ភ្នំពេញៈ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ (គ.អ.ក) ប្រកាសនៅព្រឹកនេះថា សមត្ថកិច្ចបានឃាត់មនុស្សធ្វើការអប់រំនិងពិន័យចំនួន ២៨២នាក់ ឃាត់យានយន្ត ៤០គ្រឿង ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល កាលពីថ្ងៃម្សិលមិញ។
តាមសេចក្តីជូនដំណឹង (គ.អ.ក) នៅព្រឹកថ្ងៃទី១១ ខែកញ្ញានេះ បានឱ្យដឹងថា នៅថ្ងៃទី១០ ខែកញ្ញា មានយានយន្តល្មើសចំនួន ៤០គ្រឿង ក្នុងនោះមានរថយន្ត ៨ គ្រឿង។ សមត្ថកិច្ចក៏បានឃាត់ខ្លួនមនុស្សធ្វើការអប់រំ និងពិន័យចំនួន ២៨២នាក់ ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលផងដែរ។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ៨៧ ករណី និងផ្សព្វផ្សាយច្បាប់ទៅលើទីតាំងសរុបចំនួន ៦៧២ និងពិន័យជាប្រាក់បានចំនួន ៣ ៤០០ ០០០ រៀល៕