ភ្នំពេញៈ មន្ត្រីនគរបាលនៃអធិកាដ្ឋាននគរបាលខណ្ឌ៧មករា ម្នាក់ត្រូវបានឃាត់ខ្លួន ក្រោយពីប្រើអំពើហិង្សា កាលពីយប់ថ្ងៃទី ៨ ខែកញ្ញា ទៅលើស្ត្រីម្នាក់ដែលជិះផ្នែកខាងក្រោយនៃអ្នកបើកបរម៉ូតូដោយមិនបានពាក់មួកសុវត្ថិភាព បណ្ដាលឱ្យមានរបួសនៅលើដងផ្លូវក្នុងសង្កាត់វាលវង់។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានថ្លែងនៅថ្ងៃទី ៩ ខែកញ្ញានេះថា ក្រោយពីកើតហេតុលោក នេត សាវឿន អគ្គស្នងការនគរបាលជាតិ និងលោក ស ថេត ស្នងការនគរបាលរាជធានីភ្នំពេញបានបញ្ជាឱ្យសមត្ថកិច្ចឃាត់ខ្លួន និងចាត់វិធានការតាមច្បាប់ ចំពោះមន្ត្រីនគរបាលអន្តរាគមន៍នៃអធិការដ្ឋាននគរបាលខណ្ឌ៧មករា ដែលបង្កហិង្សានោះភ្លាមនៅថ្ងៃដដែល។
លោកថ្លែងថា៖ «កម្លាំងសមត្ថកិច្ចនឹងឱ្យមន្ត្រីបង្កហេតុជួបជាមួយក្រុមគ្រួសារជនរងគ្រោះចរចាគ្នារឿងសំណងថ្លៃព្យាបាល។ បើជនរងគ្រោះមិនសុខចិត្តសមត្ថកិច្ចនឹងអនុវត្តបន្តដោយកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធីច្បាប់»។
លោកបញ្ជាក់ថា៖ «ប្រសិនបើជនរងគ្រោះចរចាត្រូវគ្នាបញ្ចប់រឿងត្រឹមសំណងមន្ត្រីនគរបាលដែលបង្កហិង្សានោះក៏នៅតែត្រូវអនុវត្តវិន័យទៅតាមកងកម្លាំងផងដែរ។ ចំពោះអ្នកបើកបរល្មើសច្បាប់ចរាចរណ៍គេចពីសមត្ថកិច្ចក៏នឹងត្រូវអនុវត្តតាមច្បាប់ផងដែរ»។
បើតាមរបាយការណ៍របស់ស្នងការដ្ឋាននគរបាលរាជធានីភ្នំពេញនៅវេលាម៉ោងប្រមាណ ៨ និង ២០ នាទីយប់ ថ្ងៃទី ៨ ខែកញ្ញា ឆ្នាំ ២០២១ មានករណីប្រើអំពើហិង្សាមួយប្រព្រឹត្តដោយមន្ត្រីនគរបាលអន្តរាគមន៍ខណ្ឌ ៧ មករាប្រើប្រាស់ វិទ្យុទាក់ទង វាយទៅលើនារីម្នាក់ ដែលកំពុងជិះម៉ូតូជាមួយប្អូនប្រុស ដែលមិនបានពាក់មួកសុវត្ថិភាពបណ្ដាលឱ្យរងរបួសត្រង់ក្បាលនៅទីតាំង សង្កាត់វាលវង់ខណ្ឌ៧មករារាជធានីភ្នំពេញ។ មុនពេលកើតហេតុជនរងគ្រោះ ២ នាក់បងប្អូនបានជិះម៉ូតូដោយមិនពាក់មួកសុវត្ថិភាព។
លុះពេលជិះដល់គោលដៅត្រួតពិនិត្យក៏ព្យាយាមជិះបកក្រោយវិញហើយក៏ត្រូវបានមន្ត្រីនគរបាលម្នាក់យកអាយកូមវាយបណ្តាលឱ្យត្រូវនារីអ្នកជិះខាងក្រោយបែកក្បាល និងធ្លាក់ពីលើម៉ូតូផងដែរ។ នារីជាជនរងគ្រោះក្នុងអំពើហិង្សានេះមានឈ្មោះ ងន ស្រីនិច អាយុ ២២។
រីឯអ្នកឌុបជាប្អូនប្រុសឈ្មោះ ងន សិលា អាយុ ១៨ ឆ្នាំ ពួកគេមានទីលំនៅបុរី លឹមឈាងហាក់ចំការដូង សង្កាត់ស្ទឹងមានជ័យចំណែក មន្ត្រីអន្តរាគមន៍ដែលប្រើហិង្សាត្រូវបានគេស្គាល់ថា មាន ឈ្មោះ ម៉ាត់ ពិសី។
ភ្នំពេញប៉ុស្ដិ៍មិនអាចទាក់ទងនារីរងគ្រោះ ងន ស្រីនិច បំភ្លឺបន្ថែមទាក់ទងនឹងករណីនេះបានទេកាលពីម្សិលមិញ។ ប៉ុន្ដែនាងបាននិយាយជាសាធារណៈកាលពីយប់ថ្ងៃទី ៨ ខែកញ្ញានេះ តាមរយៈបណ្ដាញសង្គមហ្វេសប៊ុកថា មុនពេលកើតហេតុ ពួកនាងមានបំណងធ្វើដំណើរតាមរយៈម៉ូតូ Hongda Scopy សេរីឆ្នាំ ២០២១ ពីផ្ទះនៅចំការដូង ក្នុងខណ្ឌស្ទឹងមានជ័យទៅខណ្ឌទួលគោក។ ពេលកំពុងជិះដល់ស្ដុបអាងទឹក ស្ដាតអូឡាំពិក ត្រង់ចំណុចបត់ឆ្វេង ទៅផ្សារដេប៉ូ ក៏ជួបនឹងគោលដៅនគរបាលត្រួតពិនិត្យអនុវត្ដច្បាប់ចរាចរណ៍របស់សមត្ថកិច្ច ខណៈពេលនោះប្អូនប្រុសរបស់នាងក៏បើកគេចដោយសារពួកនាងអត់ពាក់មួកសុវត្ថិភាព។
នារីរូបនេះថា៖ «ពេលនោះខ្ញុំប្រាប់ប្អូនប្រុសខ្ញុំ កុំឱ្យបើករត់គេចឱ្យជិះចូលទៅឱ្យប៉ូលិសផាកពិន័យ។ ពេលប្អូនខ្ញុំរកឈប់ ក៏មានប៉ូលិសម្នាក់ដើរមក យកវិទ្យុទាក់ទងវាយចំក្បាលរបស់ខ្ញុំតែម្ដង។ ពេលប៉ូលិសវាយ ខ្ញុំមិនបានគេចទេ ដោយគិតថា ប៉ូលិសវាយបន្តិចប៉ុណ្ណោះ។ ប៉ុន្ដែប៉ូលិសបានវាយខ្ញុំចំត្រង់ក្បាលបែកជិត ១០ ថ្នេរហូរឈាម។ ខ្ញុំក៏វិលមុខធ្លាក់ពីលើម៉ូតូ ទៅបុកជាមួយនឹងឃឿនចិញ្ចើមថ្នល់រងរបួសចិញ្ចើមខាងស្ដាំបន្ថែមទៀត»។
នារីរូបនេះបានទទួលស្គាល់កំហុសថា ពួកនាងពិតជាល្មើសច្បាប់ចរាចរណ៍ដែលបើកបរមិនពាក់មួកសុវត្ថិភាព និងបើកបរបញ្ច្រាសផ្លូវ។ ប៉ុន្ដែនាងក៏ទាមទាររកយុត្ដិធម៌ ចំពោះករណីហិង្សាបណ្ដាលឱ្យរងរបួសត្រង់ក្បាលហូរឈាមបែបនេះ។ នាងបញ្ជាក់ថា នៅថ្ងៃទី ៩ ខែកញ្ញានេះ នាងនឹងដាក់ពាក្យប្ដឹងមន្ដ្រីនគរបាលដែលបង្កហិង្សានេះអំពីបទហិង្សាដោយចេតនា។
លោក គឹម បញ្ញា នាយកអង្គការ AIP ប្រចាំប្រទេសកម្ពុជាលើកឡើងថា ការប្រើប្រាស់ហិង្សាក្នុងពេលអនុវត្ដច្បាប់ចរាចរណ៍ គឺជារឿងដែលមិនត្រឹមត្រូវទេ ព្រោះគោលដៅនៃការរឹតបន្តឹងការអនុវត្ដច្បាប់ចរាចរណ៍ គឺដើម្បីរក្សាការពារអាយុជីវិតរបស់ប្រជាពលរដ្ឋ។
លោកថ្លែងថា៖ «បើការអនុវត្ដច្បាប់របស់យើង វានាំផលបង្កជារបួសស្នាមបែបនេះ គឺប្រាស់ចាកពីគោលដៅនៃការអនុវត្ដច្បាប់ចរាចរណ៍ហើយ»។
លោកបានគាំទ្រចំពោះចំណាត់ការរបស់សមត្ថកិច្ចដែលបានឃាត់មន្ដ្រីនគរបាលដែលជាជនបង្ក និងអនុវត្ដទៅតាមច្បាប់ដែលមានជាធរមាន ដើម្បីពង្រឹងការអនុវត្ដច្បាប់ចរាចរណ៍បន្តទៀត ដោយអនុវត្ដទៅតាមច្បាប់ចរាចរណ៍ផ្លូវគោក និងប្រើប្រាស់វិធីសាស្ដ្រទន់ភ្លន់ក្នុងការអនុវត្ដច្បាប់៕