេ។ បុគ្គលគ្រប់រូប គ្រួសារ និងសហគមន៍ត្រវតែបន្តរួបរួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩»។
ក្រសួងសុខាភិបាលបានអំពាវនាវ និងក្រើនរំឭកដល់ប្រជាពលរដ្ឋទាំងអស់ ត្រូវបន្តអនុវត្តការការពារការចម្លងវីរុសកូវីដ ១៩ ដោយបង្កើនការប្រុងប្រយ័ត្នខ្ពស់ក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ ដែលនឹងប្រព្រឹត្តទៅចាប់ពីថ្ងៃទី ២២ ខែកញ្ញា ដល់ថ្ងៃទី ៧ ខែតុលា ឆ្នាំ ២០២១ ខាងមុខនេះ ដោយអនុវត្តឱ្យបានខ្ជាប់ខ្ជួននូវវិធានការ ៣ការពារ និង៣កុំ ជាប់ជាប្រចាំ។
អាជ្ញាធររាជធានីខេត្ត គណៈបញ្ជាការឯកភាពឃុំ សង្កាត់ ខណ្ឌ គណៈកម្មការថែរក្សាសន្តិសុខ និងសណ្តាប់ធ្នាប់ របៀបរៀបរយក្នុងទីវត្តអារាម និងគណៈកម្មការវត្តត្រូវចាត់ចែងណែនាំឱ្យមានការអនុវត្តវិធានការសុខាភិបាល បង្កើនសកម្មភាពត្រួតពិនិត្យ តាមដាន លើពុទ្ធបរិស័ទ ដែលចេញ-ចូល ទីវត្តអារាម វិហារ ឱ្យបានហ្មត់ចត់។
ទាក់ទងនឹងចំណុចនេះដែរ លោក ម៉ម ប៊ុនហេង លើកឡើងថា៖ «អាជ្ញាធរ និងអ្នកពាក់ព័ន្ធត្រូវរៀបចំឱ្យមានកន្លែងលាងដៃនៅច្រកចេញ-ចូលបាញ់ទឹកអាល់កុល វាស់កម្ដៅ។ សម្រាប់រាល់ពុទ្ធបរិស័ទទាំងអស់កុំឱ្យមានការធ្វេសប្រហែសនៅមុខខ្លោងទ្វារនីមួយៗ និងចាត់ចែងឱ្យមានការរក្សាគម្លាតពីគ្នាយ៉ាងតិច ១ ម៉ែត្រកន្លះ ក្នុងពេលមានការប្រគេនចង្ហាន់ បច្ច័យ និងគ្រឿងឧបភោគបរិភោគដល់ព្រះសង្ឃ ឬនៅពេលអង្គុយ ឬឈររង់ចាំការប្រគេន ឬវេរចង្ហាន់ និងទេយ្យទាន ឬពេលស្តាប់ព្រះធម៌»។
លោកបន្តថា អាជ្ញាធរខេត្ត ស្រុក ក្រុង ខណ្ឌ រដ្ឋបាលឃុំ សង្កាត់ ត្រូវចាត់តាំងកម្លាំងគ្រប់គ្រង ឃ្លាំមើល និងធ្វើការណែនាំការអនុវត្តឱ្យបានខ្ជាប់ខ្ជួននូវវិធានការការពារការចម្លងជំងឺកូវីដ ១៩។ លោកក៏បានស្នើឱ្យមានការជួបជុំគ្រួសារតែនៅក្នុងខ្នងផ្ទះ ឬគេហដ្ឋានតែមួយ ដោយមិនត្រូវអញ្ជើញសាច់ញាតិដែលមានការស្នាក់នៅក្នុងគេហដ្ឋានផ្សេង ឬមិត្តភក្តិជិតស្និទ្ធ មកជួបជុំគ្នាដើម្បីលេងល្បែងស៊ីសង ច្រៀងរាំ ឬការជួបជុំគ្នាពិសាអាហារ និងសេពគ្រឿងស្រវឹង ដែលជាកត្តាហានិភ័យខ្ពស់ក្នុងការចម្លងវីរុសកូវីដ ១៩។
លោក ម៉ម ប៊ុនហេង បញ្ជាក់ថា៖ «មិនត្រូវដើរកម្សាន្ត ដែលមិនចាំបាច់ ដែលនាំឱ្យមានការចម្លងវីរុសកូវីដ ១៩ ចូលក្នុងក្រុមគ្រួសារ និងមនុស្សជាទីស្រឡាញ់របស់អ្នក ហើយសូមជ្រើសរើសការជួបជុំតាមប្រព័ន្ធអនឡាញដែលអាចជជែកគ្នាមើលមុខគ្នា ពិភាក្សាគ្នា ជាជំនួសឱ្យការជួបជុំផ្ទាល់ដើម្បីរួមចំណែកកាត់បន្ថយការចម្លងវីរុសកូវីដ ១៩»។
អ្នកដែលមានហានិភ័យខ្ពស់នៃការចម្លងជំងឺ ដូចជា ជនចាស់ជរា ជនដែលមានជំងឺប្រចាំកាយ ស្ត្រីមានផ្ទៃពោះ និងកុមារតូចៗជាដើម មិនគួរចូលរួមដំណើរជួបជុំគ្នា បើមិនមានការចាំបាច់បំផុតនោះទេ។
ជាមួយគ្នានេះ លោក ម៉ម ប៊ុនហេង ក៏បានអំពាវនាវដល់ប្រជាពលរដ្ឋទាំងអស់ ត្រូវប្រកាន់នូវការរក្សាភាពស្អាតជានិច្ចដូចជា លាងដៃជាមួយសាប៊ូ និងទឹកស្អាត ទឹកអាល់កុល ឬអាល់កុល។ នៅពេលរៀបចំអាហារ ទុកដាក់អាហារឆៅ និងឆ្អិនដាច់ដោយឡែកពីគ្នា។ ចម្អិនម្ហូបអាហារឱ្យបានឆ្អិនល្អ ពិសេសគឺសាច់សត្វល្អិត និងគ្រឿងសមុទ្រ។
លោកបញ្ជាក់ថា៖ «នៅពេលលោកអ្នកទិញម្ហូបអាហារដែលឆ្អិនស្រាប់ នៅតាមផ្សារ ឬតាមដងផ្លូវ ត្រូវប្រាកដថា អាហារទាំងនោះមានសុវត្ថិភាព ហើយអាហារត្រូវដាក់ក្នុងសីតុណ្ហភាពសុវត្ថិភាព។ អាជ្ញាធរត្រូវចាត់តាំងកម្លាំងគ្រប់គ្រង ឃ្លាំមើល និងធ្វើការណែនាំការអនុវត្តឱ្យបានខ្ជាប់ខ្ជួននូវវិធានការសុវត្ថិភាពចំណីអាហារ និងការរៀបចំទុកដាក់ម្ហូបអាហារឱ្យបានល្អ កុំច្របូកច្របល់គ្នា ចៀសវាងការពុលចំណីអាហារ ឬជំងឺបណ្តាលមកពីចំណីអាហារមិនមានសុវត្ថិភាព»។
គួរបញ្ជាក់ដែរថា ឆ្នាំនេះ ពិធីបុណ្យកាន់បិណ្ឌ ភ្ជុំបិណ្ឌ នឹងប្រព្រឹត្តនៅថ្ងៃទី ២២ ខែ កញ្ញា ដល់ថ្ងៃទី ៦ ខែតុលា៕
វីដេអូ៖
