ព្រះសីហនុៈ យុទ្ធនាការចាក់វ៉ាក់សាំងកូវីដ ១៩ ជូនប្រជាពលរដ្ឋអាយុចាប់ពី ១៨ ឆ្នាំឡើងត្រូវបានបិទបញ្ចប់នៅថ្ងៃសុក្រទី ១០ ខែកញ្ញានេះ ក្រោយពីចាក់បានពលរដ្ឋជាង ៩៧ ភាគរយ ខណៈដែលមណ្ឌលចាក់វ៉ាក់សាំងអចិន្ត្រៃយ៍ត្រូវបានដាក់ឱ្យដំណើរការ។
ក្រោមការចូលរួមពីលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោក គួច ចំរើន អភិបាលខេត្តព្រះសីហនុបានថ្លែងថាទូទាំងខេត្តមានមណ្ឌលចាក់វ៉ាក់សាំងកូវីដ ១៩ ចំនួន ១៩ ទីតាំង និងមានក្រុមគ្រូពេទ្យ ព្រមទាំងក្រុមការងារចម្រុះចាក់វ៉ាក់សាំងកូវីដ ១៩ សរុបចំនួន ១ ៨១៧ នាក់។ លទ្ធផលពីការចាក់វ៉ាក់សាំងកូវីដ ១៩ ជូនប្រជាពលរដ្ឋអាយុចាប់ពី ១៨ ឆ្នាំឡើងសរុបមានចំនួន ២២៣ ១៧០ នាក់ ដែលស្មើនឹង ៩៧,៧២ គាគរយ ហើយនៅសល់ ៥ ២០៧ នាក់។
លោកអភិបាលខេត្តបានបន្តថា៖ «ខេត្តព្រះសីហនុបានបិទបញ្ចប់យុទ្ធនាការចាក់វ៉ាក់សាំងកូវីដ ១៩ នៅតាមមណ្ឌលចាក់វ៉ាក់សាំងក្រុងស្រុកទូទាំងខេត្ត និងបើកដំណើរការមណ្ឌលចាក់វ៉ាក់សាំងអចិន្ត្រៃយ៍ចំនួនមួយមណ្ឌល គឺសាលាបឋម និងអនុវិទ្យាល័យតេជោសែនកម្មករ ស្ថិតក្នុងសង្កាត់លេខ ៤ ក្រុងព្រះសីហនុ សម្រាប់ចាក់ជូនប្រជាពលរដ្ឋអាយុ ១៨ ឆ្នាំឡើង និងកុមារចាប់ពីអាយុ ១២ ឆ្នាំដល់ក្រោម ១៨ ឆ្នាំ ដែលមិនទាន់បានចាក់វ៉ាក់សាំងកូវីដ ១៩»។
លោកក៏បានមានប្រសាសន៍ផងដែរថា ខេត្តព្រះសីហនុមានប្រជាពលរដ្ឋសរុបមានចំនួន ៣០៧ ៨១៧ នាក់ ស្រី ១៤៣ ៣២៣ នាក់។ ក្នុងនោះប្រជាពលរដ្ឋដែលមានអាយុ ១៨ ឆ្នាំឡើងសរុបចំនួន ២២៨ ៣៧៧ នាក់ ស្រី ១០៣ ៧៨៣ នាក់ ។
យោងតាមរដ្ឋបាលខេត្តព្រះសីហនុបានឱ្យដឹងថា កន្លងមកវ៉ាក់សាំងដែលមន្ទីរសុខាភិបាលខេត្តព្រះសីហនុទទួលបានសរុបចំនួន ២៩៥ ៥៨៤ ដូស។ ក្នុងនោះមានដូចជា៖ វ៉ាក់សាំង Sinopharm ចំនួន ១៧៦ ៧៨៨ ដូស, Covishield ចំនួន ១៥ ០០០ ដូស, Sinovac ចំនួន ១២ ៦៧៨ ដូស, Sinovac សម្រាប់កុមារ និងយុវវ័យពី ១២ ដល់ ១៨ ឆ្នាំ ចំនួន ៦៧ ២៦៤ ដូស, AstraZeneca ដូសទី 3 របស់អង់គ្លេសចំនួន ៥ ៦២៤ ដូស និង AstraZeneca ដូសទី 3 របស់ជប៉ុនចំនួន ១៨ ២៣០ ដូស។
ទោះបីជាការចាក់វ៉ាក់សាំងបានសម្រេចជាង ៩៧ ភាគរយនេះយ៉ាងណាក៏ដោយ ក៏លោកស្រី ឱ វណ្ណឌីន បានអំពាវនាវដល់អ្នក ដែលទទួលបានវ៉ាក់សាំងដូសទី ១ ទី ២ និងទី ៣ រួច កុំភ្លេចខ្លួនអនុវត្តឱ្យបានខ្ជាប់ខ្ជួននូវវិធានការសុខាភិបាល និងវិធានការ ៣.ការពារ ៣.កុំ របស់ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន៕