.jpg)
លោកជំទាវ ជ្រឹង បុទុមរង្សី។ រូបថត សហការី
ភ្នំពេញៈ លោកជំទាវ ជ្រឹង បុទុមរង្សី គឺជារដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិមុនពេលត្រូវបានតែងតាំងជាឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ។
យោងតាមឯកសារជីវប្រវត្តិដែលមានចុះផ្សាយនៅលើគេហទំព័ររបស់ក្រសួងការបរទេស លោកជំទាវបានចាប់ផ្ដើមការងារដំបូងក្នុងក្របខ័ណ្ឌរដ្ឋាភិបាលកាលពីឆ្នាំ ២០១២ ក្នុងតួនាទីជាអ្នកសម្របសម្រួលថ្នាក់ខេត្តប្រចាំនៅខេត្តកំពតលើការធ្វើសមាហរណកម្មដីធ្លី ហើយបន្ទាប់មកលោកជំទាវបានទទួលតួនាទីជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងក្រសួងការបរទេស និងសហប្រតិបត្តិការអន្តរជាតិ។ ដោយសារតែលោកទាវ គឺជាមន្ត្រីរដ្ឋាភិបាលជាស្ត្រីលេចធ្លោម្នាក់ លោកជំទាវ បុទុមរង្សី បានស្ថិតនៅក្នុងក្រសែភ្នែកនៃពលរដ្ឋកម្ពុជា ជាពិសេសស្ត្រីវ័យក្មេង។
មុនពេលចាកចេញពីកម្ពុជា ដើម្បីទៅបំពេញបេសកកម្មជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូង កាលពីថ្ងៃទី ១០ ខែ កញ្ញា ឆ្នាំ ២០២១ លោកជំទាវ បុទុមរង្សី បានផ្ដល់បទសម្ភាសផ្ដាច់មុខជាមួយកាសែត ភ្នំពេញ ប៉ុស្តិ៍ ដែលមានខ្លឹមសារដូចខាងក្រោម៖
ភ្នំពេញ ប៉ុស្តិ៍៖ តើលោកជំទាវអាចជម្រាបបានទេថា លោកជំទាវសម្រេចបានសមិទ្ធផលអ្វីខ្លះក្នុងកិច្ចការងារជាមួយរដ្ឋាភិបាលដែលធ្វើឱ្យលោកជំទាវត្រូវបានជ្រើសតាំងជាឯកអគ្គរាជទូតប្រចាំប្រទេសកូរ៉េខាងត្បូង ហើយបានក្លាយជាអាយដលសម្រាប់ជនរួមជាតិរបស់លោកជំទាវ?
អរុណសួស្ដី ហើយក៏សូមថ្លែងអំណរគុណផងដែរដល់កាសែត ភ្នំពេញ ប៉ុស្តិ៍ ដែលបានផ្ដល់ឱកាសឱ្យខ្ញុំបានចែករំលែកពីអារម្មណ៍ និងគំនិតរបស់ខ្ញុំពាក់ព័ន្ធនឹងតួនាទីថ្មីរបស់ខ្ញុំជាឯកអគ្គរាជទូតប្រចាំសាធារណរដ្ឋកូរ៉េ។
សូមអរគុណដែលហៅខ្ញុំថាជា អាយដល ប៉ុន្តែខ្ញុំគិតថា ខ្ញុំមិនស័ក្ដិសមនឹងពាក្យ អាយដល នេះទេ។ ខ្ញុំគ្រាន់តែជាមនុស្សសាមញ្ញ ដែលទទួលបានការអនុញ្ញាតឱ្យធ្វើកិច្ចការ ដើម្បីបម្រើប្រទេសជាតិ និងប្រជាជនរបស់ខ្ញុំប៉ុណ្ណោះ។
ពាក់ព័ន្ធនឹងសំណួរថា តើខ្ញុំបានសម្រេចកិច្ចការអ្វីខ្លះក្នុងតួនាទីនៅក្នុងជួររដ្ឋាភិបាល តាមពិតទៅ ខ្ញុំមិនគិតថា វាជាសមិទ្ធផលទេ អ្វីដែលខ្ញុំបានបំពេញក្នុងតួនាទីរបស់ខ្ញុំគឺកាតព្វកិច្ចដើម្បីបម្រើប្រជាពលរដ្ឋ និងប្រទេសរបស់ខ្ញុំតែប៉ុណ្ណោះ។
ខ្ញុំបានចាប់ផ្ដើមបំពេញការងារក្នុងជួររដ្ឋាភិបាលកាលពីឆ្នាំ ២០១២ បន្ទាប់ពីបានចំណាយពេលជាច្រើនឆ្នាំក្នុងវិស័យឯកជន ដែលពេលនោះគឺខ្ញុំបានចូលរួមក្នុងបេសកកម្មមួយដឹកនាំដោយសម្ដេចនាយករដ្ឋមន្ត្រី ហ៊ុន សែន ក្នុងគោលដៅផ្ដល់កម្មសិទ្ធិដីធ្លីដល់បងប្អូនប្រជាពលរដ្ឋដែលរស់នៅជនបទ និងទីដាច់ស្រយាល។
បេសកកម្មនេះបានបង្រៀនខ្ញុំនូវមេរៀនជាច្រើន ហើយបានធ្វើឱ្យខ្ញុំដឹងច្បាស់ថា ការធ្វើកិច្ចការដើម្បីបម្រើផលប្រយោជន៍សាធារណៈពិតជាមានសារៈសំខាន់ខ្លាំងណាស់ គឺសំខាន់ជាងការបម្រើតែផលប្រយោជន៍ផ្ទាល់ខ្លួន។ កិច្ចការនេះបានជំរុញក្ដីប្រាថ្នារបស់ខ្ញុំឱ្យធ្វើការជាមួយប្រជាពលរដ្ឋ និងដើម្បីប្រជាពលរដ្ឋ ហើយបានតម្រង់ទិសនៃគោលដៅ និងការប្ដេជ្ញាចិត្តរបស់ខ្ញុំឆ្ពោះទៅកាន់វិស័យរដ្ឋ ដើម្បីជួយដល់ការងារសាធារណៈ និងធ្វើឱ្យមានការកែប្រែឱ្យកាន់តែប្រសើរជាងមុន។
បន្ទាប់មកនៅឆ្នាំ ២០១៣ ខ្ញុំមានកិត្តិយសខ្លាំងណាស់ ដែលត្រូវបានផ្ដល់តួនាទីជាអនុរដ្ឋលេខាធិការនៅក្រសួងប្រៃសណីយ៍ និងទូរគមនាគមន៍ ដែលពេលនោះខ្ញុំធ្វើការជាង ៦ ឆ្នាំក្នុងវិស័យជាច្រើន ចាប់ពីវិស័យទូរគមនាគមន៍ ព័ត៌មាន និងបច្ចេកវិទ្យាសារគមនាគមន៍ ហើយចុងក្រោយគឺនៅក្នុងវិស័យប្រៃសណីយ៍។
ខ្ញុំបានចូលរួមធ្វើកិច្ចការជាច្រើនដូចជា សេចក្ដីព្រាងគោលនយោបាយ គោលការណ៍ណែនាំ ច្បាប់ប្រៃសណីយ៍ និងនិយតកម្មនានាដែលសំដៅបម្រើផលប្រយោជន៍សាធារណជន និងផ្ដល់ជាគោលការណ៍គ្រឹះដែលមានលក្ខណៈតម្លាភាព និងកាន់តែមានប្រសិទ្ធភាព។
កិច្ចការបន្ទាប់ក្នុងវិជ្ជាជីវៈរបស់ខ្ញុំគឺ នៅឆ្នាំ ២០១៨ ខ្ញុំត្រូវបានចាត់តាំងឱ្យទៅបំពេញការងារនៅក្រសួងការបរទេស និងសហប្រតិបត្តិការអន្តរជាតិក្នុងតួនាទីជាអនុរដ្ឋលេខាធិការ។
នៅចុងឆ្នាំ ២០២០ ខ្ញុំត្រូវបានដំឡើងតួនាទីជារដ្ឋលេខាធិការ ហើយពេលនេះត្រូវបានតែងតាំងជាឯកអគ្គរាជទូតវិសាមញ្ញ និងពេញសមត្ថភាពប្រចាំសាធារណរដ្ឋកូរ៉េ។
លោកជំទាវ ជ្រឹង បុទុមរង្សី ឯកអគ្គរាជទូតថ្មីរបស់កម្ពុជាប្រចាំកូរ៉េខាងត្បូង។ រូបថត សហការី
ភ្នំពេញ ប៉ុស្តិ៍៖ តើលោកជំទាវមានពាក្យពេចន៍អ្វីសម្រាប់ស្ត្រីកម្ពុជាវ័យក្មេង និងអ្នកគាំទ្ររបស់លោកជំទាវទេ?
ខ្ញុំហាក់ដូចជាមិនចង់ផ្ដល់ជានិយមន័យអំពីស្ត្រី ឬតួនាទីយេនឌ័រទេ។ ប៉ុន្តែខ្ញុំចង់និយាយថា ក្នុងនាមជាស្ត្រីត្រូវតែមានទស្សនវិស័យច្រើន និងព្យាយាមធ្វើការឱ្យកាន់តែខ្លាំងថែមទៀត ហើយចំណាយពេលបន្ថែមទៀត ដើម្បីធ្វើទំនាក់ទំនង និងរុញច្រានទស្សនវិស័យទាំងនោះឱ្យទៅដល់គោលដៅ។
សាររបស់ខ្ញុំសម្រាប់ស្ត្រីទាំងអស់គឺថា យើងមិនត្រូវរងការបង្អាក់ទឹកចិត្តដោយសារតែស្ថានភាពអ្វីមួយដែលយើងជួបប្រទះនោះទេ។ ផ្ទុយទៅវិញ យើងត្រូវរក្សាឱ្យបាននូវបំណងប្រាថ្នារបស់យើង ការប្ដេជ្ញាចិត្តរបស់យើង ដើម្បីបង្ហាញពីសមត្ថភាពរបស់យើង និងអ្វីដែលយើងមានសមត្ថភាពធ្វើបាន។ បើធ្វើដូច្នេះបាននោះ គ្មានអ្នកណាអាចទប់នូវសំឡេងរបស់យើងបានទេ។
ប្រសិនបើយើងចង់ឱ្យអ្នកដទៃគោរពដល់ការងាររបស់យើង យើងត្រូវតែធ្វើកិច្ចការរបស់យើងឱ្យហ្មត់ចត់ និងឱ្យអស់តាមការប្ដេជ្ញាចិត្តរបស់យើង។ ជាទូទៅ ខ្ញុំមិនបដិសេធទេថា យើងមានគុណវិបត្តិខ្លះ ប៉ុន្តែយើងមិនត្រូវឱ្យគុណវិបត្តិនោះរារាំងយើងមិនឱ្យព្យាយាមសម្រេចគោលដៅរបស់យើងទេ ហើយយើងមិនត្រូវឱ្យខ្លួនយើងរាងចាលមិនហ៊ានធ្វើតាមការប្ដេជ្ញាចិត្តរបស់យើងនោះទេ។
បើយើងធ្វើដូច្នេះបាន យើងនឹងសម្រេចបានអ្វីដែលបេះដូងរបស់យើងចង់បាន។ ដោយសារតែខ្ញុំរក្សានូវគំនិតទាំងនេះក្នុងចិត្តជាប់ជានិច្ច កិច្ចការរបស់ខ្ញុំក្នុងរយៈពេល ៨ ឬ ៩ ឆ្នាំចុងក្រោយនេះបង្ហាញពីការប្ដេជ្ញាចិត្តរបស់ខ្ញុំក្នុងការបំពេញកាតព្វកិច្ច និងបម្រើប្រទេសជាតិ និងប្រជាពលរដ្ឋ។
ភ្នំពេញប៉ុស្តិ៍៖ តើលោកជំទាវនឹងប្រឈមមុខដោះស្រាយបញ្ហាយ៉ាងដូចម្ដេចក្នុងនាមជាឯកអគ្គរាជទូតនាពេលខាងមុខនេះ? តើលោកជំទាវមានគោលដៅ និងក្ដីរំពឹងយ៉ាងណាដែរចំពោះបេសកកម្មនេះ?
ពិតណាស់ តួនាទីរបស់ខ្ញុំជាឯកអគ្គរាជទូតនឹងជួបនូវបញ្ហាប្រឈមខ្លះ ជាពិសេសដោយសារតែខ្ញុំថ្មីសម្រាប់កិច្ចការនេះ ខ្ញុំទើបតែចាប់ផ្ដើមនៅឆ្នាំ ២០១៨ ដូច្នេះខ្ញុំនៅបន្តរៀនសូត្រពីវិស័យនេះនៅឡើយ។ ប៉ុន្តែខ្ញុំមិនព្យាយាមគេចចេញពីបញ្ហាប្រឈមទាំងនេះទេ។ ខ្ញុំព្យាយាមជម្នះវាឱ្យបាន។ បញ្ហាប្រឈមនេះហើយដែលធ្វើឱ្យមនុស្សម្នាក់កាន់តែខ្លាំង ធ្វើឱ្យមនុស្សមានអត្តចរិតមួយ និងបង្កើតបានជាកេរដំណែល។ ការឆ្លងកាត់ពេលវេលាដ៏លំបាកវារឹតតែធ្វើឱ្យយើងកោតសរសើរដល់កិច្ចប្រឹងប្រែងរបស់យើង និងធ្វើឱ្យទទួលបានលទ្ធផលកាន់តែច្រើន។
ខ្ញុំមានក្ដីសប្បាយរីករាយលាយឡំជាមួយនឹងការភ័យខ្លះដែរ នៅក្នុងមុខតំណែងថ្មីនេះ។ ខ្ញុំសប្បាយចិត្តដោយសារតែខ្ញុំនឹងចាប់ផ្ដើមប្រឡូកក្នុងដំណើរដ៏រីករាយនៅក្នុងទឹកដីថ្មី ដើម្បីតំណាងឱ្យប្រទេសរបស់ខ្ញុំ វប្បធម៌របស់ខ្ញុំ ពលរដ្ឋខ្ញុំ និងមានឱកាសលើកកម្ពស់កិត្យានុភាពជាតិ ព្រមទាំងនាំមកនូវផលប្រយោជន៍សម្រាប់ប្រជាពលរដ្ឋ។
ប៉ុន្តែម្យ៉ាងទៀត មុខតំណែងនេះក៏ជាមុខតំណែងមួយប្រកបដោយបញ្ហាប្រឈមផងដែរ ដូច្នេះហើយបានជាខ្ញុំតែងតែកោតសរសើរដល់អ្នកដែលកាន់តំណែងនេះមុនខ្ញុំ គឺលោក ឡុង ឌីម៉ង់ ដែលបានធ្វើកិច្ចការនេះបានយ៉ាងល្អប្រសើរក្នុងការបម្រើដល់ប្រជាពលរដ្ឋ និងប្រទេសជាតិក្នុងពេលលោកកាន់អាណត្តិនេះ។
ខ្ញុំកោតសរសើរចំពោះកិច្ចការរបស់គាត់ និងការបូជា ហើយខ្ញុំក៏សូមអរគុណគាត់ផងដែរ សម្រាប់កិច្ចការទាំងនេះក្នុងមុខតំណែងរបស់លោក។ ខ្ញុំសង្ឃឹមថា នឹងដើរតាមអ្វីដែលលោកបានធ្វើ ហើយនាំមកនូវផលប្រយោជន៍សម្រាប់ប្រទេសរបស់យើង ក្នុងតួនាទីជាឯកអគ្គរាជទូតនេះ។
ភ្នំពេញប៉ុស្តិ៍៖ តើលោកជំទាវមានពាក្យពេចន៍អ្វី សម្រាប់ពលករកម្ពុជាដែលកំពុងធ្វើការនៅប្រទេសកូរ៉េខាងត្បូង?
សម្រាប់ពលរដ្ឋខ្មែរ ដែលរស់នៅប្រទេសកូរ៉េខាងត្បូង ខ្ញុំចង់និយាយថា ខ្ញុំមានក្ដីសោមនស្សរីករាយណាស់ដែលត្រូវបានផ្ដល់នូវតួនាទីនេះ ហើយខ្ញុំមានកិត្តិយសណាស់ដែលបានធ្វើជាតំណាងរបស់ប្រទេសយើង។ ខ្ញុំត្រៀមខ្លួនរួចរាល់ ដើម្បីបម្រើផលប្រយោជន៍សម្រាប់ពលរដ្ឋ និងប្រទេសរបស់យើង។ ខ្ញុំទន្ទឹងរង់ចាំជួបជាមួយបងប្អូនយើងនៅទីនោះគ្រប់គ្នា។
សូមបងប្អូន កុំមានការរារែកចិត្តក្នុងការទាក់ទងមកខ្ញុំ ព្រោះខ្ញុំគឺជាមនុស្សសាមញ្ញធម្មតាទេ។ ខ្ញុំចង់ស្គាល់បងប្អូនគ្រប់គ្នា និងចែករំលែកបទពិសោធក៏ដូចជា ការងារបស់យើង។ ខ្ញុំរំពឹងថា យើងអាចក្លាយជាមិត្តដ៏យូរអង្វែង និងមានអនុស្សាវរីយ៍ជាមួយគ្នាយ៉ាងច្រើន។
បើយើងរួបរួមគ្នា យើងអាចជួយដល់ប្រទេស និងនាំផលប្រយោជន៍មកប្រទេសរបស់យើង។
ភ្នំពេញប៉ុស្តិ៍៖ តើលោកជំទាវមានពាក្យអ្វីសម្រាប់ជនរួមជាតិរបស់លោកជំទាវទេ?
ក្នុងតួនាទីជាឯកអគ្គរាជទូត ខ្ញុំមានគោលបំណងពង្រឹងទំនាក់ទំនងទ្វេភាគី ជាពិសេសទៅទៀតនោះ បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ត្រូវបានចុះហត្ថលេខា ដែលខ្ញុំរំពឹងថាវានឹងជំរុញដល់ការធ្វើពាណិជ្ជកម្ម ការវិនិយោគ និងទេសចរណ៍រវាងប្រទេសទាំង ២ ព្រមទាំងបង្កើតឱកាសការងារ ធានាបាននូវសន្តិសុខស្បៀង និងកសាងស្ថិរភាពសេដ្ឋកិច្ចឡើងវិញ បន្ទាប់ពីវិបត្តិកូវីដ ១៩៕
