.jpg)
ពលរដ្ឋពិនិត្យឈ្មោះក្នុងបញ្ជីបោះឆ្នោត នៅរាជធានីភ្នំពេញ កាលពីថ្ងៃទី ២៨ កក្កដា ឆ្នាំ ២០១៨។ ហេង ជីវ័ន
ភ្នំពេញៈ មន្ត្រីនាំពាក្យគណៈកម្មាធិការជាតិរៀបចំការបោះឆ្នោត (គជប) ឱ្យដឹងថា ប្រជាពលរដ្ឋដែលនឹងត្រូវចុះឈ្មោះថ្មីគ្រប់អាយុ ១៨ ឆ្នាំដល់ថ្ងៃបោះឆ្នោត សម្រាប់ឆ្នាំ ២០២១ នេះមានជាង ១ លាន ៦ សែននាក់ បើធៀបនឹងឆ្នាំ ២០២០ មានជាង ៥០ ម៉ឺននាក់។
លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប. ប្រាប់ ភ្នំពេញ ប៉ុស្តិ៍ នៅថ្ងៃ ទី ១២ កញ្ញាថា ចំនួននេះមានការកើនឡើងជិត ៣ ដងនៃការចុះឈ្មោះបោះឆ្នោតឆ្នាំ ២០២០ ព្រោះឆ្នាំនេះ គឺជាឆ្នាំដែល គ.ជ.ប. ត្រូវរៀបចំបញ្ជីបោះឆ្នោតថ្មី សម្រាប់ការបោះឆ្នោតជ្រើសរើសក្រុមប្រឹក្សា ឃុំសង្កាត់អាណត្តិទី៥ ឆ្នាំ ២០២២។ លោកថា ជារៀងរាល់ការរៀបចំបញ្ជីបោះឆ្នោតសម្រាប់ឆ្នាំ ដែលត្រូវបោះឆ្នោតតួលេខដែលប្រជាពលរដ្ឋត្រូវចុះឈ្មោះថ្មីតែងតែមានចំនួនច្រើនជាងឆ្នាំ ដែលមិនមានការរៀបចំការបោះឆ្នោត។
លោកថ្លែងថា មួយវិញទៀត ផ្អែកលើមូលដ្ឋានច្បាប់ដែលត្រូវបានកំណត់ក្នុងមាត្រា ៤៤ នៃច្បាប់ ស្តីពីការបោះឆ្នោតបានចែងថា បញ្ជីបោះឆ្នោតសម្រាប់ការបោះឆ្នោតត្រូវមាន [ឈ្មោះ] និងចុះឈ្មោះប្រជាពលរដ្ឋដែលមានសិទ្ធិបោះឆ្នោត ដែលមានអាយុចាប់ពី ១៨ ឆ្នាំឡើងទៅឱ្យបានគ្រប់ៗគ្នា។
លោកថ្លែងបញ្ជាក់ថា៖ «យើងយកតួលេខប្រជាពលរដ្ឋដែលគ្រប់អាយុបោះឆ្នោតហ្នឹង ដែលសរុបទៅ ១៨ ឆ្នាំឡើងលើ មានជាង ១០ លាននាក់ មកដកជាមួយនឹងតួលេខដែលប្រជាពលរដ្ឋមានឈ្មោះនៅក្នុងបញ្ជីបោះឆ្នោតជាង ៨ លាន ៨ សែន ឆ្នាំ ២០២០។ អ៊ីចឹង វាឃើញ ១ លាន ៦ សែននាក់ជាង ដែលត្រូវចុះឈ្មោះថ្មីសម្រាប់ឆ្នាំនេះ»។
ទោះជាយ៉ាងណា លោកថា ការចុះឈ្មោះបោះឆ្នោតឆ្នាំ ២០២១ ទទួលបានជោគជ័យ ឬមិនជោគជ័យ អាស្រ័យលើការចូលរួមរបស់ប្រជាពលរដ្ឋ ដែលយល់ពីកាតព្វកិច្ច និងសិទ្ធិក្នុងការចូលរួមបោះឆ្នោតនៅក្នុងប្រទេស។ ប៉ុន្តែ គ.ជ.ប. នឹងសហការជាមួយអាជ្ញាធរគ្រប់លំដាប់ថ្នាក់ជំរុញឱ្យពលរដ្ឋចូលរួមចុះឈ្មោះបោះឆ្នោតថ្មីនេះ ឱ្យទទួលបានជោគជ័យ និងឱ្យមានការកើនឡើងច្រើនជាងឆ្នាំ ដែលមិនមានការបោះឆ្នោត។
លោក ប្រាជ្ញ ចន្ទ ប្រធាន គ.ជ.ប. ថ្លែងក្នុងកិច្ចប្រជុំជាមួយភាគីពាក់ព័ន្ធតាមប្រព័ន្ធវីដេអូអនឡាញនាថ្ងៃទី ១០ កញ្ញា ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ គឺដើម្បីកសាងបាននូវបញ្ជីបោះឆ្នោតផ្លូវការ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ ២០២២។
លោកថា គ.ជ.ប. ត្រូវផ្តល់សុពលភាព និងប្រកាសផ្សាយបញ្ជីបោះឆ្នោតផ្លូវការ ៩០ ថ្ងៃយ៉ាងតិច មុនថ្ងៃបោះឆ្នោត។ ព្រោះរដ្ឋាភិបាលកម្ពុជាចេញសេចក្ដីសម្រេចស្តីពីការកំណត់កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ- សង្កាត់ អាណត្តិទី៥ នៅថ្ងៃអាទិត្យ ទី ៥ ខែមិថុនា ឆ្នាំ ២០២២។
លោកបន្តថា ដើម្បីត្រៀមរៀបចំ និងអនុវត្តការងារតាមដំណាក់កាលបានជោគជ័យ គ.ជ.ប. បានរៀបចំផែនការមេ និងប្រតិទិន សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ ក្នុងនោះការពិនិត្យបញ្ជីឈ្មោះ និងការចុះឈ្មោះបោះឆ្នោត ចាប់ផ្តើមពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១។
លោកថ្លែងថា៖ «តាមរយៈការស្រង់ស្ថិតិប្រជាពលរដ្ឋដែលមានសិទ្ធិបោះឆ្នោតក្នុងឃុំសង្កាត់ នៅទូទាំងប្រទេសត្រូវបានប៉ាន់ស្មានថាប្រជាពលរដ្ឋអាយុ ១៨ ឆ្នាំឡើង មានចំនួន ១០ ៨៦៧ ៩៦១ នាក់។ ការិយាល័យបោះឆ្នោតមានចំនួន ២៣ ៦១១ ការិយាល័យ។ ប្រជាពលរដ្ឋដែលត្រូវចុះឈ្មោះថ្មីមានចំនួន ១ ៦៣៥ ៩៩០ នាក់ និង ប្រជាពលរដ្ឋដែលត្រូវលុបចេញពីបញ្ជីបោះឆ្នោតមានចំនួន ៨៣ ០៤៣ នាក់»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា (និកហ្វិក) ថ្លែងថា ចំនួននៃអ្នកចុះឈ្មោះថ្មីសម្រាប់ឆ្នាំ ២០២១ នេះមាន ២ ប្រភេទ គឺពលករធ្វើការនៅក្រៅប្រទេស ដូចជានៅប្រទេសថៃ និងកូរ៉េ ជាដើមបានវិលត្រឡប់មកកម្ពុជាវិញ ហើយមិនធ្លាប់បានចុះឈ្មោះពីមុនមកមានចំនួនច្រើន។ មួយទៀតប្រជាពលរដ្ឋដែលមានអាយុ ១៨ ឆ្នាំមានប្រមាណ ២០ ម៉ឺននាក់។
លោកថា ចំនួនភាគច្រើន គឺជាពលករមកពីប្រទេសថៃ និងមិនធ្លាប់បានចុះឈ្មោះ និងមានឈ្មោះក្នុងបញ្ជីបោះឆ្នោតពីមុនមក ដែលធ្វើឱ្យចំនួននេះកើនឡើងច្រើនដល់ជាង ១ លាន ៦ សែននាក់។ ប៉ុន្តែបញ្ហាជំងឺកូវីដ ១៩ វាអាចនឹងប៉ះពាល់ដល់ដំណើរការនៃការរៀបចំការចុះបញ្ជីឈ្មោះអ្នកបោះឆ្នោតថ្មី នៅក្នុងប្រទេស។
លោកស្នើសុំឱ្យភាគីពាក់ព័ន្ធ គណបក្សនយោបាយ ជាពិសេសអាជ្ញាធរមូលដ្ឋាន ផ្សព្វផ្សាយឱ្យបានទូលំទូលាយពីដំណើរការនៃការចុះឈ្មោះបោះឆ្នោតថ្មីនេះជូនពលរដ្ឋឱ្យបានជ្រាបឱ្យពួកគាត់មកចុះឈ្មោះ ដើម្បីមានសិទ្ធិក្នុងការចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០២២។
លោកថ្លែងថា៖ «យើងជួយលើកទឹកចិត្ត ជួយផ្សព្វផ្សាយ និងជំរុញការងារគាត់។ អាជ្ញាធរត្រូវតែជួយ ឧទាហរណ៍គាត់ខ្វះឯកសារ ដូចជាអត្តសញ្ញាណប័ណ្ណគាត់ហួសសុពលភាពអ៊ីចឹងទៅត្រូវតែពន្លឿន ធ្វើថ្មីជូនពួកគាត់ដើម្បីឱ្យគាត់អាចចុះឈ្មោះបានទាន់ពេល»៕
វីដេអូ៖
