ប៉ៃលិន/ពោធិ៍សាត់ៈ ខេត្តចំនួន ២ បន្ថែមទៀត បានធ្វើពិធីបិទបញ្ចប់យុទ្ធនាការចាក់វ៉ាក់សាំងកូវីដ ១៩ នៅទូទាំងខេត្តនាថ្ងៃទី ១២ ខែកញ្ញា ដែលមានខេត្តប៉ៃលិន និងខេត្តពោធិ៍សាត់ បន្ទាប់ពីខេត្ត ៣ ទើបតែបានប្រកាសបិទបញ្ចប់យុទ្ធនាការដូចគ្នានេះ ខណៈខេត្តកំពង់ចាមគ្រោងបិទបញ្ចប់នៅថ្ងៃទី ១៩ ខាងមុខនេះ។
រដ្ឋបាលខេត្តប៉ៃលិនបានរៀបចំពិធីបិទបញ្ចប់យុទ្ធនាការចាក់វ៉ាក់សាំងកូវីដ ១៩ សម្រាប់អ្នកដែលមានអាយុពី ១៨ ឆ្នាំឡើងជុំទី១ ក្នុងក្របខ័ណ្ឌទូទាំងខេត្ត ដោយមានការចូលរួមបិទពីលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខ័ណ្ឌទូទាំងប្រទេសផងដែរ។
យោងតាមរបាយការណ៍របស់រដ្ឋបាលខេត្តបានឱ្យដឹងថា ពលរដ្ឋអាយុពី ១៨ ឆ្នាំឡើងដែលបានចាក់វ៉ាក់សាំងដូសទី១ មានចំនួន ៤២ ០៥៣ នាក់ ស្មើនឹង ១០២,៥៧%,ចំណែកក្រុមអាយុពី ១២ ឆ្នាំ ដល់ក្រោម ១៨ ឆ្នាំដែលបានចាក់វ៉ាក់សាំងដូសទី ១ មានចំនួន ៨ ៦១៣ នាក់ ស្មើនឹង ៨៦,០៥%។
លោកស្រី ឱ វណ្ណឌីន បានថ្លែងក្នុងពិធីនោះថា ការបង្កើតឱ្យមាននូវភាពស៊ាំក្នុងសហគមន៍ទប់ទល់នឹងជំងឺកូវីដ ១៩ ជាយុទ្ធសាស្ត្រសំខាន់របស់រាជរដ្ឋាភិបាលក្នុងការឈានទៅបើកដំណើរការជាប្រក្រតីឡើងវិញលើគ្រប់វិស័យ ហេតុនេះទើបមានយុទ្ធនាការចាក់វ៉ាក់សាំងនៅទូទាំងប្រទេសពីដើមខែកុម្ភៈ ឆ្នាំ ២០២១ កន្លងមក។
លោកស្រីមានប្រសាសន៍ថា៖ «មកទល់ពេលនេះ កម្ពុជាសម្រេចការចាក់វ៉ាក់សាំងកូវីដ ១៩ បានប្រមាណជាង ៩០% ហើយនៅទូទាំងប្រទេស ដែលនេះបង្ហាញឱ្យឃើញពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាលក្នុងការគិតគូរពីសុខុមាលភាព និងជីវភាពរស់នៅរបស់ប្រជាពលរដ្ឋ»។
សម្រាប់ខេត្តប៉ៃលិន ការបិទយុទ្ធនាការចាក់វ៉ាក់សាំងនេះ សម្រាប់តែពលរដ្ឋអាយុពី ១៨ ឆ្នាំឡើងប៉ុណ្ណោះ ចំណែកឯកុមារអាយុពី ១២ ឆ្នាំ ដល់ក្រោម ១៨ ឆ្នាំ គឺនៅបន្តចាក់ជាធម្មតា។ ខេត្តក៏រក្សាវ៉ាក់សាំងមួយចំនួនសម្រាប់ពលរដ្ឋ ដែលជាប់ធ្វើចត្តាឡីស័ក និងពលករដែលទើបត្រឡប់មកពីបរទេស ពិសេសអ្នកមកពីប្រទេសថៃ ដើម្បីឱ្យពួកគាត់មានឱកាសទទួលបានវ៉ាក់សាំងសម្រាប់ជាកងការពារខ្លួនផងដែរ។
នៅថ្ងៃ ១២ កញ្ញាដែរ ខេត្តពោធិ៍សាត់ក៏បានប្រកាសបិទបញ្ចប់ការចាក់វ៉ាក់សាំងកូវីដ ១៩ ជុំទី១ សម្រាប់ពលរដ្ឋដែលមានអាយុពី ១២ ឆ្នាំឡើង ក្នុងក្របខ័ណ្ឌទូទាំងខេត្តផងដែរ។
ចំណែកខេត្តកំពង់ចាមបានប្រកាសបើកដំណើរការទីតាំងចំនួន ៩ កន្លែងសម្រាប់ចាក់វ៉ាក់សាំងកូវីដ ១៩ ជាអចិន្រៃ្តយ៍ទៅដល់ពលរដ្ឋដែលមានអាយុចាប់ពី ១២ ឆ្នាំឡើងទៅ ខណៈខេត្តនេះក៏បានប្រកាសបិទបញ្ចប់យុទ្ធនាការចាក់វ៉ាក់សាំងកូវីដ ១៩ សម្រាប់អ្នកមានវ័យពី ១២ ឆ្នាំឡើងទៅ នៅទូទាំងខេត្តចាប់ពីថ្ងៃទី ១៩ ខែកញ្ញា ខាងមុខនេះផងដែរ។
ទាក់ទងនឹងការបិទបញ្ចប់យុទ្ធនាការចាក់វ៉ាក់សាំងកូវីដ ១៩ នៅទូទាំងខេត្តកំពង់ចាម លោក អ៊ុន ចាន់ដា អភិបាលខេត្តមួយនេះបានឱ្យដឹងថា សម្រាប់ខេត្តកំពង់ចាមបានអនុវត្តតាមគោលការណ៍ណែនាំរបស់រាជរដ្ឋាភិបាលកម្ពុជាក្នុងការអនុវត្តនូវយុទ្ធនាការជាតិចាក់វ៉ាក់សាំងកូវីដ ១៩ សម្រាប់ពលរដ្ឋអាយុចាប់ពី ១៨ ឆ្នាំឡើង និងក្រុមអាយុចាប់ពី ១២ ឆ្នាំ ដល់ក្រោម ១៨ ឆ្នាំ នៅទូទាំងខេត្តកាលពីថ្ងៃទី ២៩ ខែមិថុនាកន្លងមក។
លោកបានលើកឡើងថា ចាប់តាំងពីថ្ងៃនៃយុទ្ធនាការចាក់វ៉ាក់សាំងនោះមកមានពលរដ្ឋ និងអាណាព្យាបាលជាច្រើនរហូតមានចំនួនលើសលប់ បានស្ម័គ្រចិត្តមកទទួលការចាក់វ៉ាក់សាំងកូវីដ ១៩ នៅតាមទីតាំងដែលរដ្ឋបាលខេត្តបានរៀបចំ។
លោក អ៊ុន ចាន់ដា បានបញ្ជាក់ថា៖ «ដោយផ្អែកតាមតួលេខនៃចំនួនអ្នកបានចាក់វ៉ាក់សាំងកូវីដ ១៩ រដ្ឋបាលខេត្តកំពង់ចាមបានសម្រេចនឹងធ្វើការបិទបញ្ចប់យុទ្ធនាការចាក់វ៉ាក់សាំងកូវីដ ១៩ ទៅដល់ប្រជាពលរដ្ឋដែលមានអាយុពី ១២ ឆ្នាំឡើងនៅទូទាំងខេត្តចាប់ពីថ្ងៃទី ១៩ ខែកញ្ញាខាងមុខតទៅ ប៉ុន្តែយើងក៏នឹងបើកដំណើរការជាអចិន្រៃ្តយ៍នូវទីតាំងចាក់វ៉ាក់សាំងកូវីដ ១៩ តាមមន្ទីរពេទ្យបង្អែកទាំង ៩ កន្លែងផងដែរ»។
ជាមួយគ្នានេះ រដ្ឋបាលខេត្តកំពង់ចាមក៏បានអំពាវនាវដល់ពលរដ្ឋដែលមានភាពអល់អែក និងមិនទាន់សម្រេចចិត្តចាក់វ៉ាក់សាំងកូវីដ ១៩ និងអ្នកមានបញ្ហាសុខភាពនាពេលកន្លងមកត្រូវរួសរាន់មកពិភាក្សាជាមួយគ្រូពេទ្យជំនាញដើម្បីទទួលយកការចាក់វ៉ាក់សាំងកូវីដ ១៩ ដោយស្ម័គ្រចិត្ត និងឥតគិតថ្លៃ នៅតាមមន្ទីរពេទ្យបង្អែកទាំង ៩ កន្លែងនោះ។
មន្ទីរពេទ្យបង្អែកទាំង ៩ ទីតាំងសម្រាប់ចាក់វ៉ាក់សាំងកូវីដ ១៩ ជាអចិន្រៃ្តយ៍ក្នុងខេត្តកំពង់ចាមមានមន្ទីរពេទ្យបង្អែកខេត្តកំពង់ចាម (សម្រាប់ក្រុងកំពង់ចាម និងស្រុកកំពង់សៀម), មន្ទីរពេទ្យបង្អែកស្រុកចំការលើ, មន្ទីរពេទ្យបង្អែកហ៊ុនសែនស្ទឹងត្រង់, មន្ទីរពេទ្យបង្អែកស្រុកព្រៃឈរ,មន្ទីរពេទ្យបង្អែកស្រុកជើងព្រៃ, មន្ទីរពេទ្យបង្អែកស្រុកបាធាយ, មន្ទីរពេទ្យបង្អែកស្រុកស្រីសន្ធរ, មន្ទីរពេទ្យបង្អែកស្រុកកោះសូទិន និងមន្ទីរពេទ្យបង្អែកស្រុកកងមាស។
គួរបញ្ជាក់ផងដែរនាពេលថ្មីៗកន្លងមកនេះខេត្តចំនួន ៣ បានប្រកាសបិទបញ្ចប់យុទ្ធនាការចាក់វ៉ាក់សាំងកូវីដ ១៩ ដែលក្នុងនោះមានខេត្តកណ្តាល ខេត្តព្រះសីហនុ និងខេត្តកែប។
គិតត្រឹមថ្ងៃទី ១១ ខែកញ្ញា កម្ពុជាបានចាក់វ៉ាក់សាំងកូវីដ ១៩ ជូនពលរដ្ឋបាន ៩៧,២៣% ធៀបជាមួយចំនួនប្រជាជនគោលដៅចំនួន ១០ លាននាក់ និងអ្នកដែលមានអាយុពី ១២ ឆ្នាំ ទៅក្រោម ១៨ ឆ្នាំបាន ៨៦,៧៧% ធៀបជាមួយប្រជាជនគោលដៅជិត ២ លាននាក់៕