ភ្នំពេញៈ ក្រុមការងារហ្វេសប៊ុករបស់រដ្ឋមន្ត្រីក្រសួងមហាផ្ទៃ លោក ស ខេង បានបានដោះស្រាយ និងឆ្លើយតបមតិយោបល់ ឬសំណូមពររបស់ពលរដ្ឋបានចំនួន ៧២ គណនីក្នុងចំណោម ១៦២ គណនីក្នុងខែសីហាកន្លងមកនេះ។
លោករដ្ឋមន្ត្រីបានបង្ហោះលើហ្វេសប៊ុកនៅថ្ងៃសុក្រទី ១០ កញ្ញានេះថា នៅក្នុងខែសីហាឆ្នាំ ២០២១ នេះក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋនៅក្នុងទំព័រហ្វេសប៊ុករបស់លោកបានទទួលសំណូមពរ និងសំណួររបស់ប្រជាពលរដ្ឋ ដែលស្ថិតក្នុងដែនសមត្ថកិច្ចក្រសួងមហាផ្ទៃគឺមានចំនួន ១៦២ គណនី ហើយបានឆ្លើយតប និងដោះស្រាយមានចំនួន ៧២ គណនី។ ក្រៅពីនោះគឺស្ថិតក្នុងដំណាក់កាលកំពុងដំណើរការដោះស្រាយ។ លើសពីនោះក៏មានបងប្អូនដែលបានសំណូមពរ និងសួរសំណួរ និងបញ្ហានានាខុសសមត្ថកិច្ចរបស់ក្រសួងមហាផ្ទៃជាច្រើនទៀតផងដែរ។
លោក ស ខេង បានសរសេរថា៖ «ខ្ញុំក៏សូមយកឱកាសនេះ ស្នើសុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី»។
លោករដ្ឋមន្ត្រីបានលើកឡើងថា វឌ្ឍនភាពការងារនេះអាចសម្រេចបានដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីក្រសួងមហាផ្ទៃ ស្ថាប័នថ្នាក់ជាតិ និងថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់លោក ទោះបីជាកម្ពុជាកំពុងតែប្រឈមមុខនឹងបញ្ហាបង្កឡើងដោយជំងឺកូវីដ ១៩ យ៉ាងណាក៏ដោយ។
លិខិតរបស់លោកនាយឧត្តមសេនីយ៍ ជា សុគន្ធា ប្រធានក្រុមការងារដោះស្រាយនេះកាលពីថ្ងៃទី ៧ ខែកញ្ញា បានឱ្យដឹងថា មតិយោបល់ ឬសំណូមពររបស់ពលរដ្ឋសរុបចំនួន ៥៣៤ ដែលនៅសេសសល់នាពេលកន្លងមកបាននិងកំពុងតែដោះស្រាយដោយអង្គភាពជំនាញមួយចំនួន។ ក្នុងនោះរួមមាន អគ្គស្នងការដ្ឋាននគរបាលជាតិ អគ្គនាយកដ្ឋានរដ្ឋបាល អគ្គនាយកដ្ឋានអត្តសញ្ញាណកម្ម អគ្គាធិការដ្ឋាន អគ្គនាយកដ្ឋានពន្ធនាគារ និងបណ្ឌិត្យសភានគរបាលជាតិជាដើម។
លោករដ្ឋមន្ត្រីក៏បានថ្លែងអំណរគុណចំពោះបងប្អូនជនរួមជាតិ ដែលបានលើកជាមតិយោបល់ និងសំណូមពរនានាទាំងនេះតាមរយៈទំព័រហ្វេសប៊ុក ដើម្បីក្រុមការងាររួមគ្នាដោះស្រាយ និងរួមគ្នាអភិវឌ្ឍន៍សង្គមជាតិយើងឱ្យកាន់តែរីកចម្រើន៕