.jpg)
រដ្ឋបាលខេត្តកំពង់ចាមសម្រេចបន្តសុពលភាពនៃការអនុវត្តវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រខេត្តកំពង់ចាម រយៈពេលមួយសប្តាហ៍បន្ថែមទៀត។ រូបថត រដ្ឋបាលខេត្តកំពង់ចាម
កំពង់ចាមៈ រដ្ឋបាលខេត្តកំពង់ចាមសម្រេចបន្តសុពលភាពនៃការអនុវត្តវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រខេត្តកំពង់ចាម រយៈពេលមួយសប្តាហ៍បន្ថែមទៀត ចាប់ពីថ្ងៃទី ១០ រហូតដល់ថ្ងៃទី ១៦ ខែកញ្ញានេះ។
លោក អ៊ុន ចាន់ដា អភិបាលខេត្តកំពង់ចាមនៅថ្ងៃទី ១០ ខែកញ្ញា បានចេញលិខិតសម្រេចបន្តពង្រឹងវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ នៅទូទាំងខេត្តរយៈពេលមួយសប្តាហ៍ចាប់ពីថ្ងៃទី ១០ រហូតដល់ថ្ងៃទី ១៦ ខែកញ្ញា ដើម្បីធានាប្រសិទ្ធភាពនៃការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ជាពិសេស ក្នុងបរិបទដែលកម្ពុជា កំពុងប្រឈមនឹងការមកដល់នៃរលកទី ២ នៃការឆ្លងរីករាលដាលទ្រង់ទ្រាយធំនៃជំងឺកូវីដ ១៩ បណ្តាលមកពីមេរោគបំប្លែងខ្លួនថ្មីដែលតា។
ក្នុងលិខិតលោកអភិបាលខេត្តបានបញ្ជាក់ប្រាប់ទៅគណៈអភិបាលស្រុកក្រុង ទាំងអស់ត្រូវហាមឃាត់រាល់សកម្មភាពមួយចំនួនដូចជា សកម្មភាពមុខរបរ អាជីវកម្មក្លិបកម្សាន្តគ្រប់ប្រភេទ និងសកម្មភាពការងារ មុខរបរផ្សេងៗទៀត ដោយយោងតម្រូវការចាំបាច់ក្នុងការប្រយុទ្ធទប់ស្កាត់ការឆ្លងជំងឺកូវីដ ១៩ និង សកម្មភាពប្រមូលផ្តុំមនុស្សក្នុងការថ្វាយបង្គំតាមបែបសាសនាជាដើម។ ជាមួយគ្នានោះក៏ត្រូវហាមឃាត់អាជីវកម្មដូចជាតូបលក់ដូរ ផ្សាររាត្រី ផ្សារទំនើបជាដើម ចាប់ពីម៉ោង ៩ យប់ដល់ម៉ោង ៣ ទៀបភ្លឺ។
ដោយឡែកសកម្មភាពមួយចំនួនត្រូវបានលើកលែងក្នុងនោះមានការជួបជុំក្នុងចំណោមគ្រួសារ ការជួបជុំរបស់ស្ថាប័នសាធារណៈ ការប្រមូលផ្តុំមនុស្ស និងការជួបជុំរបស់បុគ្គលិកសុខាភិបាល និងការធ្វើសកម្មភាពការងាររបស់កងកម្លាំងគ្រប់ប្រភេទ ការដឹកជញ្ជូនទំនិញ និងគ្រឿងឧបភោគបរិភោគជាដើម។
លោកអភិបាលខេត្តថ្លែងក្នុងលិខិតថា៖ « រាល់សកម្មភាពនៃការជួបជុំ ឬការប្រមូលផ្តុំមនុស្ស សកម្មភាពការងារ មុខរបរ និងអាជីវកម្មដែលបានអនុញ្ញាតត្រូវអនុវត្តវិធានការសុខាភិបាលឱ្យបានម៉ឺងម៉ាត់ ជាអាទិ៍កាតព្វកិច្ចពាក់ម៉ាស់ រក្សាគម្លាតសុវត្ថិភាពបុគ្គល និងប្រកាន់ខ្ជាប់អនាម័យដើម្បីសម្លាប់មេរោគ ការវាស់កម្តៅ និងការអនុវត្តវិធានការសុវត្ថិភាពផ្នែកសុខាភិបាលផ្សេងទៀត»។
លោកអភិបាលខេត្តនេះបញ្ជាក់ថា ត្រូវដាក់ចេញនូវវិធានការបន្ទាន់ សំដៅគ្រប់គ្រងតំបន់ដែលរកឃើញថា មានការឆ្លងរាលដាលនៃមេរោគបំប្លែងខ្លួនថ្មីប្រភេទដែលតានៅក្នុងសហគមន៍ឱ្យបានទាន់ពេលវេលា និងកាត់ផ្តាច់ឱ្យបានទាន់ពេលវេលានូវខ្សែចម្លងមេរោគប្រភេទថ្មីឆ្លងទៅតំបន់ផ្សេង ដោយត្រូវបិទខ្ទប់ទីកន្លែង ភូមិ ខ្នងផ្ទះ ដែលរកឃើញករណីវិជ្ជមានកូវីដ ១៩ បំប្លែងខ្លួនថ្មី ប្រភេទដែលតា។
លោកថ្លែងថា៖ «ត្រូវធ្វើការស្រាវជ្រាវរកអ្នកដែលពាក់ព័ន្ធដោយផ្ទាល់ និងដោយប្រយោលជាមួយអ្នកផ្ទុកមេរោគប្រភេទថ្មី និងនាំអ្នកពាក់ព័ន្ធទាំងអស់នោះមកធ្វើចត្តាឡីស័កនៅមណ្ឌលចត្តាឡីស័កដែលបានរៀបចំសម្រាប់អ្នកពាក់ព័ន្ធនឹងមេរោគបំប្លែងខ្លនថ្មីដែលតានោះ»។
ដោយឡែកនៅថ្ងៃដដែលនោះ រដ្ឋបាលខេត្តកំពង់ចាមក៏បានប្រកាសពីការបិទបញ្ចប់យុទ្ធនាការចាក់វ៉ាក់សាំងកូវីដ ១៩ នៅទូទាំងខេត្តកំពង់ចាម និងបើកទីតាំងអចិន្ត្រៃយ៍ចាក់វ៉ាក់សាំងកូវីដ ១៩ នៅតាមមន្ទីរពេទ្យបង្អែកទាំង ៩ កន្លែងក្នុងខេត្តកំពង់ចាម ចាប់ពីថ្ងៃទី ១៩ ខែកញ្ញាផងដែរ៕
