អង្គការ​ទស្សនៈ​ពិភពលោក​អន្តរជាតិ​កម្ពុជា​ហៅ​កាត់​ថា World Vision បាន​បង្កើត​បណ្ណាល័យ​ចល័ត និង​ជំរុញ​ទម្លាប់​នៃ​ការអាន​របស់​កុមារ​ជាង ១១ ​ម៉ឺន​នាក់ ក្នុងអំឡុងពេល​សាលា​ត្រូវបាន​បិទ ដោយសារ​ការរីករាលដាល​នៃ​ជំងឺ​កូវីដ ១៩ នៅក្នុង​ប្រទេស​កម្ពុជា​។

សេចក្តី​ប្រកាស​ព័ត៌មាន​របស់ World Vision ចេញផ្សាយ​នៅ​ថ្ងៃទី ១០ ខែកញ្ញា​នេះ បាន​ឱ្យ​ដឹងថា សកម្មភាព​បណ្ណាល័យ​ចល័ត​របស់​អង្គការ​ទស្សនៈ​ពិភពលោក​អន្តរជាតិ​កម្ពុជា​បាននិង​កំពុង​អនុវត្ត​ដោយ​សហការ​ជាមួយ​សាលា​ចំនួន ៥៣២ ដើម្បី​លើកស្ទួយ​ទម្លាប់​នៃ​ការអាន​របស់​កុមារ​ប្រមាណ​ជាង​ ១១ ​ម៉ឺន​នាក់ នៅ​ស្រុក​ចំនួន​ ៣០ ក្នុង​បណ្តា​ខេត្ត​ចំនួន ៩​។

លោក វ៉ា សុរិន ប្រធាន​បច្ចេកទេស​កម្មវិធី​អប់រំ​នៃ​អង្គការ​ទស្សនៈ​ពិភពលោក​អន្តរជាតិ​កម្ពុជា​បាន​ថ្លែងថា​បណ្ណាល័យ​ចល័ត​ដែលជា​សកម្មភាព​មួយ​ក្នុងចំណោម​សកម្មភាព​ជាច្រើន​នៃ​កម្មវិធី​អប់រំ​របស់​អង្គការ​ទស្សនៈ​ពិភពលោក ត្រូវ​បាន​ផ្តួចផ្តើមឡើង​ចាប់ពី​ខែ មីនា ឆ្នាំ​ ២០២១ ​នេះ ដើម្បី​ឆ្លើយតប​នឹង​តម្រូវការ​នៃ​ការសិក្សា​របស់​កុមារ​ក្នុង​អំឡុងពេល​សាលា​របស់​ពួកគេ​ត្រូវបាន​បិទ​ដោយសារ​ការរាតត្បាត​នៃ​ជំងឺ​កូវីដ​ ១៩​។

លោក សុរិន មានប្រសាសន៍​ថា​៖ «​បណ្ណាល័យ​ចល័ត បាននិង​កំពុង​ជួយ​ជំរុញ​ដល់​ការអាន និង​ស្វ័យ​សិក្សា​របស់​កុមារ​ជាពិសេស​កុមារ​ដែល​មិនមាន​សម្ភារ​សិក្សា​គ្រប់គ្រាន់ ដូច្នេះ​ពួកគេ​អាច​ខ្ចី​សៀវភៅ​រឿង សៀវភៅ​ចំណេះដឹង​ទូទៅ ដើម្បី​យកទៅ​អាន ឬ រៀន​នៅផ្ទះ​»​។

លោក សុរិន បន្ថែមថា​៖ «​គម្រោង​នេះ​បាន​ជួយ​ទៅដល់​កុមារ បាន​យ៉ាងច្រើន​ដោយ​កុមារ​អាច​ទទួលបាន​សៀវភៅ​រឿង​ និង​សម្ភារ​សិក្សា​ផ្សេងៗ ដើម្បី​បាន​អាន​បន្ថែម​នៅផ្ទះ​ពេលទំនេរ​ ឬ​អាន​ជាមួយ​មិត្តភក្តិ​ដែល​នៅ​ជិត​ផ្ទះ ហើយ​ជាពិសេស​ទៅទៀត​កុមារ​អាច​អាន​ជាមួយ​ឪពុកម្តាយ​នៅពេល​ទំនេរ ដែល​អាច​បង្កើន​ភាពរីករាយ​ក្នុង​គ្រួសារ​ និង​ជួយ​កាត់បន្ថយ​បាន​មួយចំនួនទៀត​ទៅលើ​ការបាត់បង់​ការរៀនសូត្រ​របស់​កុមារ​មួយចំនួន​ដែល​មិនបាន​រៀន​តាម​អនឡាញ ឬ តាម​បណ្តុំ​តូចៗ​»​។

កុមារា មករា វ័យ​ ១២ ​ឆ្នាំ ដែល​កំពុង​សិក្សា​ថ្នាក់​ទី​ ៦ នៅ​សាលាបឋមសិក្សា​ភ្នំពិត នៅ​ឃុំ​ស្វាយចចិប ស្រុក​បសេដ្ឋ ខេត្តកំពង់ស្ពឺ បង្ហាញ​អារម្មណ៍​សប្បាយរីករាយ​ដែល​តាមរយៈ​គម្រោង​បណ្ណាល័យ​ចល័ត​នេះ​ខ្លួន​អាច​ខ្ចី​សៀវភៅ​ច្រើន​ប្រភេទ​សម្រាប់​យកទៅ​អាន​។ មករា និយាយ​ដោយ​ក្ដី​រីករាយ​ថា​៖ «​ពេល​អាន​ច្រើន​ទៅ​ចេះដឹង​ច្រើន ហើយ​ចេះ​ប្រកប ចេះ​ពាក្យ​ច្រើន​ទៀត​។ សប្បាយចិត្ត [​ព្រោះ​] អត់​ហត់​ទៅ​ខ្ចី [​ឬ​] ត្រូវ​ដើរទៅ​យក​។ បាន​បងៗ [​ក្រុមយុវជន​ស្ម័គ្រចិត្ត​] គាត់​ចុះមក​ឱ្យ [​សៀវភៅ​] អីចឹង​ស្រួល​»​។

លោកស្រី ឈិត ឆ័យ ដែលជា​អ៊ំស្រី​របស់ មករា បាន​ថ្លែងថា គាត់​មាន​អារម្មណ៍​រីករាយ​ណាស់​ដែល​មករា​នៅ​ផ្ទះ​អាន​សៀវភៅ​ច្រើនជាង​មុន ពេលខ្លះ​អាន​រឿង​ឱ្យ​គាត់​ស្ដាប់ ហើយ​មិនសូវ​ដើរលេង​ទៅ​ក្រៅ​ជាមួយ​មិត្តភក្តិ​ទេ​។ លោកស្រី ឆ័យ ដែលជា​អ្នក​មើលថែ មករា មានប្រសាសន៍​ថា៖ «​ខ្ញុំ​អត់​សូវ​ចេះអក្សរ អីចឹង​ខ្ញុំ​ចូលចិត្ត​ពេល មករា អាន [​សៀវភៅ​] ឱ្យស្ដាប់ ឥឡូវ​ខ្ញុំ​ឧស្សាហ៍​ហៅ [​មករា​] ឱ្យជួយ​អាន​រឿង​ឱ្យស្ដាប់​សឹង​រាល់ថ្ងៃ​»​។

លោក សុខ ឧត្ដម បណ្ណារក្ស នៃ​សាលាបឋមសិក្សា​ភ្នំ​ពិត​ដែល​បាន​ចូលរួម​យ៉ាងសកម្ម​ក្នុង​គម្រោង​បណ្ណាល័យ​ចល័ត​នេះ​បាន​លើកឡើងថា កុមារ​ក្នុង​សហគមន៍​ចាប់ផ្ដើម​ចូលរួម និង​កែ​ទម្លាប់​ច្រើន​មករក​ការអាន​សៀវភៅ លែង​សូវ​ដើរលេង និង​មើល​ទូរទស្សន៍ ឬ​លេង​ទូរស័ព្ទ​។ លោក ឧត្ដម សង្កេតឃើញ​ថា​ចំនួន​សៀវភៅ​ដែល​ត្រូវបាន​ខ្ចី​មាន​ការកើនឡើង ហើយ​កុមារ​ក៏បាន​ដឹង និង​ស្គាល់​រឿង​ច្រើនជាង​មុន​ដែរ ព្រោះ​ពេល​ក្រុមការងារ​របស់លោក​អាន​រឿង​ថ្មី​ឱ្យស្ដាប់​មាន​កុមារ​ខ្លះ​ពោលថា​ខ្លួន​បាន​អាន​រឿង​នោះ​រួចហើយ​។

អង្គការ​ទស្សនៈ​ពិភពលោក​អន្តរជាតិ​កម្ពុជា​បាន​ឱ្យ​ដឹងថា ពាក់ព័ន្ធ​គម្រោង​នេះ អ្នកស្ម័គ្រចិត្ត​ក្នុង​សហគមន៍ និង​បណ្ណារក្ស​បាន​ចុះ​តាម​ភូមិ​ក្នុង​សាលា​គោលដៅ​ក្នុង​មួយ​សប្តាហ៍​ម្តង ដើម្បី​យក​សៀវភៅ​ទៅឱ្យ​កុមារ​នៅក្នុង​ភូមិ​ខ្ចី ហើយ​ពួកគេ​ក៏​ជួយ​ជំរុញ​ឱ្យ​ឪពុកម្តាយ​របស់​កុមារ​តាមដាន ជួយ​បង្រៀន និង​លើកទឹកចិត្ត​កូន​របស់ខ្លួន​ឱ្យ​រៀន នៅពេល​ទំនេរ​ពី​ការងារ​៕

វីដេអូ៖