.jpg)
លោក ម៉ុម សារឿន អភិបាលខេត្តស្ទឹងត្រែង ក្នុងកិច្ចប្រជុំនាពេលកន្លងទៅ។ រូបថត រដ្ឋបាលខេត្ត
ស្ទឹងត្រែងៈ រដ្ឋបាលខេត្តស្ទឹងត្រែងគ្រោងនឹងបើកផ្សារ និងទីប្រជុំជនឡើងវិញនៅថ្ងៃស្អែកទី ១១ ខែកញ្ញានេះ ក្រោយពីបិទកាលពីខែមុនដោយសារតែការរីករាលដាលនៃជំងឺកូវីដ ១៩។
សេចក្តីប្រកាសរបស់រដ្ឋបាលខេត្តចុះថ្ងៃទី ១០ ខែកញ្ញានេះ បានសម្រេចបើកឱ្យដំណើរការឡើងវិញសកម្មភាពអាជីវកម្មនៅ “ផ្សារសាមគ្គីស្ទឹងត្រែង, ផ្សារថ្មីក្រុងស្ទឹងត្រែង (ផ្សារអូរឫស្សី), ទីប្រជុំជនលក់ដូរនៅមូលដ្ឋានគីឡូម៉ែត្រ ២ (ផ្សារគីឡូ ២) និងទីប្រជុំជនលក់ដូរ” ស្ថិតក្នុងក្រុងស្ទឹងត្រែងចាប់ពីថ្ងៃទី ១១ ខែ កញ្ញា ឆ្នាំ ២០២១ តទៅ។ ទីតាំងទាំងនេះត្រូវបានផ្អាកសកម្មភាព ដើម្បីអនុវត្តវិធានការប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ ១៩ ក្នុងរយៈពេលកន្លងមក។
សេចក្តីសម្រេចបានបញ្ជាក់ថាការបើកឱ្យដំណើរការឡើងវិញនូវសកម្មភាពអាជីវកម្មក្នុងមូលដ្ឋានខាងលើនេះ តម្រូវឱ្យអនុវត្តវិធានការ រដ្ឋបាល និងវិធានការសុវត្ថិភាពផ្នែកសុខាភិបាល ដែលបានបញ្ញត្តិក្នុងលិខិតបទដ្ឋានគតិយុត្តរបស់រដ្ឋបាល ខេត្តដែលនៅជាធរមាន។
ក្នុងនោះរួមមានការអនុវត្តវិធានការ កាតព្វកិច្ចពាក់ម៉ាស់ និងរក្សាគម្លាតសុវត្ថិភាព បុគ្គលសង្គម“ វិធានការ ”៣ការពារ និង៣កុំ" និងបម្រាមគោចរពីចន្លោះម៉ោង ២១ យប់ដល់ម៉ោង ៣ ភ្លឺជាដើម។ ក្រៅពីនោះក៏មានទាំងវិធានការមួយចំនួនទៀតដែលកំពុងបន្តអនុវត្ត ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ឱ្យបានម៉ឺងម៉ាត់ ហ្មត់ចត់ និងខ្ជាប់ខ្ជួនក្នុងគោលបំណងធានាការពារ អាយុជីវិត ប្រជាជនឱ្យបានគង់វង្សរក្សាបានសុខភាពសាធារណៈ និងសន្តិសុខ សណ្តាប់ធ្នាប់ សុវត្ថិភាព របៀបរៀបរយ សង្គម។
សាលាខេត្តបានបញ្ជាក់ថា៖ «ការអនុវត្តវិធានការពិន័យអន្តរការណ៍ចំពោះបុគ្គល ឬនីតិបុគ្គលដែលមិនគោរពដោយចេតនានូវវិធានការរដ្ឋបាល និងវិធានការសុវត្ថិភាពផ្នែកសុខាភិបាល ក្នុងការទប់ស្កាត់ការឆ្លងរាលដាលនៃជំងឺកូវីដ ១៩ ត្រូវ អនុលោមតាមច្បាប់ លិខិតបទដ្ឋានគតិយុត្តដែលនៅជាធរមាន»។
កាលពីថ្ងៃទី ៩ ខែកញ្ញានេះ ករណីឆ្លងដោយសារកូវីដ ១៩ មិនត្រូវបានរកឃើញនោះទេនៅក្នុងខេត្តនេះ។ គិតត្រឹមល្ងាចថ្ងៃទី ៩ កញ្ញា នេះផងដែរ ខេត្តស្ទឹងត្រែងមានអ្នកឆ្លងសរុប ១ ០៦៧ នាក់ (មានស្រី ៥២៦ នាក់) ក្នុងនោះមានប្រភេទដែលតា ចំនួន ១៣៦ នាក់។ ចំពោះអ្នកជាសះស្បើយមានចំនួន ៧៥២ នាក់៕
