.jpg)
ដើមឈើនិងសួនច្បារមុខប្រាសាទបន្ទាយក្តី ក្នុងខេត្តសៀមរាប។ រូបថតអាជ្ញាធរអប្សរា
ភ្នំពេញៈ ក្រសួងវប្បធម៌ និងវិចិត្រសិល្បៈ កំណត់យកថ្ងៃទី១ ខែតុលា រៀបចំកម្មវិធីជិះកង់ និងដាំដើមឈើនៅតំបន់អង្គរ ដើម្បីអបអរសាទរកិច្ចប្រជុំថ្នាក់ឧត្តមមន្រ្តីទទួលបន្ទុកវប្បធម៌ និងសិល្បៈ ដែលគ្រោងធ្វើនៅសប្តាហ៍ទី៣ នៃខែតុលា ឆ្នាំ២០២១។
ការកំណត់នេះធ្វើឡើង បន្ទាប់ពីមានកិច្ចប្រជុំអនឡាញ (zoom) នៅថ្ងៃទី៩ ខែកញ្ញា ដែលមានលោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈជាអ្នកដឹកនាំ និងមានការអញ្ជើញចូលរួមពីសំណាក់លោក លោកស្រី ប្រធាន អនុប្រធានគណៈកម្មការ និងមន្រ្តី ជំនាញ ដើម្បីត្រួតពិនិត្យនិងពិភាក្សាលើវឌ្ឍនភាពនៃកិច្ចការចំនួន ២។
ក្រសួងនេះបង្ហាញថា ការងារទី១ គឺការត្រៀមរៀបចំមហោស្រពវប្បធម៌ អាស៊ី-អឺរ៉ុប ដែលនឹងត្រូវធ្វើឡើងនៅថ្ងៃទី ២២ ដល់ថ្ងៃទី ២៦ ខែវិច្ឆិកា ឆ្នាំ ២០២១។ និងទី២ គឺ ការត្រៀមរៀបចំនូវព្រឹត្តិការណ៍អមផ្សេងៗ ដែលក្រសួងវប្បធម៌ និងវិចិត្រសិល្បៈ ទទួលបន្ទុកជាគណៈកម្មការផ្នែកវប្បធម៌ ដើម្បីផ្តល់ការគាំទ្រដល់កិច្ចប្រជុំកំពូលអាស៊ាន នាឆ្នាំ ២០២២ ខាងមុខ។
យោងតាមការប្រកាសលើផេកហ្វេសប៊ុករបស់ក្រសួងនៅយប់ថ្ងៃទី១០ ខែកញ្ញា ក្រសួងវប្បធម៌ និងវិចិត្រសិល្បៈ បានប្រកាសកំណត់យកថ្ងៃទី១ ខែតុលាខាងមុខដើម្បីរៀបចំកម្មវិធីជិះកង់ និងដាំដើមឈើនៅតំបន់អង្គរ ដោយយោងតាមស្មារតីនៃកិច្ចប្រជុំថ្នាក់រដ្ឋមន្រ្តីអាស៊ាន ទទួលបន្ទុកវប្បធម៌ និងសិល្បៈកាលពីឆ្នាំ ២០២០ កន្លងមក ដែលបានកំណត់យកសៀមរាបជាទីក្រុង វប្បធម៌អាស៊ាន Siem Reap ASEAN City of Culture។
ក្រសួងវប្បធម៌បញ្ជាក់ថា កម្មវិធីជិះកង់ និងដាំដើមឈើនេះធ្វើឡើង ដើម្បីអបអរសាទរកិច្ចប្រជុំថ្នាក់ឧត្តមមន្រ្តី ទទួលបន្ទុកវប្បធម៌ និងសិល្បៈ ដែលគ្រោងធ្វើនៅសប្តាហ៍ទី៣ នៃខែតុលា ឆ្នាំ២០២១ ផងដែរ។
លើបណ្តាញសង្គមហ្វេសប៊ុកក្រសួងនេះសរសេរថា«កម្មវិធីជិះកង់ និងដាំដើមឈើ នឹងត្រូវធ្វើឡើងនៅតំបន់អង្គរ តាមការរៀបចំទីកន្លែង និងការព្រាងកំណាត់ផ្លូវ ដោយអាជ្ញាធរជាតិអប្សរា នឹងមានការអញ្ជើញចូលរួមពីសំណាក់ ថ្នាក់ដឹកនាំក្រសួង ថ្នាក់ដឹកនាំខេត្ត បណ្តាអង្គទូតជាសមាជិកអាស៊ាន និងដៃគូសន្ទនា ព្រមទាំងភាគី ដែលពាក់ព័ន្ធ ដោយមានការកំណត់នូវចំនួនច្បាស់លាស់ស្របតាមវិធានការសុខាភិបាល»៕
