ភ្នំពេញៈ អង្គការចលនាដើម្បីសុខភាពកម្ពុជានៅថ្ងៃទី ១០ ខែកញ្ញានេះ បានប្រកាសគាំទ្រវិធានការរបស់ក្រសួងសុខាភិបាលលើក្រុមហ៊ុនថ្នាំជក់ ដែលនៅតែបន្តផ្សព្វផ្សាយ និងឧបត្ថម្ភសម្ភារ ដើម្បីទាក់ទាញអតិថិជន។
សេចក្តីប្រកាសរបស់អង្គការដែលបានចាត់ទុកសកម្មភាពរបស់ក្រុមហ៊ុនថ្នាំជក់ថា «ជាទង្វើល្មើសច្បាប់» នោះត្រូវបានធ្វើឡើង ក្រោយពេលដែលវិទ្យុជាតិកម្ពុជាបានចេញផ្សាយកិច្ចសម្ភាសន៍មួយជាមួយនឹងលោកស្រី ឈា ឆដាភា ប្រធានមជ្ឈមណ្ឌលជាតិលើកកម្ពស់សុខភាព និងជាសមាជិកគណៈកម្មាធិការត្រួតពិនិត្យផលិតផលថ្នាំជក់កាលពីថ្ងៃទី ០៨ សីហា ឆ្នាំ ២០២១។
សេចក្តីប្រកាសរបស់អង្គការបានសរសេរថា៖ «អង្គការចលនាដើម្បីសុខភាពកម្ពុជា គាំទ្រចំពោះចំណាត់ការរបស់ក្រសួងសុខាភិបាលក្នុងការក្រើនរំឭកដល់ក្រុមហ៊ុនថ្នាំជក់ឱ្យបញ្ឈប់ជាបន្ទាន់នូវសកម្មភាពឆ្លៀតឱកាសផ្សព្វផ្សាយផលិតផលថ្នាំជក់ ឬការឧបត្ថម្ភជាសម្ភារផ្សេងៗដល់ក្រសួង ស្ថាប័ន ឬរដ្ឋបាលថ្នាក់ក្រោមជាតិ ដែលជាទង្វើល្មើសច្បាប់ស្តីពីការត្រួតពិនិត្យផលិតផលថ្នាំជក់»។
អង្គការនេះបានបន្តថាលោកស្រី ឈា ឆដាភា ក៏បានស្នើសុំការសហការពីក្រសួង ស្ថាប័នដែលជាសមាជិកគណៈកម្មាធិការត្រួតពិនិត្យផលិតផលថ្នាំជក់ ស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិទាំងអស់ មិនត្រូវទទួលជំនួយឧបត្ថម្ភពីក្រុមហ៊ុនថ្នាំជក់ ដែលមានបង្ហាញពីឈ្មោះផលិតផល ឬឈ្មោះក្រុមហ៊ុនផលិតផលថ្នាំជក់នោះទេ។
ការហាមនេះ គឺដោយសារតែការឧបត្ថម្ភទាំងនោះមិនមែនជាកិច្ចការសប្បុរសធម៌ ដែលចូលរួមចំណែកជួយសង្គមនោះឡើយ។ ផ្ទុយទៅវិញ វាជាការផ្សព្វផ្សាយក្នុងគោលបំណងទាក់ទាញការចាប់អារម្មណ៍ និងឆ្លៀតឱកាសផ្សព្វផ្សាយលើកតម្កើងកេរ្តិ៍ឈ្មោះ និងដើម្បីផលប្រយោជន៍ក្រុមហ៊ុនថ្នាំជក់តែប៉ុណ្ណោះ ហើយនេះជាទង្វើល្មើសច្បាប់។
អង្គការសុខភាពពិភពលោកធ្លាប់បានលើកឡើងថា «ថ្នាំជក់គំរាមកំហែងយើងទាំងអស់គ្នា» ដែលវាបង្កផលប៉ះពាល់ដល់សុខភាព សេដ្ឋកិច្ច និងការអភិវឌ្ឍ។ លើសពីនោះថ្នាំជក់បាននិងកំពុងតែសម្លាប់មនុស្សជាង ៧ លាននាក់ជារៀងរាល់ឆ្នាំនៅទូទាំងពិភពលោក៕
វីដេអូ៖