កណ្ដាលៈ នគរបាលខេត្ដកណ្ដាលបានដោះលែងពលរដ្ឋចំនួន ២១ នាក់ និង ៩ នាក់ បានបញ្ជូនទៅស៊ើបអង្កេតបន្តនៅតុលាការ បន្ទាប់ឃាត់ខ្លួនអស់ពេល ២ យប់ គិតចាប់ពីថ្ងៃទី ១២ កញ្ញា ដោយសារជម្លោះវិវាទដីធ្លីនៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី ក្នុងឃុំបឹងខ្យាង ស្រុកកណ្តាលស្ទឹង បណ្តាលឱ្យសមត្ថកិច្ចរងរបួស ១៣ នាក់។
លោកស្រី ឃឹម សូម៉ាលី តំណាងពលរដ្ឋដែលមានបញ្ហាដីធ្លីជាង ៣០០ គ្រួសារ នៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី បានបញ្ជាក់នៅថ្ងៃទី ១៤ ខែកញ្ញានេះថា៖ «ឥឡូវគេដោះលែងតែ ២១ នាក់ទេ ចំណែក ៩ នាក់ទៀត សមត្ថកិច្ចបញ្ជូនទៅសាកសួរបន្តនៅតុលាការ។ គេបញ្ជូនទៅហ្នឹងគេចោទពួកខ្ញុំថាមានចបជីក ចបកាប់ កាំបិត មកធ្វើឃាតគេ»។
លោកស្រីអះអាងថា ចបជីកកាំបិត ចបកាប់ របស់ពលរដ្ឋ គឺទុកសម្រាប់ប្រើប្រាស់កាប់របង ជីកដី ដាក់បង្គោលរបង ដើម្បីកុំឱ្យគ្រឿងចក្រក្រុមហ៊ុនឈូឆាយចូលដល់ដីកម្មសិទ្ធិ។
លោកស្រីបន្តថា៖ «និយាយទៅច្បាប់នៅលើគេ គេធ្វើអីក៏ត្រូវដែរ ពលរដ្ឋធ្វើអីក៏ខុសដែរ »។
តាមសេចក្ដីប្រកាសព័ត៌មានរបស់រដ្ឋបាលខេត្តកណ្តាលឱ្យដឹងថា កាលពីថ្ងៃទី ១២ ខែកញ្ញា កងសមត្ថកិច្ចខេត្ដ បានឃាត់ខ្លួនពលរដ្ឋចំនួន ៣០ នាក់ យកទៅសាកសួរនៅស្នងការដ្ឋាននគរបាលខេត្ដ បន្ទាប់ពីប៉ះទង្គិចជាមួយសមត្ថកិច្ចក្នុងរឿងវិវាទដីធ្លីនៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មីបណ្ដាលឱ្យសមត្ថកិច្ចរងរបួស១៣នាក់។
រដ្ឋបាលខេត្ដកណ្ដាលបញ្ជាក់ថា កាលពីវេលាម៉ោង ១០-១២ ព្រឹកថ្ងៃទី ៣០ កញ្ញា មានក្រុមមនុស្សប្រមាណ ១០០ នាក់ បានមកប្រមូលផ្តុំគ្នាប្រើអំពើហិង្សា និងជេរប្រមាថដោយបានដុតកៅស៊ូកង់ និងសម្ភារផ្សេង។ ប្រើដំបងគប់ដុំថ្មបាញ់ចម្ពាមកៅស៊ូ គប់ដបសាំង មកលើកងកម្លាំងមានសមត្ថកិច្ចដែលកំពុងឈរជើងបំពេញការងាររក្សាសន្តិសុខ និងសណ្តាប់ធ្នាប់ក្នុងទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី បណ្តាលឱ្យសមត្ថកិច្ចរងរបួសចំនួន ១៣ នាក់។
រដ្ឋបាលខេត្ដបញ្ជាក់ទៀតថា ស្ថិតក្នុងស្ថានភាពប្រើអំពើហិង្សា កងកម្លាំងបានបង្ខំចិត្តបំបែកក្រុមបាតុករដោយប្រើរថយន្តបាញ់ទឹក ឧស្ម័នបង្ហូរទឹកភ្នែក ដើម្បីការពារខ្លួននិងបំបែកក្រុមបាតុករព្រមទាំងបានឃាត់ខ្លួនក្រុមបាតុករ ៣០ នាក់ ក្នុងនោះមានស្រី ២០ នាក់ ដើម្បីយកមកសាកសួរនៅស្នងការដ្ឋាននគរបាលខេត្តកណ្តាល។
លោក គង់ សោភ័ណ្ឌ អភិបាលខេត្ដកណ្ដាល លោកឈឿន សុចិត្ដ ស្នងការនគរបាលខេត្ដកណ្ដាលនិងលោកលោក ទិន សុចិត្រា ព្រះរាជអាជ្ញារងនិងជាអ្ននាំពាក្យសាលាដំបូងខេត្តកណ្ដាលនៅថ្ងៃទី ១៤ ខែកញ្ញា មិនអាចទាក់ទងសុំបកស្រាយរឿងនេះបានទេ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស (អាដហុក) បានលើកឡើងថា ករណីវិវាទដីធ្លីរវាងពលរដ្ឋជិត ៤០០ គ្រួសារ នៅទីតាំងដីគម្រោងសាងសង់ប្រលានយន្តហោះអន្តរជាតិថ្មី នេះ បានកើតឡើងអស់រយៈពេលជាង ៣ ឆ្នាំទៅហើយ។ ចំណែកការទាមទារ តវ៉ាស្វែងរកដំណោះស្រាយ របស់ពលរដ្ឋក៏គ្មានលទ្ធផលដែរ។
លោកថ្លែងថា៖ «យើងមើលឃើញថា ការដាក់សម្ពាធឱ្យប្រជាពលរដ្ឋយកសំណងទៅតាមអាជ្ញាធរឬការចង់បានរបស់ក្រុមហ៊ុន គឺជារឿងដែលមិនត្រឹមត្រូវតាមច្បាប់ទេ ព្រោះច្បាប់បានការពារដីកម្មសិទ្ធិស្របច្បាប់របស់ប្រជាពលរដ្ឋ»។
លោក សែនករុណា ស្នើឱ្យអាជ្ញាធរពិនិត្យនិងពិចារណាដោះលែងពលរដ្ឋ ព្រោះករណីវិវាទដីធ្លីនេះ ពលរដ្ឋបានស្នើសុំស្វែងរកដំណោះស្រាយជាច្រើនឆ្នាំកន្លងទៅហើយ ប៉ុន្ដែគ្មានលទ្ធផលហើយបែរជាត្រូវឃាត់ខ្លួនទៅវិញ៕
វីដេអូ៖