ភ្នំពេញៈ ក្រសួងអប់រំ យុវជន និងកីឡា ក្នុងឆ្នាំ ២០២១ នេះបានដាក់ឱ្យដំណើរការថ្នាក់អក្ខរកម្មជាង ៩០០ ថ្នាក់ ដែលក្នុងនោះត្រូវបានអនុវត្តដោយមន្ទីរអប់រំ យុវជន និងកីឡារាជធានី-ខេត្ត តាមរោងចក្រសហគ្រាស ពន្ធនាគារ និងដៃគូអភិវឌ្ឍន៍ផងដែរ។ នេះបើយោងតាមការលើកឡើងរបស់រដ្ឋមន្ត្រីក្រសួងអប់រំ លោក ហង់ជួន ណារ៉ុន នាទិវាអក្ខរកម្មជាតិ ៨ កញ្ញា លើកទី ២១ ក្រោមប្រធានបទ «អក្ខរកម្មជាមូលដ្ឋានគ្រឹះការសិក្សាពេញមួយជីវិត»។
លោក ហង់ជួន ណារ៉ុន បានថ្លែងថា ក្រសួងបានដាក់ដំណើរការថ្នាក់អក្ខរកម្ម ដែលត្រូវបានអនុវត្តដោយមន្ទីរអប់រំ យុវជន និងកីឡារាជធានី-ខេត្តចំនួន ៨៧២ ថ្នាក់តាមរោងចក្រចំនួន ៧ ថ្នាក់ ក្នុងពន្ធនាគារចំនួន ៤៥ ថ្នាក់ និងអនុវត្តដោយដៃគូអភិវឌ្ឍន៍ចំនួន ៣៩ ថ្នាក់។ លោកបន្ថែមថា ថ្នាក់អក្ខរកម្មទាំងនេះមានអ្នកសិក្សាសរុបចំនួន ២៦ ៩២០ នាក់ ក្នុងនោះស្រីចំនួន ១០ ៣៤៨ នាក់។
លោក ហង់ជួន ណារ៉ុន បានមានប្រសាសន៍ថា៖ «សមិទ្ធផលនៃការអនុវត្តកម្មវិធីអក្ខរកម្ម វិជ្ជាជីវៈ បង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាលកម្ពុជា និងការរួមគ្នាអនុវត្តយុទ្ធនាការជាសកលពីក្រសួងអប់រំ និងក្រសួង-ស្ថាប័នពាក់ព័ន្ធ អង្គការយូណេស្កូ និងដៃគូអភិវឌ្ឍន៍នានា ជាពិសេសកិច្ចខិតខំប្រឹងប្រែងអស់ពីកម្លាំងកាយចិត្តរបស់មន្ត្រីអប់រំ គ្រប់លំដាប់ថ្នាក់ ព្រះសង្ឃ សិស្ស និស្សិត បញ្ញវន្ត និងក្រុមយុវជនស្ម័គ្រចិត្តនៅទូទាំងប្រទេស»។
លោករដ្ឋមន្ត្រីបានលើកឡើងថា កម្ពុជាកំពុងតែស្ថិតក្នុងសភាពការណ៍មួយ ដែលមិនច្បាស់លាស់ ដោយសារជំងឺកូវីដ ១៩ ដូច្នេះ ការដំណើរការថ្នាក់អក្ខរកម្ម ក៏ដូចជាការផ្តល់ឱកាសឱ្យយុវជនបានបន្តការសិក្សាពេញ ១ ជីវិត ត្រូវមានការថ្លឹងថ្លែងរវាងការការពារអាយុជីវិតរបស់លោកគ្រូ-អ្នកគ្រូ សិស្សានុសិស្ស ឱ្យបន្តការសិក្សាថែមទៀត។
ការណ៍នេះទាមទារឱ្យមានគំនិតច្នៃប្រឌិត ចូលរួមចំណែកជាមួយរាជរដ្ឋាភិបាល ដើម្បីផ្សព្វផ្សាយអំពីវិធានការការពារជំងឺកូវីដ ១៩ និងផ្តល់ឱកាសឱ្យយុវជនបន្តការរៀនសូត្រ។
លោករដ្ឋមន្ត្រីបានបញ្ជាក់ថា នៅក្នុងសតវត្សរ៍ទី ២១ នេះជាការឈានចូលទៅដល់ដំណាក់កាលថ្មីមួយទៀត ដែលហៅថា អក្ខរកម្មឌីជីថល ដែលមានទាំងអក្ខរកម្មប្រពៃណី ដែលក្រសួងធ្លាប់អនុវត្តរួចមកហើយ ប៉ុន្តែក៏ទាមទារឱ្យអ្នកសិក្សាត្រូវប្រើប្រាស់នូវបច្ចេកវិទ្យា ហើយអ្នកដែលផ្តល់សេវាអប់រំ ក៏ត្រូវរៀបចំឱ្យមានប្រព័ន្ធឌីជីថល ដើម្បីឆ្លើយតបទៅនឹងសភាពការណ៍ថ្មីដែលទាមទារឱ្យប្រើប្រាស់នូវបច្ចេកវិទ្យា ដើម្បីផ្តល់ឱកាសអប់រំទៅដល់យុវជន។
លោកថ្លែងថា៖ «ជាការពិតណាស់ ប្រសិនបើមានត្រឹមតែអក្ខរកម្មប្រពៃណី គឺការរកការងារធ្វើនៅក្នុងយុគសម័យថ្មីនេះក៏ពិបាក។ ដូចនេះហើយក្រសួងអប់រំក៏បានដាក់ចេញជាគោលដៅថាប្រែក្លាយមជ្ឈមណ្ឌលសិក្សាសហគមន៍មួយចំនួនឱ្យទៅជាមជ្ឈមណ្ឌលសិក្សាពេញ ១ ជីវិតជាពិសេសត្រូវបញ្ចូលនូវបច្ចេកវិទ្យា ដើម្បីអាចឱ្យយុវជនប្រើប្រាស់នូវបច្ចេកវិទ្យាបានក្នុងគោលដៅពង្រឹងនូវឱកាសទទួលបាននូវការងារសម្រាប់យុវជនយើង»។
លោក ហង់ជួន ណារ៉ុន បានលើកឡើងថា ប្រសិនបើមិនឆ្លើយតបទៅនឹងតម្រូវការថ្មីទេ កម្មវិធីអក្ខរកម្មនេះនឹងមិនទទួលបានជោគជ័យឡើយពិសេសទស្សនទានការសិក្សាពេញ ១ ជីវិតនេះ គឺមានន័យថា បង្កើតឱកាសឱ្យយុវជនទទួលបានអក្ខរកម្មប្រពៃណីផង ទទួលបានជំនាញដើម្បីមានមុខរបរល្អផង និងចំណេះវិជ្ជាបច្ចេកវិទ្យាផងដែរ។
ប្រធាននាយកដ្ឋានអប់រំក្រៅប្រព័ន្ធនៃក្រសួងអប់រំ លោក គួច គូលំអ ក៏បានថ្លែងក្នុងទិវានេះផងដែរថា ការអនុវត្តកម្មវិធីអក្ខរកម្មវិជ្ជាជីវៈឆ្នាំ ២០២០ កន្លងមកនេះ មានថ្នាក់អក្ខរកម្មដែលដំណើរការចំនួន ៨៩៤ ថ្នាក់ ដែលអនុវត្តដោយមន្ទីរអប់រំ យុវជន និងកីឡារាជធានីខេត្ត និងអង្គការដៃគូពាក់ព័ន្ធ ដែលមានអ្នកសិក្សាសរុបចំនួន ១៧ ៦៩៤ នាក់។
លោកបន្តថា អ្នកដែលបានប្រឡងជាប់ និងទទួលបានបណ្ណអក្ខរកម្មមាន ១៤ ២១០ នាក់។
នៅក្នុងសារលិខិតអបអរសាទរទិវាអក្ខរកម្ម ៨ កញ្ញានេះដែរ លោកនាយករដ្ឋមន្ត្រី ហ៊ុន សែន បានធ្វើការអំពាវនាវទៅដល់ក្រសួង ស្ថាប័ន គ្រឹះស្ថានសិក្សា មណ្ឌលសិក្សា ទីវត្តអារាមទាំងអស់ និងអ្នកពាក់ព័ន្ធផ្សេងៗជាច្រើនទៀតត្រូវបន្តបង្កើតកម្មវិធីអប់រំកម្មវិធីសិក្សាពេញមួយជីវិតទាំងផ្នែកអក្ខរកម្ម ទាំងផ្នែកវិជ្ជាជីវៈ ទាំងផ្នែកបច្ចេកវិទ្យា ដើម្បីឆ្លើយតបនឹងតម្រូវការអ្នកសិក្សា៕