.jpg)
ស្នាក់ការគណៈកម្មាធិការជាតិរៀបចំការបោះឆ្នោត។ ហុង មិនា
ភ្នំពេញៈ ចំនួនឃុំ-សង្កាត់ និងសមាជិកក្រុមប្រឹក្សានៅថ្នាក់មូលដ្ឋាន សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ ខាងមុខនេះ មានការកើនឡើងចំនួនពី ១ ៦៤៦-១ ៦៥២ឃុំ-សង្កាត់ បើធៀបជាមួយនឹងការបោះឆ្នោតឃុំ-សង្កាត់ ក្នុងអាណត្តិទី ៤ ឆ្នាំ ២០១៧ កន្លងទៅនេះ។
លោក សោម សូរីដា អគ្គលេខាធិការរង និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) បានប្រាប់ភ្នំពេញប៉ុស្តិ៍នៅថ្ងៃទី ១៤ ខែកញ្ញាថា សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ នេះ មានឃុំ-សង្កាត់ចំនួន ១ ៦៥២ កើនឡើងចំនួន ៦ ឃុំ-សង្កាត់ និងសមាជិកក្រុមប្រឹក្សាឃុំ-សង្កាត់មានចំនួន ១១ ៦២២រូប មានការកើនឡើងចំនួន ៥០ រូប។
លោកបញ្ជាក់ថា មូលហេតុដែលមានការកើនឡើងចំនួនឃុំ-សង្កាត់ និងសមាជិកក្រុមប្រឹក្សាឃុំ-សង្កាត់នេះ ដោយសារការបង្កើតឃុំ-សង្កាត់ថ្មីរបស់រាជរដ្ឋាភិបាលរួមជាមួយនឹងកត្តាភូមិសាស្ត្រ កត្តាសេដ្ឋកិច្ច និងប្រជាសាស្ត្រ របស់ប្រទេសកម្ពុជា។
លោក សោម សូរីដា ថ្លែងថា៖ «ការកើនឡើងឃុំ-សង្កាត់នេះ វានឹងនាំឱ្យមានការប្រែប្រួលដល់សមាជិកក្រុមប្រឹក្សាឃុំសង្កាត់ដែរ ប៉ុន្តែក្នុងនោះ ឃុំ-សង្កាត់មួយចំនួន ដែលជាឃុំ-សង្កាត់ចាស់ក៏មានការកើនឡើងចំនួនក្រុមប្រឹក្សាដែរ ដោយសារកត្តាប្រជាសាស្ត្រ សេដ្ឋកិច្ច និងភូមិសាស្ត្រ ដើម្បីឆ្លើយតបទៅនឹងការរីកចម្រើនទាំងនេះ»។
ទោះជាយ៉ាងណា លោក សូរីដា បានបញ្ជាក់ថា បើទោះបីមានកំណើនឃុំ-សង្កាត់ និងសមាជិកក្រុមប្រឹក្សាឃុំ-សង្កាត់អាណត្តិថ្មីនេះក៏ដោយ ក៏មិនធ្វើឱ្យ គ.ជ.ប. មានការលំបាកក្នុងការរៀបចំការបោះឆ្នោតដែរ ព្រោះ គ.ជ.ប. មានបទពិសោធគ្រប់គ្រាន់សម្រាប់ធ្វើការរៀបចំរហូតចូលដល់អាណត្តិទី ៥ នៅពេលនេះ។ ដូច្នេះ គ្មានអ្វីជាបញ្ហា សម្រាប់ គ.ជ.ប. ក្នុងការរៀបចំនោះទេ។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃអង្គការឃ្លាំមើលការបោះឆ្នោត (Comfrel) លើកឡើងថា បើទោះបីមានការកើនឡើងនៃចំនួនឃុំ-សង្កាត់ និងក្រុមប្រឹក្សាឃុំ-សង្កាត់នេះក៏ដោយ ក៏វាមិនមានអ្វីលំបាកក្នុងការរៀបចំការបោះឆ្នោតរបស់ គ.ជ.ប. នោះទេ។ ប៉ុន្តែវាគ្រាន់តែបង្កើនការគ្រប់គ្រង និងការចំណាយប្រាក់បៀវត្សរ៍របស់រដ្ឋាភិបាលទៅលើក្រុមប្រឹក្សា និងការរៀបចំទីតាំងរដ្ឋបាលនៅពេលបោះឆ្នោតរួចរាល់។
មន្ត្រីឃ្លាំមើលការបោះឆ្នោតរូបនេះបានថ្លែងថា ចំពោះការរៀបចំការបោះឆ្នោត គឺរៀបចំសមាសភាពក្រុមប្រឹក្សាឃុំ-សង្កាត់ និងបង្កើតការិយាល័យបន្ថែម ១ ទៀត ជាពិសេសការចុះឈ្មោះបោះឆ្នោត។ ប៉ុន្តែការិយាល័យបោះឆ្នោត គឺនៅតែដដែលនោះទេ វាគ្រាន់តែជាការចែករំលែកពីឃុំ-សង្កាត់ផ្សេងៗមកដាក់បញ្ចូលតែប៉ុណ្ណោះ។
លោកបានបញ្ជាក់ថា៖ «ការបង្កើនឃុំសង្កាត់ និងក្រុមប្រឹក្សាឃុំ-សង្កាត់នេះ វាគ្មានអ្វីថ្មីនោះទេ។ ប៉ុន្តែ វាគ្រាន់តែបង្កើតរដ្ឋបាលឃុំ-សង្កាត់បង្កើតថ្មី មនុស្សត្រូវបន្ថែម ដើម្បីធ្វើកិច្ចការក្នុងហ្នឹង ហើយតួនាទី សេវាផ្សេង ក៏បង្កើនក្នុងហ្នឹងដែរ។ នេះជាចំណុចផ្សេងដែលយើងមើលឃើញ»។
គណៈកម្មាធិការជាតិរៀបចំការបោះឆ្នោតនៅថ្ងៃទី ១៤ ខែកញ្ញា ឆ្នាំ ២០២១ បានចេញសេចក្ដីជូនដំណឹងស្ដីពីការកំណត់ចំនួនឃុំ-សង្កាត់ និងចំនួនសមាជិកក្រុមប្រឹក្សាឃុំ-សង្កាត់ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២។ ក្នុងនោះ ឃុំ-សង្កាត់មានចំនួនសរុប ១ ៦៥២ និងសមាជិកក្រុមប្រឹក្សាឃុំ-សង្កាត់មានចំនួន ១១ ៦២២ រូប។
សេចក្ដីជូនដំណឹងរបស់ គ.ជ.ប. ក៏បានបញ្ជាក់ផងដែរ ថាសម្រាប់ការបោះឆ្នោតជ្រើសរើស សមាជិកក្រុមប្រឹក្សាឃុំ-សង្កាត់ ក្នុងអាណត្តិទី ៥ ឆ្នាំ ២០២២ នឹងត្រូវប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខនេះ៕
