ភ្នំពេញៈ ពលរដ្ឋភាគច្រើនក្នុងចំណោម ៣២៩ គ្រួសារ រស់នៅក្នុងភូមិចំនួន ៧ បានបដិសេធទទួលយកដំណោះស្រាយរបស់អន្តរក្រសួងលើការអាស្រ័យផលលើដីនៅតំបន់ចម្ការបារាំង ក្នុងឃុំទួលព្រេជ ស្រុកអង្គស្នួល ខេត្តកណ្តាល ដែលសម្រេចផ្តល់ឱ្យ ១ ១០០ ដុល្លារ ចំពោះការដាំដំណាំលើដី ១ ហិកតា និងផ្ដល់ឱ្យតែ ៤ ឆ្នាំទៅមុខ។ ប៉ុន្តែមានពលរដ្ឋខ្លះ ព្រមយកសំណងនេះ ថ្វីបើភាគច្រើននៅប្រកាន់ជំហរបន្តតវ៉ាទៀតក្ដី។
លោក គាំ រិទ្ធ តំណាងពលរដ្ឋរស់នៅក្នុងភូមិអង្គតាសិតនៃឃុំទួលព្រេជ ប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែកញ្ញាថា ពលរដ្ឋទាំងអស់មិនពេញចិត្តចំពោះដំណោះស្រាយរបស់អន្តរក្រសួងនោះទេ ដោយសារពួកគាត់បានអាស្រ័យផលនៅលើដីនេះប្រមាណ ៣០ ឬ ៤០ ឆ្នាំមកហើយ ប៉ុន្តែការផ្ដល់ដំណោះស្រាយគឺឱ្យតែត្រឹមរយៈពេល ៤ ឆ្នាំប៉ុណ្ណោះ។
លោកបន្តថា អាជ្ញាធរប្រាប់ពលរដ្ឋថា បើមិនទទួលយកសំណង និងដំណោះស្រាយនេះទេនឹងយកត្រាក់ទ័រមកឈូសឆាយដីនេះ និងថាមិនមានសំណងលើសពីនេះទេ។
ប៉ុន្តែលោកថា បើអាជ្ញាធរយកគ្រឿងចក្រមកឈូសឆាយដីចម្ការបារាំងនេះ ពលរដ្ឋនឹងចុះទៅហាមឃាត់ ដើម្បីឱ្យរកដំណោះស្រាយសមស្របជូនពួកគាត់ឡើងវិញ។
លោកបានថ្លែងថា៖ «គេបានសម្រេចឱ្យត្រឹម ១ ១០០ ដុល្លារក្នុងដំណាំអាស្រ័យផល ១ ហិកតា ក្នុង ១ ឆ្នាំ ហើយគេឱ្យតែ ៤ ឆ្នាំទេ បើសរុបទៅស្មើ ៤ កាក់ (០,៤$) ក្នុង ១ ការ៉េ ប៉ុន្តែពលរដ្ឋអាស្រ័យផលធ្វើស្រែ ៤០ ឆ្នាំហើយហ្នឹង។ ពលរដ្ឋអត់ពេញចិត្តទេ ប៉ុន្តែប្រហែលអត់មានអ្នកជួយទេ។ ដូច្នេះគេថា ៤ កាក់ហ្នឹងទេ បើទុកទៀតក៏នៅតែ ៤ កាក់ដែរ»។
លោក គាំ រិទ្ធ បានបន្តថា បើលោកទទួលយកសំណងតាមអន្តរក្រសួងដាក់ឱ្យនេះ លោកនឹងទទួលបានប្រាក់ប្រមាណជាង ៤ ០០០ ដុល្លារ អាមេរិក (សម្រាប់ ៤ ឆ្នាំ) ព្រោះដីរបស់លោកមានទំហំប្រមាណ ១ ហិកតា ប៉ុន្តែដីរបស់ពលរដ្ឋដែលមានទំហំតូច (១០ អាឬ ២០ អា) បានទឹកប្រាក់ប្រមាណ ៤០០ ទៅ ៨០០ ដុល្លារអាមេរិកប៉ុណ្ណោះក្នុងរយៈពេលដូចគ្នា។
លោក ផាន់ ផាន អនុប្រធានភូមិអង្គតាសិតប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែកញ្ញា ដែរថា ក្នុងជំនួបរវាងមន្ត្រីអន្តរក្រសួង និងពលរដ្ឋកាលពីថ្ងៃទី ១៣ ខែ កញ្ញា ឆ្នាំ ២០២១ មន្ត្រីអន្តរក្រសួងបានសម្រេចផ្តល់សំណងឱ្យពលរដ្ឋដែលអាស្រ័យផលក្នុងតម្លៃ ៤ កាក់ក្នុង ១ ម៉ែត្រការ៉េ លើដំណាំអាស្រ័យផលក្នុងរយៈពេល ៤ ឆ្នាំ ឬក្នុង ១ ហិកតា ស្មើនឹង ១ ១០០ ដុល្លារ អាមេរិក ដូច្នេះ ៤ ហិកតាស្មើនឹង ៤ ៤០០ ដុល្លារក្នុងរយៈពេល ៤ ឆ្នាំ គិតពីពេលនេះតទៅ។
ទោះជាយ៉ាងណា លោកថា ពលរដ្ឋបានបដិសេធនូវសំណងនោះ ហើយបាននាំគ្នាដើរចេញពីកិច្ចប្រជុំ ដោយសារមិនពេញចិត្តចំពោះដំណោះស្រាយ។
ប៉ុន្តែអាជ្ញាធរនៅតែរក្សាតម្លៃសំណងនេះដដែល ហើយរង់ចាំទទួលពលរដ្ឋដែលស្ម័គ្រចិត្តទទួលយកសំណងនេះ។
ភ្នំពេញប៉ុស្តិ៍ មិនអាចទាក់ទងលោក គង់ សោភណ្ឌ អភិបាលខេត្តកណ្តាល និងលោក ខុន សិរីរដ្ឋា អភិបាលស្រុកអង្គស្នួល ដើម្បីសុំធ្វើអត្ថាធិប្បាយបានទេនៅថ្ងៃទី ១៤ ខែកញ្ញា ឆ្នាំ ២០២១។
ក៏ប៉ុន្តែលោក មឿន រុន សមាជិកក្រុមប្រឹក្សាឃុំទួលព្រេជបានឱ្យដឹងថា ក្រុមការងារអន្តរក្រសួងកាលពីថ្ងៃទី ១៣ ខែកញ្ញា បានចុះមកផ្សព្វផ្សាយ និងដោះស្រាយគោលនយោបាយជូនពលរដ្ឋដែលជាសំណងផលប៉ះពាល់ទៅលើដំណាំកសិផលរបស់ពួកគាត់ក្នុងរយៈពេល ៤ ឆ្នាំ ប៉ុន្តែនេះមិនមែនដោះស្រាយទៅលើតម្លៃដីធ្លីនោះទេ។
លោកបន្តថា មន្ត្រីអន្តរក្រសួងបានគិតឱ្យពលរដ្ឋដែលមានដំណាំស្រូវក្នុង ១ ហិកតា តម្លៃ ១ ១០០ ដុល្លារក្នុង ១ ឆ្នាំ ហើយរដ្ឋមិនអាចយកលុយរបស់រដ្ឋមកទិញដីរបស់រដ្ឋបានទេ។ ប៉ុន្តែរដ្ឋអាចសងសំណងទៅលើការអាស្រ័យផលនៅលើដីរបស់រដ្ឋវិញបាន។
លោកបានឱ្យដឹងដែរថា អន្តរក្រសួងមិនបានគិតតម្លៃឱ្យពលរដ្ឋដែលបានចាប់ផ្តើមធ្វើក្នុងរយៈពេល ៣០ ឬ ៤០ ឆ្នាំកន្លងមកនោះទេ ព្រោះពលរដ្ឋទាំងនោះទទួលបានផលរួចអស់ហើយ ប៉ុន្តែអន្តរក្រសួងបានដោះស្រាយឱ្យ ៤ ឆ្នាំតទៅមុខទៀតដែលមិនបានអាស្រ័យផល។
លោកថ្លែងថា៖ «ប្រជាពលរដ្ឋ គាត់អត់យល់គឺគេមិនគិត ១ ម៉ែត្រការ៉េ ក្នុងតម្លៃ ៤ កាក់អីទេ រដ្ឋមិនគិតតម្លៃដីទេ។ ប្រហែលគាត់គិតតម្លៃដីហើយ ប៉ុន្តែគាត់ត្រូវយល់ថាគេអត់គិតតម្លៃដីទេ គឺគេគិតតម្លៃដំណាំអាស្រ័យផល។ ឧទាហរណ៍ដំណាំគាត់ ១ ហិកតា គេឱ្យតម្លៃសំណង ១ ១០០ ដុល្លារក្នុង ១ ឆ្នាំ ប៉ុន្តែគាត់មិនពេញចិត្តនូវសំណងនេះ»។
យ៉ាងណាក្ដី លោក មឿន រុន ថ្លែងថា បន្ទាប់ពីមានការផ្សព្វផ្សាយស្តីពីការផ្តល់សំណងនេះគឺមានពលរដ្ឋជាង ៣០ គ្រួសារ បានទទួលយកសំណងពីអន្តរក្រសួងរួចហើយក្នុងចំណោមពលរដ្ឋ ៣២៩ គ្រួសារ ដែលមានផលប៉ះពាល់ដីចម្ការបារាំងនេះ និងមានពលរដ្ឋជាបន្តបន្ទាប់ទៀត ព្រោះរដ្ឋគ្មានជម្រើសអ្វីក្រៅពីនេះនោះទេ៕
វីដេអូ៖