ព្រះសីហនុៈ កម្លាំងអាវុធហត្ថខេត្តព្រះសីហនុនៅរសៀលថ្ងៃទី ១១ ខែកញ្ញានេះ បាននិងកំពុងសួរនាំជនសង្ស័យ ១៥ នាក់ ពាក់ព័ន្ធករណីចាប់ជំរិត ដែលបានផ្ទុះអាវុធលើសមត្ថកិច្ចនៅល្ងាចថ្ងៃទី ១០ ខែកញ្ញា នៅម្តុំចុងឆ្នេរអូរឈើទាល ទល់មុខបញ្ជាការកងរាជអាវុធហត្ថខេត្តព្រះសីហនុ។
លោក ញា ពិសិដ្ឋ ប្រធានមន្ទីរស្រាវជ្រាវយុត្តិធម៌នៃទីបញ្ជាការដ្ឋានកងរាជអាវុធហត្ថខេត្តព្រះសីហនុ ថ្លែងនៅរសៀលថ្ងៃទី ១១ ខែកញ្ញានេះថា កម្លាំងអាវុធហត្ថកំពុងបន្តនីតិវិធីសួរនាំជនសង្ស័យទាំង ១៥ នាក់ បន្ទាប់ពីបង្ក្រាបបាននៅយប់ថ្ងៃទី ១០ ខែកញ្ញា។ លោកថ្លែងថា៖ «ឥឡូវយើងទើបផ្តើមនីតិវិធីមួយចំនួន មិនទាន់មានលទ្ធផលអីដែលអាចបញ្ជាក់ជូនបានទេ»។
បើតាមលោក ពិសិដ្ឋ នៅល្ងាចថ្ងៃទី ១០ ខែកញ្ញា កម្លាំងអាវុធហត្ថបានចុះបង្ក្រាបករណីចាប់ជំរិតរវាងជនជាតិចិន និងជនជាតិចិន ដោយមានលោក ពេញ ពិសិដ្ឋ ព្រះរាជអាជ្ញារងជាអ្នកសម្របសម្រួលនីតិវិធី។ ក្រោយផ្ទុះអាវុធ ៥ ទៅ ៦ គ្រាប់ កម្លាំងសមត្ថកិច្ចការិយាល័យជំនាញនៃស្នងការដ្ឋាននគរបាលខេត្ត និងកម្លាំងអធិការដ្ឋាននគរបាលក្រុងព្រះសីហនុ បានចុះដល់កន្លែងកើតហេតុ និងបានសហការគ្នាធ្វើការបង្ក្រាបតែម្តង។
លោកបន្តថា ក្រុមជនជាតិចិនជាអ្នកចាប់ជំរិតប្រដាប់ដោយអាវុធបានបាញ់មុនទៅលើសមត្ថកិច្ច ហើយបានគេចខ្លួនឡើងទៅលើអគារ។ លោកបញ្ជាក់ថា ដោយមានការសម្របសម្រួលបញ្ជាផ្ទាល់ពី លោក សៀង សុខ ព្រះរាជអាជ្ញា នៃអយ្យការអមសាលាដំបូងខេត្តព្រះសីហនុ ទើបការសហការគ្នារបស់កងកម្លាំងទទួលបានជោគជ័យ។
លោក ពិសិដ្ឋ បញ្ជាក់ថា ក្នុងប្រតិបត្តិការនេះសមត្ថកិច្ចបានរកឃើញអាវុធ ចំនួន ៧ ដើមក្នុងនោះអាវុធខ្លី ៥ ដើម និងវែង ២ ដើម និងអាវការពារគ្រាប់ លាក់ទុកនៅទីតាំងជាអគារក្បែរឆ្នេរសមុទ្រមានកម្ពស់ ៩ ជាន់ មានជាន់ខ្លះជាបន្ទប់ អនឡាញ។ ជាមួយនោះបានរកឃើញ និងរំដោះជនរងគ្រោះជាចំណាប់ខ្មាំងចំនួន ២ នាក់ជាជនជាតិចិនផងដែរ៕